ശബരിമല: ചിങ്ങ മാസ പൂജകള്ക്ക് ശബരിമല ക്ഷേത്ര നട തുറന്നു.ഞായറാഴ്ച വൈകിട്ട് 5 ന് തന്ത്രി കണ്ഠര് ബ്രഹ്മദത്തന്റെ സാന്നിധ്യത്തില് മേല്ശാന്തി പ്രസാദ് ഇ.ഡി നടതുറന്ന് ദീപം തെളിച്ചു. തിങ്കളാഴ്ച ചിങ്ങം ഒന്നിന് രാവിലെ 5നാണ് ഭക്തര്ക്ക് ദര്ശനത്തിനായി നട തുറക്കുക.
ചിങ്ങം ഒന്നിന് രാവിലെ ഉഷ പൂജ കഴിഞ്ഞ് മേല്ശാന്തിയെ പൂജാ കാര്യങ്ങളില് സഹായിക്കുന്നതിനുള്ള ‘ഉള്ക്കഴകം’ ജീവനക്കാരെ തെരഞ്ഞെടുക്കുന്നതിനുള്ള നറുക്കെടുപ്പ് നടക്കും.
ചിങ്ങം ഒന്ന് മുതല് എല്ലാ ദിവസവും വൈകിട്ട് ദീപാരാധനയ്ക്ക് ശേഷം പതിനെട്ടാം പടിയില് വിശേഷാല് പടിപൂജ ഉണ്ടാകും. അഞ്ചു ദിവസത്തെ പൂജകള് പൂര്ത്തിയാക്കി ആഗസ്റ്റ് 21-ന് രാത്രി 10 മണിക്ക് നട അടയ്ക്കും. തിരുവോണ പൂജകള്ക്കായി ആഗസ്റ്റ് 24-ന് വൈകിട്ട് ശബരിമല നട വീണ്ടും തുറക്കും. ചിങ്ങ മാസ പൂജകള്ക്കായി ശബരിമലയില് എത്തുന്ന ഭക്തര് ഔദ്യോഗിക വെബ്സൈറ്റായ www.sabarimalaonline.org വഴി വെര്ച്വല് ക്യൂ സ്ലോട്ടുകള് മുന്കൂട്ടി ബുക്ക് ചെയ്യണമെന്ന് അധികൃതര് അറിയിച്ചു.
