നടി ഹര്‍ഷവര്‍ദ്ധിനിക്കെതിരെയുള്ള സ്വര്‍ണ്ണക്കടത്ത് കേസ്: മുഴുവന്‍ സിസിടിവി ദൃശ്യങ്ങളും കൈമാറും

ബംഗളൂരു: കന്നഡ നടി ഹര്‍ഷവര്‍ദ്ധിനിക്കെതിരെയുള്ള സ്വര്‍ണ്ണക്കടത്ത് കേസുമായി ബന്ധപ്പെട്ട് ബംഗളൂരുവിലെ കെംപഗൗഡ അന്താരാഷ്‌ട്ര വിമാനത്താവളത്തിലെ പൂര്‍ണ്ണമായ സിസിടിവി ദൃശ്യങ്ങള്‍ സിഐഎസ്എഫ് കൈമാറുമെന്ന് അഡീഷണല്‍ സോളിസിറ്റര്‍ ജനറല്‍ കര്‍ണാടക ഹൈക്കോടതിയെ അറിയിച്ചു. ദുബായില്‍ നിന്നുള്ള വിമാനമിറങ്ങവെ 12.56 കോടി രൂപ വിലമതിക്കുന്ന 14.2 കിലോഗ്രാം സ്വര്‍ണ്ണവുമായി ഹര്‍ഷവര്‍ദ്ധിനിയെ 2025 മാര്‍ച്ച് 3 ന് ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡിആര്‍ഐ) അറസ്റ്റ് ചെയ്തിരുന്നു. ഈ കേസുമായി ബന്ധപ്പെട്ട് സിസിടിവി ദൃശ്യങ്ങള്‍ നല്‍കണമെന്ന കോടതിയുടെ ജൂലായ് 14 ലെ ഉത്തരവ് പാലിക്കുന്നില്ലെന്ന് ആരോപിച്ച് സമര്‍പ്പിച്ച ഹര്‍ജിയിലാണ് എഎസ്ജി ഇക്കാര്യം ഉറപ്പു നല്‍കിയത്. കള്ളക്കടത്തു നടന്നുവെന്ന് പറയപ്പെടുന്ന ദിവസത്തെ ഭാഗികമായ ദൃശ്യങ്ങളേ കൈമാറിയിട്ടുള്ളൂവെന്ന് ഹര്‍ജിയില്‍ ആരോപിച്ചു. ഉത്തരവു സംബന്ധിച്ച് സിഐഎസ്എഫ് ഉദ്യോഗസ്ഥരുടെ ഭാഗത്തുണ്ടായ തെറ്റിദ്ധാരണയാണ് ഉത്തരവു പാലിക്കുന്നതില്‍ പിഴവിനു കാരണമെന്ന് അദ്‌ദേഹം വ്യക്തമാക്കി.