കുംഭകര്ണ്ണനുമേല് രാമനുണ്ടായ വിജയത്തിന് ശേഷം, ദേവന്മാര് ആഘോഷത്തിന്റെ ഭാഗമായി ആകാശത്തുനിന്നും പൂക്കള് പൊഴിച്ചു. നാരദമുനി ആകാശത്ത് പ്രത്യക്ഷപ്പെട്ട് രാമനെ പരമാത്മാവായി, കാലത്തിനും മായയ്ക്കും അതീതനായി വിശേഷിപ്പിച്ചു. രാവണനുമായുള്ള യുദ്ധത്തില് വിജയിക്കുവാനുള്ള ആശീര്വാദം നല്കി.കുംഭകര്ണ്ണന്റെ മരണവാര്ത്തയറിഞ്ഞ് രാവണന് വിലപിച്ചു.
ഇന്ദ്രജിത്ത് പിതാവിനെ ആശ്വസിപ്പിച്ച്, നിഗൂഢമായ ഒരു യജ്ഞം നടത്തി മായികങ്ങളായ മന്ത്രശക്തികള് നേടി യുദ്ധത്തിനിറങ്ങി. നിരവധി വാനരന്മാരെ കൊന്നൊടുക്കി അവസാനം രാമനെയും ലക്ഷ്മണനെയും പോലുംഅബോധാവസ്ഥയിലാക്കി. താന് വിജയിച്ചതായി വിശ്വസിച്ച് ഇന്ദ്രജിത്ത് കൊട്ടാരത്തിലേക്ക് മടങ്ങി.
ഔഷധാഹരണയാത്ര
യുദ്ധഭൂമിയില്, വീണും ചത്തും കിടക്കുന്ന പോരാളികള്ക്കിടയില് ഹനുമാനും വിഭീഷണനും തിരഞ്ഞ് നടക്കുമ്പോള് ജാംബവാനെ ഏറെ പരിക്കുകളോടെ കണ്ടെത്തി. അപ്പോള് ജംബവാന് ഹനുമാന് ജീവനോടെയുണ്ടെന്നറിഞ്ഞ് സന്തോഷിച്ച് രാമലക്ഷ്മണന്മാര് മയങ്ങിവീണുവെങ്കിലും ഇനിയും പ്രതീക്ഷയ്ക്ക് വഴിയുണ്ടെന്ന് പ്രഖ്യാപിച്ചു. ഹനുമാനോട് അങ്ങ് വടക്ക് ഋഷഭപര്വ്വതത്തിലെത്തി അവിടെനിന്ന് പെട്ടെന്ന് വിശല്യകരണി, സന്ധാനകരണി, സുവര്ണകരണി, മൃതസഞ്ജീവിനി എന്നീ നാല് ദിവ്യഔഷധങ്ങള്, കൊണ്ടുവരാന് നിര്ദ്ദേശിച്ചു.
ദിവ്യൗഷധ ഫലം
ഋഷഭശൃംഗത്തിലെ സസ്യജാലങ്ങള്ക്കിടയില് ഔഷധസസ്യങ്ങള് വ്യക്തമായി കണ്ടെത്താന് കഴിയാതിരുന്നതിനാല്, ഹനുമാന് ആ പര്വ്വതം മുഴുവനും അടിയോടെ പറിച്ച് കയ്യില് പിടിച്ചുകൊണ്ട് പെട്ടെന്ന് പറന്ന് ലങ്കയില് മടങ്ങിയെത്തി. ഔഷധസസ്യങ്ങളുടെ സുഗന്ധം ഏറ്റപാടെ രാമനും ലക്ഷ്മണനും ഉള്പ്പെടെയുള്ള എല്ലാ പോരാളികളും പരിക്കേറ്റ വാനരന്മാരും ബോധം തെളിഞ്ഞുണര്ന്നു. ഹനുമാന് താമസംവിനാ പര്വ്വതത്തെ തിരികെപൊക്കിയെടുത്ത്കൊണ്ടുപോയി പുനഃസ്ഥാപിച്ചു.
മായാ സീത
ഇന്ദ്രജിത്ത് ഒരു മായാസീതയെ സൃഷ്ടിച്ച്, തന്റെ രഥത്തില് വച്ച് പരസ്യമായി അവളെ വാളുകൊണ്ട് വെട്ടിക്കൊന്നു. അക്കാഴ്ച കണ്ട വാനരന്മാരും ഹനുമാനും വല്ലാതെ സങ്കടപ്പെട്ടു. അവര് സീതാദേവി മരിച്ചു എന്ന് തന്നെ വിശ്വസിച്ചു. അവര് വിവരം രാമനെ അറിയിച്ചപ്പോള് രാമന് ബോധം കെട്ടുവീണു. ലക്ഷ്മണനും ഹനുമാനും രാമനെ സാന്ത്വനിപ്പിക്കാന് ശ്രമിച്ചു. ഇന്ദ്രജിത്തിന് നികുംഭിലയില് യജ്ഞം നടത്താനുള്ള സാവകാശം കിട്ടാനായി ചെയ്യുന്ന വെറും മായാപ്രയോഗമാണിതെന്നു മനസ്സിലാക്കിയ വിഭീഷണന് അവരെ സമാധാനിപ്പിച്ചു.
ജന്മഭൂമി ഓണ്ലൈന്