റാഞ്ചി ; ജാർഖണ്ഡിലെ വിദ്യാർത്ഥി പ്രതിഷേധം ഫലം കാണുന്നു . മൂന്ന് ജെപിഎസ്സി അംഗങ്ങൾ രാജിവച്ചു. അജിത ഭട്ടാചാര്യ, ജമീൽ അഹമ്മദ്, അനിമ ഹൻസ്ഡ എന്നിവരാണ് രാജിവച്ചത് . ഗവർണർ സന്തോഷ് ഗാംഗ്വാർ രാജി സ്വീകരിച്ചു. സിഐഡി സമൻസിനെ തുടർന്നാണ് ജെപിഎസ്സി അംഗങ്ങൾ ഈ തീരുമാനമെടുത്തത്. കമ്മീഷന്റെ പരീക്ഷകളിലെ ക്രമക്കേടുകൾ സിഐഡി അന്വേഷിക്കുന്നുണ്ട് . തിങ്കളാഴ്ച മൂന്ന് അംഗങ്ങളെയും ചോദ്യം ചെയ്യാൻ വിളിപ്പിച്ചിട്ടുണ്ട്.
ജെപിഎസ്സി, ജെഎസ്എസ്സി റിക്രൂട്ട്മെന്റ് പരീക്ഷകളിലെ തട്ടിപ്പും, ചോദ്യപേപ്പർ ചോർച്ചയും ആരോപിച്ച് കഴിഞ്ഞ 16 ദിവസമായി പ്രതിഷേധം തുടരുകയാണ്. ഇന്നും പ്രതിഷേധിക്കുന്ന വിദ്യാർത്ഥികളും സർക്കാരും തമ്മിലുള്ള മൂന്നാം ഘട്ട ചർച്ചകൾ നടന്നു. പ്രതിഷേധിക്കുന്ന വിദ്യാർത്ഥികളുടെ നിരവധി പ്രധാന ആവശ്യങ്ങൾ ഹേമന്ത് സോറൻ സർക്കാർ അംഗീകരിച്ചു.
വ്യാപകമായ വിദ്യാർത്ഥി പ്രതിഷേധങ്ങളും ഗുരുതരമായ ക്രമക്കേടുകൾ സംബന്ധിച്ച ആരോപണങ്ങളും ചൂണ്ടിക്കാട്ടി 14-ാമത് ജെപിഎസ്സി സിവിൽ സർവീസസ് പ്രിലിമിനറി പരീക്ഷ റദ്ദാക്കാൻ സർക്കാർ സമ്മതിച്ചു. വിവാദ വെണ്ടർ ഏജൻസിയായ ടിഎസ്ആർ ഡാറ്റാ പ്രോസസിംഗ് പ്രൈവറ്റ് ലിമിറ്റഡ് നടത്തിയ എല്ലാ മുൻ പരീക്ഷകളിലെയും സാമ്പത്തിക ഇടപാടുകൾ സംബന്ധിച്ച ആരോപണങ്ങൾ എൻഫോഴ്സ്മെന്റ് ഡയറക്ടറേറ്റ് (ഇഡി) അന്വേഷിക്കാൻ ഹേമന്ത് സോറന്റെ സർക്കാർ സമ്മതിച്ചു.
ജെ.എസ്.എസ്.സി സി.ജി.എൽ പരീക്ഷ റദ്ദാക്കണമെന്ന പ്രക്ഷോഭ വിദ്യാർത്ഥികളുടെ ആവശ്യം അംഗീകരിക്കാൻ സംസ്ഥാന സർക്കാർ നിലവിൽ വിസമ്മതിച്ചിട്ടുണ്ടെങ്കിലും. പരീക്ഷയിലെ ക്രമക്കേടുകൾ സംബന്ധിച്ച ആരോപണങ്ങളിൽ ജുഡീഷ്യൽ അന്വേഷണം നടത്തുമെന്ന് സർക്കാർ വ്യക്തമാക്കിയിട്ടുണ്ട്. അതേസമയം, ഈ പ്രധാന ആവശ്യം അംഗീകരിക്കാത്തതിനാൽ ഓഗസ്റ്റ് 10 ന് വിദ്യാർത്ഥികൾ നിയമസഭ ഉപരോധിക്കുമെന്ന് പ്രഖ്യാപിച്ചു.
