ലഖ്നൗ: അടുത്ത വർഷം ഉത്തർപ്രദേശിൽ തെരഞ്ഞെടുപ്പ് നടക്കാനിരിക്കെ സമാജ്വാദി പാർട്ടി പ്രസിഡന്റ് അഖിലേഷ് യാദവ് പ്രഖ്യാപിച്ച പുതിയ രാഷ്ട്രീയ നയത്തിന് കടുത്ത വിമർശനം. അഖിലേഷ് യാദവിന്റെ നിലപാട് ഓന്തിന്റെ നിറംമാറ്റം പോലെയാണെന്ന് ബിഎസ്പി നേതാവ് മായാവതിയും ബിജെപി നേതാവ് ബ്രജേഷ് പഥക്കും പ്രസ്താവിച്ചു.
‘പിഡിഎ’ എന്നാണ് അഖിലേഷിന്റെ രാഷ്ട്രീയ നയം. ഇതിലെ ‘പി’ ‘പണ്ഡിറ്റുകളെ’യാണ് സൂചിപ്പിക്കുന്നതെന്ന് അദ്ദേഹം പറഞ്ഞുകൊണ്ട് സംസ്ഥാനത്തെ ബ്രാഹ്മണരിലേക്ക് എത്തിച്ചേരാൻ ശ്രമിച്ചു. എന്നിരുന്നാലും, അഖിലേഷിന്റെ പ്രവർത്തനത്തെ ബിജെപിയും മായാവതിയുടെ ബഹുജൻ സമാജ് പാർട്ടിയും (ബിഎസ്പി) രൂക്ഷമായി വിമർശിച്ചു, മുൻ മുഖ്യമന്ത്രി ഒരു ഓന്തിനെപ്പോലെ രാഷ്ട്രീയ നിറം മാറുകയാണെന്ന് അവർ പറഞ്ഞു.
ഉത്തർപ്രദേശിൽ തുടർച്ചയായി മൂന്നാം തവണയും അധികാരത്തിലെത്താൻ ശ്രമിക്കുന്ന ബിജെപിക്ക് വേണ്ടി, ഉപമുഖ്യമന്ത്രി ബ്രജേഷ് പഥക് ആരോപണത്തിന് നേതൃത്വം നൽകി. അഖിലേഷ് ബ്രാഹ്മണരുടെ ‘അഭ്യുദയകാംക്ഷി’യാണെന്ന് നടിക്കുകയും ‘ദുഷ്ടലാക്കുള്ള അടിസ്ഥാനരഹിത ആരോപണങ്ങൾ’ ഉന്നയിച്ച് ആശയങ്ങളെ എതിർക്കുകയും ചെയ്യുന്നുവെന്ന് ആരോപിച്ചു.
‘ഇന്ന്, നിങ്ങൾ ബ്രാഹ്മണ സമൂഹത്തിന്റെ അഭ്യുദയകാംക്ഷിയാണെന്ന് നടിക്കുന്നു, എന്നാൽ ഒരു പത്രപ്രവർത്തകനോട് സംസാരിക്കുമ്പോൾ അയാളുടെ ജാതി ചോദിച്ച്, നടത്തിയ പരാമർശം ഏറെ പ്രതിഷേധകരമായെന്ന് ബ്രജേഷ് പറഞ്ഞു. ഒരു കുടുംബത്തിന് അധികാരം ഉറപ്പാക്കുന്നതിലൂടെയല്ല, മറിച്ച് എല്ലാ വിഭാഗത്തിനും തുല്യ അവസരങ്ങളും നീതിയും ബഹുമാനവും നൽകുന്നതിലൂടെയാണ് സമൂഹത്തിന്റെ ഉന്നമനം ഉണ്ടാകുന്നത്,’ പഥക് പറഞ്ഞു.
ബിഎസ്പി ദേശീയ പ്രസിഡന്റ് മായാവതിയും ‘പിഡിഎ’ ഫോർമുലയെ വിമർശിച്ചു, അഖിലേഷ് ഓന്തിന്റെ നിറംമാറ്റം ഓർമ്മിപ്പിക്കുന്നതാണെന്നും ‘വഞ്ചകരായ സമാജ്വാദി പാർട്ടി’യുടെ ഭാഗമാകരുതെന്നും മായാവതി ജനങ്ങളോട് അഭ്യർത്ഥിച്ചു.
ഇത്തരം ജാതി രാഷ്ട്രീയം ഒരിക്കലും സമൂഹത്തിന്റെ മൊത്തത്തിലുള്ള ക്ഷേമത്തിലേക്ക് നയിക്കില്ലെന്ന് മുൻ മുഖ്യമന്ത്രി പറഞ്ഞു.
‘യുപിയിൽ ബിഎസ്പി രൂപീകരിച്ച നാല് സർക്കാരുകളും ഇതേ അടിസ്ഥാനത്തിലാണ് ഭരിച്ചിരുന്നത്, അതേസമയം സമാജ്വാദി പാർട്ടി (എസ്പി) അവരുടെ ഇടുങ്ങിയ ജാതി രാഷ്ട്രീയത്തിനും തെരഞ്ഞെടുപ്പ് സ്വാർത്ഥതാൽപ്പര്യങ്ങൾക്കും വേണ്ടി പരസ്യമായും വ്യക്തമായും ഒരു ഓന്തിനെപ്പോലെ നിറം മാറ്റിക്കൊണ്ടിരിക്കുന്നു,’ മായാവതി പറഞ്ഞു.
