പത്തനംതിട്ട: ഊണിന് മീൻ വറുത്തുനൽകിയില്ലെന്ന നിസാരകാര്യത്തിന് ഭർത്താവ് ക്രൂരമായി മർദിച്ചതായി യുവതിയുടെ പരാതി. മർദനത്തിൽ മുഖത്തും മുതുകിലും പരിക്കേറ്റതായും പരാതിയിൽ പറയുന്നു. റാന്നി ഐത്തല പടിയറ വീട്ടിൽ റെജിക്കെതിരെ ഭാര്യ സുജയാണ് പരാതി നൽകിയത്. സംഭവത്തിൽ പോലീസ് കേസെടുത്തു.
മദ്യപിച്ച് വീട്ടിലെത്തിയ റെജി ചോറിന് കറികൾ കുറഞ്ഞുപോയെന്നും മീൻ വറുത്ത് നൽകില്ലെന്നും പറഞ്ഞ് മർദിക്കുകയായിരുന്നു. മർദനത്തിന്റെ ദൃശ്യങ്ങളും സുജ പോലീസിന് കൈമാറിയിട്ടുണ്ട്. മർദനം പതിവാണെന്നും സഹിക്കവയ്യാതെയാണ് പോലീസിൽ പരാതി നൽകിയതെന്നും യുവതി വ്യക്തമാക്കി. സംഭവത്തിൽ റാന്നി പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു.
തലമുടിയിൽ കുത്തിപ്പിടിച്ച് മുതുകത്തും കവിളിലും ക്രൂരമായി അടിക്കുകയും ഇടിക്കുകയും ചെയ്യുന്ന ദൃശ്യങ്ങളാണ് സമൂഹമാധ്യമങ്ങളിൽ പ്രചരിക്കുന്നത്.
