തിരുവനന്തപുരം: അയ്യപ്പഭക്തര്‍ക്ക് ശബരിമല തീര്‍ത്ഥാടനം സുഗമമാക്കുകയെന്ന ലക്ഷ്യത്തോടെ കേരള ഹിന്ദൂസ് ഓഫ് നോര്‍ത്ത് അമേരിക്ക (കെ എച്ച് എന്‍ എ)യും ശബരിമല അയ്യപ്പ സേവാ സമാജം (SASS)യും സംയുക്തമായി സംഘടിപ്പിക്കുന്ന ഒരു വര്‍ഷം നീളുന്ന ‘ശബരി യാത്ര’ സേവന പദ്ധതിയുടെ ഭാഗമായി അടുത്ത സൗജന്യ തീര്‍ത്ഥയാത്ര ആഗസ്റ്റ് 17ന് നടക്കും.
വര്‍ക്കലയിലെ ജനാര്‍ദ്ദന അയ്യപ്പസ്വാമി ക്ഷേത്രത്തില്‍ നിന്ന് വൈകിട്ട് 5.30ന് ആരംഭിക്കുന്ന യാത്രയില്‍ 45 അയ്യപ്പഭക്തരാണ് പങ്കെടുക്കുന്നത്. യാത്രയ്‌ക്കുള്ള വാഹനസൗകര്യം, ഭക്ഷണം തുടങ്ങി 45 തീര്‍ത്ഥാടകരുടെയും മുഴുവന്‍ ചെലവും കെ എച്ച് എന്‍ എ ഡയറക്ടര്‍ ബോര്‍ഡ് അംഗവും ഹൂസ്റ്റണിലെ സാമൂഹിക പ്രവര്‍ത്തകയുമായ രമണി പിള്ള വഴിപാടായി ഏറ്റെടുത്തു.
ഒരു അയ്യപ്പഭക്തന്റെയും സാമ്പത്തിക പരിമിതികള്‍ ശബരിമല ദര്‍ശനത്തിന് തടസമാകരുതെന്ന സേവനസങ്കല്‍പ്പമാണ് ‘ശബരി യാത്ര’ പദ്ധതിയുടെ ലക്ഷ്യം. സൗജന്യ യാത്രയും ഭക്ഷണവും ഉള്‍പ്പെടെയുള്ള സൗകര്യങ്ങള്‍ ഒരുക്കുന്നതിനൊപ്പം പ്രവാസി മലയാളി ഹിന്ദു കുടുംബങ്ങള്‍ക്ക് സ്വന്തം പേരിലോ കുടുംബാംഗങ്ങളുടെ പേരിലോ ഒരു ശബരി യാത്ര വഴിപാടായി സ്‌പോണ്‍സര്‍ ചെയ്യാനുള്ള അവസരവും പദ്ധതിയിലൂടെ ഒരുക്കിയിട്ടുണ്ട്.
”നാട്ടില്‍ നേരിട്ടെത്തി സേവനം ചെയ്യാന്‍ കഴിയാത്ത പ്രവാസി കുടുംബങ്ങള്‍ക്ക് ഒരു ബസ് യാത്രയോ അന്നദാനമോ ഒരു കൂട്ടം അയ്യപ്പഭക്തരുടെ യാത്രാചെലവോ വഴിപാടായി ഏറ്റെടുക്കാന്‍ കഴിയുന്ന രീതിയിലാണ് പദ്ധതി രൂപപ്പെടുത്തിയിരിക്കുന്നത്. ഭക്തിയും സേവനവും ഒരുമിക്കുന്ന ഇത്തരം പ്രവര്‍ത്തനങ്ങള്‍ കെ എച്ച് എന്‍ എ യുടെ സാമൂഹികവും ആത്മീയവുമായ ദൗത്യത്തിന്റെ ഭാഗമാണ്,” കെ എച്ച് എന്‍ എ പ്രസിഡന്റ് ടി. ഉണ്ണികൃഷ്ണന്‍ പറഞ്ഞു.
45 അയ്യപ്പഭക്തരുടെ യാത്രയും ഭക്ഷണവും ഉള്‍പ്പെടെയുള്ള മുഴുവന്‍ ചെലവും ഏറ്റെടുത്ത രമണി പിള്ളയുടെ സേവനം മാതൃകാപരമാണെന്ന് അദ്ദേഹം പറഞ്ഞു. അവരുടെ ഈ വഴിപാട് കൂടുതല്‍ കുടുംബങ്ങള്‍ക്കും അഭ്യുദയകാംക്ഷികള്‍ക്കും പ്രചോദനമാകട്ടെയെന്നും അദ്ദേഹം ആശംസിച്ചു.
ഒരു യാത്രയില്‍ ഒതുങ്ങുന്നതല്ല ‘ശബരി യാത്ര’. ഒരു വര്‍ഷം നീളുന്ന സേവന സംരംഭത്തിലൂടെ കൂടുതല്‍ അയ്യപ്പഭക്തര്‍ക്ക് സഹായമെത്തിക്കുകയാണ് ലക്ഷ്യം. ഒരു ബസ് സ്‌പോണ്‍സര്‍ ചെയ്യുകയോ, തീര്‍ത്ഥാടകരുടെ ഭക്ഷണച്ചെലവ് ഏറ്റെടുക്കുകയോ, ഒരു യാത്രയുടെ മുഴുവന്‍ ചെലവും വഴിപാടായി സമര്‍പ്പിക്കുകയോ ചെയ്യാം. വ്യക്തികള്‍ക്കും കുടുംബങ്ങള്‍ക്കും സ്ഥാപനങ്ങള്‍ക്കും സുഹൃദ് കൂട്ടായ്‌മകള്‍ക്കും പദ്ധതിയുടെ ഭാഗമാകാം.
”ഓരോ സ്‌പോണ്‍സര്‍ഷിപ്പും ഒരു സംഭാവന മാത്രമല്ല, അയ്യപ്പഭക്തര്‍ക്കായി സമര്‍പ്പിക്കുന്ന വഴിപാടും സേവനവുമാണ്. കൂടുതല്‍ പ്രവാസി കുടുംബങ്ങള്‍ ഈ പുണ്യസംരംഭത്തിന്റെ ഭാഗമാകണം,” കെ എച്ച് എന്‍ എ നേതൃത്വം അഭ്യര്‍ത്ഥിച്ചു.
കെ എച്ച് എന്‍ എ ജനറല്‍ സെക്രട്ടറി സിനു നായര്‍, ട്രഷറര്‍ അശോക് മേനോന്‍, വൈസ് പ്രസിഡന്റ് കെ.വി. സഞ്ജീവ് കുമാര്‍, ജോയിന്റ് സെക്രട്ടറി ശ്രീകുമാര്‍ ഹരിലാല്‍, ജോയിന്റ് ട്രഷറര്‍ അപ്പുക്കുട്ടന്‍ പിള്ള, ട്രസ്റ്റി ബോര്‍ഡ് ചെയര്‍പേഴ്‌സണ്‍ വനജ നായര്‍ എന്നിവര്‍ രമണി പിള്ളയുടെ സേവനത്തെ അഭിനന്ദിച്ചു.കൂടുതല്‍ കുടുംബങ്ങള്‍ ‘ശബരി യാത്ര’യുടെ ഭാഗമാകണമെന്നും അവര്‍ അഭ്യര്‍ത്ഥിച്ചു.
