കാസര്കോട്: വിവാഹമോചന നടപടികള് ഹൈക്കോടതി വഴി വേഗത്തിലാക്കാമെന്നും ജീവിത പ്രശ്നങ്ങള് പരിഹരിക്കാന് പൂജകള് ചെയ്യാമെന്നും വിശ്വസിപ്പിച്ച് വീട്ടമ്മയില് നിന്നും ലക്ഷങ്ങള് തട്ടിയെടുത്ത കേസില് പ്രതി പിടിയില്.കോട്ടയം ആനിക്കാട് സ്വദേശി ആന്റണി വിന്സെന്റിനെയാണ് കാസര്ഗോഡ് സൈബര് ക്രൈം പൊലീസ് പിടികൂടിയത്.
കാസര്കോട് ഉദുമ സ്വദേശിനിയില് നിന്നും പലപ്പോഴായി 13,16,731 രൂപയാണ് പ്രതി തട്ടിയെടുത്തത്.
2025 സെപ്തംബര് 17 മുതല് 2026 ജനുവരി 2 വരെയുള്ള കാലയളവിലാണ് കേസിനാധാരമായ സംഭവം നടന്നത്. ഭര്ത്താവുമായി പിരിഞ്ഞു കഴിയുകയായിരുന്ന വീട്ടമ്മയെ ഫേസ്ബുക്ക് വഴിയാണ് പ്രതി പരിചയപ്പെട്ടത്. ഫോണിലും വാട്സാപ്പ് വഴിയും നിരന്തരം ബന്ധപ്പെട്ട് വിശ്വാസം പിടിച്ചുപറ്റി.
യുവതിയുടെ വിവിധ ബാങ്ക് അക്കൗണ്ടുകള് വഴിയാണ് പലപ്പോഴായി പണം പ്രതി തട്ടിയെടുത്തത്.
പരാതിയെ തുടര്ന്ന് കാസര്ഗോഡ് സൈബര് ക്രൈം പൊലീസ് നടത്തിയ ശാസ്ത്രീയമായ അന്വേഷണത്തിലാണ് കൊല്ലം തെന്മലയില് വെച്ച് പ്രതി കുടുങ്ങിയത്.
