ന്യൂദല്ഹി: ശബരിമല തീര്ത്ഥാടകരുടെ സൗകര്യം കണക്കിലെടുത്ത് തിരുവല്ലയില് പ്രധാന ട്രെയിനുകള്ക്ക് സ്റ്റോപ്പ് അനുവദിക്കുമെന്ന് റെയില്വേ മന്ത്രി അശ്വിനി വൈഷ്ണവ് ഉറപ്പു നല്കിയതായി ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസും സംസ്ഥാന ജനറല് സെക്രട്ടറി അനൂപ് ആന്റണിയും വാര്ത്താസമ്മേളനത്തില് പറഞ്ഞു.
മറ്റ് ജില്ലകളിലെ വിവിധ സ്റ്റോപ്പ് ആവശ്യങ്ങള്, മംഗലാപുരം – ഷൊര്ണൂര് നാലുവരിപ്പാത, ഷൊര്ണൂര് – എറണാകുളം, എറണാകുളം-തിരുവനന്തപുരം-കന്യാകുമാരി മൂന്നാം പാത എന്നിവയും എറണാകുളം-ആലപ്പുഴ-കായംകുളം പാത ഇരട്ടിപ്പിക്കല് കഴിഞ്ഞാലുടന് മൂന്നാം പാതയും വേഗത്തില് നടപ്പിലാക്കുമെന്നും ഉറപ്പ് ലഭിച്ചു.
വെള്ളപ്പൊക്ക ദുരിതത്തിന് ശാശ്വത പരിഹാരത്തിനായി പമ്പാ നദിയെയും തിരുവനന്തപുരം പാര്വതി പുത്തനാറിനെയും നമാമി ഗംഗ മോഡല് പദ്ധതിയിലൂടെ പുനരുജ്ജീവിപ്പിക്കുന്നതിന് കേന്ദ്ര ജലശക്തിമന്ത്രി സി.ആര്. പാട്ടീലിന് പദ്ധതി സമര്പ്പിച്ചിട്ടുണ്ട്.
പദ്ധതിയെക്കുറിച്ച് പഠനം നടത്താന് കേന്ദ്ര ജലശക്തി വകുപ്പിലെ വിദഗ്ധരും ഉദ്യോഗസ്ഥരും അടങ്ങുന്ന സമിതിയെ അയക്കണമെന്നും അഭ്യര്ത്ഥിച്ചു. പദ്ധതിയില് സംസ്ഥാന സര്ക്കാരിന് വലിയ പങ്കാളിത്തമുള്ളതിനാല് മുഖ്യമന്ത്രി ഉള്പ്പെടെയുള്ളവരുമായി വരും ദിവസങ്ങളില് ബിജെപി സംഘം ചര്ച്ച നടത്തും.
യുഡിഎഫ്, എല്ഡിഎഫ് എംപിമാരില് നിന്ന് യാതൊന്നും പ്രതീക്ഷിക്കേണ്ടതില്ലെന്ന് പാര്ലമെന്റില് കേരളം ബില് അവതരിപ്പിച്ചപ്പോള് കേരള ജനത മനസിലാക്കിയെന്ന് ഇരുവരും പറഞ്ഞു. സാമ്പത്തിക ദുരിതത്തിലുള്ള യുഡിഎഫ് ഗവണ്മെന്റിന് വികസനത്തിന് എന്തെങ്കിലും ചെയ്യാന് സാധിക്കുമെന്നുള്ള പ്രതീക്ഷ ജനങ്ങള്ക്കില്ല.
ഈ സാഹചര്യത്തിലാണ് കേന്ദ്രസര്ക്കാരിന്റെ പദ്ധതികളും ക്ഷേമ പദ്ധതികളും കേരളത്തിലേക്ക് എത്തിക്കാനും വികസിത കേരളത്തിനുള്ള ബ്ലൂപ്രിന്റ് നടപ്പാക്കാനും പ്രതിപക്ഷത്തിരുന്നുകൊണ്ട് ബിജെപി പ്രവര്ത്തിക്കുന്നതെന്നും അവര് കൂട്ടിച്ചേര്ത്തു.
