ന്യൂദല്‍ഹി: ഉസ്ബെക്കിസ്ഥാനില്‍ മലയാളി മെഡിക്കല്‍ വിദ്യാര്‍ത്ഥിനി സാവരിയ ബസന്ത് കൊല്ലപ്പെട്ട സംഭവം രാജ്യസഭയില്‍ ഉന്നയിച്ച് സി. സദാനന്ദന്‍ മാസ്റ്റര്‍ എംപി. ഇന്നലെ പ്രത്യേക പരാമര്‍ശത്തിലൂടെയാണ് സംഭവം സഭയുടെ ശ്രദ്ധയില്‍പ്പെടുത്തിയത്.
കൊലപാതകത്തെക്കുറിച്ച് കേന്ദ്ര ഏജന്‍സികളുടെ സമഗ്ര അന്വേഷണം വേണമെന്ന് സദാനന്ദന്‍ മാസ്റ്റര്‍ ആവശ്യപ്പെട്ടു. കഴിഞ്ഞ മാസം ഏഴിനാണ് ദുരൂഹ സാഹചര്യത്തില്‍ ഹരിപ്പാട് സ്വദേശി സാവരിയയെ കൊല്ലപ്പെട്ട നിലയില്‍ കണ്ടെത്തിയത്. ശരീരമാസകലം ക്രൂരമായ മര്‍ദനമേറ്റ പാടുകളുണ്ടായിരുന്നു. സഹപാഠി മലപ്പുറം പുലാമന്തോള്‍ സ്വദേശി സദറുല്‍ അനം സംഭവത്തില്‍ ഉസ്ബെക്കിസ്ഥാനില്‍ അറസ്റ്റിലായി. ഇയാള്‍ നിരന്തരം സാവരിയയെ ഇസ്ലാമിലേക്ക് മതം മാറാന്‍ നിര്‍ബന്ധിച്ചിരുന്നതായി കുടുംബം ആരോപിച്ചിരുന്നതായും അദ്ദേഹം സഭയില്‍ അറിയിച്ചു. വേണ്ടത്ര ഗൗരവത്തോടെയുള്ള അന്വേഷണത്തിന് സംസ്ഥാന സര്‍ക്കാര്‍ തയാറാകാത്തതിനാലാണ് കേന്ദ്ര സര്‍ക്കാര്‍ ഇടപെടല്‍ ആവശ്യപ്പെട്ടത്. കൊലപാതകത്തിന് പിന്നില്‍ മതം മാറ്റ സംഘങ്ങളുടെ പ്രേരണയുണ്ടെന്ന് സംശയിക്കപ്പെടുന്നു.
