തിരുവനന്തപുരം: കടലില് കാണാതായ മത്സ്യത്തൊഴിലാളികള്ക്ക് വേണ്ടി പതിമൂന്നാം ദിവസം നടത്തിയ തെരച്ചിലിലും ഫലമുണ്ടായില്ല.മുതലപ്പൊഴിയില് കാണാതായ ഷിജിനായി നാവികസേനയുടെ ഐ എന് എസ് കല്പേനി രണ്ട് ദിവസം നങ്കൂരമിട്ട് തെരച്ചില് നടത്തി.നീണ്ടകരയില് കാണാതായ ഗൗതമിനെ കണ്ടെത്താന് ബുധനാഴ്ച തീരസംരക്ഷണ സേനയുടെ ഹെലികോപ്റ്ററുകളും എത്തി. കേന്ദ്ര മന്ത്രി സുരേഷ് ഗോപിയുടെ നിര്ദ്ദേശമനുസരിച്ചാണ് ഇത്.
പ്രതികൂല കാലാവസ്ഥ മൂലം മുതലപ്പൊഴിയില് ഷിജിനെ കണ്ടെത്താനുളള സോണാര് പരിശോധന പൂര്ത്തിയാക്കാനായില്ല.തീര പൊലീസും മറൈന് എന്ഫോസ്മെന്റും ബുധനാഴ്ച പുലര്ച്ചെ തന്നെ പരിശോധന തുടങ്ങിയിട്ടും ഫലമുണ്ടായില്ല. ശക്തമായ അടിയൊഴുക്കും തിരയും തിരച്ചിലിന് തടസം സൃഷ്ടിക്കുന്നുണ്ട്.
വിഴിഞ്ഞത്ത് നിന്ന് കാണാതായ ജോണിനായുള്ള തെരച്ചില് നടത്തുന്നത് തമിഴ്നാട് കന്യാകുമാരി ഭാഗങ്ങള് കേന്ദ്രീകരിച്ചാണ്. തീര പൊലീസും മറൈന് എന്ഫോഴ്സ്മെന്റും നടത്തുന്ന തെരച്ചില് വരും ദിവസങ്ങളിലും തുടരും.
