മുംബൈ: മഹാരാഷ്ട്രയിലെ ഏറ്റവും വില കൂടിയ ഗണപതി മുംബൈയിലെ മാട്ടുംഗയില്. ഗണേശോത്സവം സംഘടിപ്പിക്കുന്ന ഇവിടുത്തെ ജിഎസ് ബി മണ്ഡല് ഈ ഗണപതിയെയും ഉത്സവത്തെയും ഇന്ഷ്വര് ചെയ്തിരിക്കുന്നത് 474.46 കോടി രൂപയ്ക്കാണ്.
മഹാരാഷ്ട്രയിലെ ഏറ്റവും സമ്പന്നനായ ഗണപതി” എന്ന വിശേഷണം വർഷങ്ങളായി സ്വന്തമാക്കിയ മാട്ടുംഗയിലെ കിംഗ് സര്ക്കിളിലുള്ള സേവാ മണ്ഡല് വീണ്ടും വാർത്തകളില് ഇടംപിടിച്ചത് റെക്കോർഡ് തുകയായ 474.46 കോടി രൂപയുടെ ഓള്-റിസ്ക് ഇൻഷുറൻസ് പോളിസി നേടിയതോടെയാണ്. ഇത് ഇന്ത്യയിലെ തന്നെ റെക്കോഡാണ്. ഒരു ഗണപതി സേവാ മണ്ഡലും ഇതുവരെയും ഇത്രയും വലിയ തുകയ്ക്ക് ഇന്ഷുറന്സ് പരിരക്ഷ നേടിയിട്ടില്ല.
ന്യൂ ഇന്ത്യാ അഷ്വറന്സ് എന്ന കമ്പനി നല്കിയിരിക്കുന്ന ഈ വില പിടിച്ച ഇന്ഷുറന്സ് നേടാന് ജിഎസ് ബി സേവാമണ്ഡല് അടയ്ക്കുന്ന പ്രീമിയം തുക എത്രയാണെന്ന കാര്യം ഇന്ഷുറന്സ് കമ്പനിയോ ജിഎസ് ബി സേവാമണ്ഡലോ വെളിപ്പെടുത്തിയിട്ടില്ല.
ഇനി ഇന്ഷുറന്സ് എങ്ങിനെയൊക്കെയാണ് എന്ന് പരിശോധിക്കാം. 67.03 കോടി രൂപയ്ക്ക് ഇന്ഷുര് ചെയ്തിരിക്കുന്നത് വിഗ്രഹത്തില് അലങ്കരിക്കുന്ന സ്വർണം, വെള്ളി, ആഭരണങ്ങള്, മറ്റ് വിലപിടിപ്പുള്ള വസ്തുക്കള് എന്നിവയാണ്.
474 കോടിയില് ഏറ്റവും കൂടുതല് തുക ഇന്ഷുറന്സ് നേടിയിരിക്കുന്നത് ഗണേശോത്സവ ദിവസം പ്രവർത്തിക്കുന്ന നൂറുകണക്കിന് ആളുകള്ക്കും സുരക്ഷ ഉറപ്പാക്കിയിട്ടുണ്ട്. വളണ്ടിയർമാർ, പുരോഹിതന്മാർ, പാചകക്കാർ, സുരക്ഷാ ജീവനക്കാർ, ഫുട്വെയർ കൗണ്ടർ ജീവനക്കാർ, വാലറ്റുകള് തുടങ്ങി ഉത്സവവുമായി ബന്ധപ്പെട്ട് പ്രവർത്തിക്കുന്നവര്ക്കാണ്. ഇവരുടെ വ്യക്തിഗത അപകട ഇൻഷുറൻസിനായി വകയിരുത്തിയിരിക്കുന്നത് 375 കോടി രൂപയാണ്. ഇതിന്റെ പേരില് മിക്കവര്ഷങ്ങളിലും ഇന്ഷുറന്സ് തുക കിട്ടാറുണ്ട്. കാരണം മരണവും അപകടവും ഒക്കെ പതിവാണ്.
പന്തല്, അനുബന്ധ വേദികള്, ഭക്തർ എന്നിവരുമായി ബന്ധപ്പെട്ട അപകടസാധ്യതകള് നേരിടാൻ 30 കോടി രൂപയുടെ പൊതു ബാധ്യതാ ഇൻഷുറൻസും ഉള്പ്പെടുത്തിയിട്ടുണ്ട്. തീപിടിത്തം, പ്രകൃതിദുരന്തം, ഫർണിച്ചറുകള്, ഡിജിറ്റല് ഉപകരണങ്ങള്, മറ്റ് ആസ്തികള് എന്നിവയ്ക്കും പ്രത്യേക ഇൻഷുറൻസ് പരിരക്ഷ ഈ പോളിസിയുടെ ഭാഗമാണ്.
