കോട്ടയം: മുഖ്യമന്ത്രിയായിരുന്നപ്പോള് ക്ഷേമ പെന്ഷന് സര്ക്കാരിന്റെ ഔദാര്യമാണെന്ന് കോടതിയില് പറഞ്ഞ പിണറായി വിജയന്, അധികാരം പോയപ്പോള് ജനങ്ങളുടെ അവകാശമാണെന്ന് തിരുത്തിപ്പറഞ്ഞു. സാമൂഹ്യ സുരക്ഷാ പെന്ഷന് വിതരണം സഹകരണ സംഘങ്ങളില് നിന്ന് ബാങ്കുകളിലേക്കുമാറ്റിയതിനെ വിമര്ശിച്ചുള്ള പത്രക്കുറിപ്പിലാണ് പിണറായിയുടെ ഈ മലക്കംമറിച്ചില്.
സാമൂഹ്യക്ഷേമ പെന്ഷന് വിതരണ സംവിധാനം അട്ടിമറിക്കാനുള്ള യുഡിഎഫ് സര്ക്കാരിന്റെ നീക്കം അംഗീകരിക്കാന് കഴിയില്ലെന്നും പാവപ്പെട്ടവരുടെ കൈകളില് നേരിട്ട് പെന്ഷന് തുക എത്തിക്കുന്ന ജനകീയമായ പെന്ഷന് വിതരണ പദ്ധതിയാണ് സര്ക്കാര് പുതിയ ഉത്തരവിലൂടെ തകിടം മറിക്കാനൊരുങ്ങുന്നതെന്നും പിണറായി കുറ്റപ്പെടുത്തി.
ജനകീയ പെന്ഷന് വിതരണ സംവിധാനമില്ലാതാക്കി വയോജനങ്ങളെയും ഭിന്നശേഷിക്കാരെയും ബുദ്ധിമുട്ടിക്കുന്നത് കടുത്ത അനീതിയാണ്. പുതിയ ഉത്തരവ് അടിയന്തരമായി പിന്വലിക്കണമെന്നും ആവശ്യമുള്ള മുഴുവന് ഗുണഭോക്താക്കള്ക്കും സഹകരണ സംഘങ്ങള് വഴി വീട്ടില് നേരിട്ട് പെന്ഷന് എത്തിക്കുന്ന രീതി പുനഃസ്ഥാപിക്കണമെന്നും പിണറായി അഭ്യര്ത്ഥിച്ചു.
