ന്യൂദല്ഹി: വി.ഡി. സവര്ക്കറെ കുറിച്ചുള്ള ചോദ്യത്തിന്റെ പേരില് കാസര്കോട് അദ്ധ്യാപകനെ സസ്പെന്ഡ് ചെയ്ത സംഭവത്തില് രാജ്യസഭയില് തലകുനിച്ച് കേരളം. സംസ്ഥാനത്തിന് കേരളം എന്ന പേര് പുനര്നാമകരണം ചെയ്തുള്ള ബില് അവതരിപ്പിച്ച ഘട്ടത്തിലാണ് സദാനന്ദന് മാസ്റ്റര് സംഭവം സഭയുടെ ശ്രദ്ധയില്പ്പെടുത്തിയത്.
കേരളത്തില് നിന്നുള്ള ഇടത്, വലത് അംഗങ്ങളും തമിഴ്നാട്ടിലെ ചില അംഗങ്ങളും ഒഴികെയുള്ള സഭയിലെ മറ്റ് അംഗങ്ങളെല്ലാം സംഭവത്തെ അപലപിച്ചു.
ഏറ്റവും കൂടുതല് എതിര്പ്പ് ഉന്നയിച്ചത് സിപിഎം, സിപിഐ അംഗങ്ങളായിരുന്നു. സവര്ക്കറുടെ പേരില് ഒരു ചോദ്യം ഉന്നയിച്ചതിനാണണ് ശിക്ഷാ നടപടിയെന്ന് പറഞ്ഞതോടെ സിപിഐ അംഗം പി. സന്തോഷ് കുമാര് പോയിന്റ് ഓഫ് ഓഡറുന്നയിച്ചു. വളരെ ഗുരുതരമായിരുന്ന രാഷ്ട്രീയ പ്രശ്നമാണെന്നും ബില്ലില് ഉള്പ്പെടുന്ന കാര്യം മാത്രമേ സഭയില് ഉന്നയിക്കാവൂ എന്നതായിരുന്നു ആവശ്യം. എന്നാല് സദാനന്ദന് മാസ്റ്റര് സംസാരിക്കുന്നത് കേരളത്തെക്കുറിച്ചും കേരളത്തിന്റെ അഭിമാനത്തെക്കുറിച്ചുമാണെന്നും കേരളത്തെക്കുറിച്ച് സംസാരിക്കുമ്പോള് ദേശീയ വികാരങ്ങള് ബഹുമാനിക്കപ്പെടുന്നുണ്ടെന്ന് ഉറപ്പുവരുത്തണമെന്നും സഭാ നേതാവ് കേന്ദ്രമന്ത്രി ജെ.പി. നഡ്ഡ മറുപടി നല്കി. പിന്നാലെ തമിഴ്നാട്ടില് നിന്നുള്ള ഡിഎംകെ അംഗം തിരുച്ചി ശിവയും സമാന ആവശ്യം ഉന്നയിച്ച് തടസപ്പെടുത്തിയെങ്കിലും ഡെപ്യൂട്ടി ചെയര്മാന് ഹരിവംശ് സദാനന്ദന് മാസ്റ്ററോട് തുടരാന് നിര്ദേശിക്കുകയായിരുന്നു.സ്വാതന്ത്ര്യസമരത്തിന്റെ അമരഗാഥയാണ് വീര് സവര്ക്കറെന്ന് മറുപടയില് ആഭ്യന്തര സഹമന്ത്രി നിത്യാന്ദ റായി പറഞ്ഞു. സമര്പ്പണത്തിന്റെയും ബലിദാനത്തിന്റെയും ദൃഢനിശ്ചയത്തിന്റെ പേരാണ് വീര് സവര്ക്കര്. അദ്ദേഹത്തെക്കുറിച്ച് ചോദ്യം ചോദിച്ചതിന്റെ പേരില് ഏതെങ്കിലും ഒരു അദ്ധ്യാപകനെ പിരിച്ചുവിടുകയാണെങ്കില് അതിനേക്കാള് മോശമായ മറ്റൊരു കാര്യം ഉണ്ടാകാനില്ല. സ്വാതന്ത്ര്യസമര സേനാനികളോടുള്ള അപമാനമാമെന്നും വിഷയം വളരെ സങ്കടകരമാമെന്നും മന്ത്രി പറഞ്ഞു.
‘കേരളം അഭിമാനകരം’
കേരള എന്ന കൊളോണിയല് സംസ്കാരം പേറുന്ന പേരില് നിന്ന് കേരളം എന്ന ചരിത്രപരമായ സാംസ്കാരിക ഉന്നതിയുള്ള പേരിലേക്കുള്ള പ്രയാണം അഭിമാനകരമെന്ന് സി. സദാനന്ദന് മാസ്റ്റര് എംപി. രാജ്യസഭയില് കേരളം പുനര്നാമകരണം ബില്ലിനെ പിന്തുണച്ച് സംസാരിക്കുകയായിരുന്നു അദ്ദേഹം.
അനേകം നാളുകളായി കേരളത്തിലെ ജനങ്ങള് അങ്ങേയറ്റം ആവേശത്തോടെ ഈ മൂഹൂര്ത്തത്തിനായി കാത്തിരിക്കുകയായിരുന്നു. കേരള കേരളമായി മാറുമ്പോള് ഒരു വാക്കിന്റെ മാറ്റമായിട്ട് മാത്രം കാണാനാകില്ല. കേരളം സാംസ്കാരിക പാരമ്പര്യം പേറുന്ന പേരാണ്. കേരളത്തെ കേരളമാക്കിയ അനേകം അനേകം സാഹിത്യ നായകന്മാര്, സാംസ്കാരിക നായകന്മാര്, നവോത്ഥാന നായകന്മാര് തുടങ്ങിയവരാണ്. അയ്യാവൈകുണ്ഠ സ്വാമി, ശ്രീനാരായണഗുരു ദേവന്, മഹാത്മാ അയ്യങ്കാളി, ചട്ടമ്പി സ്വാമികള്, കുമാരനാശാന്, വക്കം അബ്ദുള് ഖാദര് മൗലവി തുടങ്ങി അനേകം പേര് അവരവരുടെ പ്രസംഗങ്ങളില് വാക്കുകളില് എന്റെ കേരളത്തെ, ഞങ്ങളുടെ കേരളത്തെ, നമ്മുടെ കേരളത്തെക്കുറിച്ച് അതി മനോഹരമായി പ്രതിപാദിച്ചിട്ടുണ്ട്. ആ പ്രതിപാദ്യത്തെ മുഴുവന് ആവിഷ്കരിച്ചാണ് പ്രധാനമന്ത്രി നരേന്ദ്ര മോദി ഈ ബില്ല് കൊണ്ടുവരാന് മുന്കൈ എടുത്തതെന്ന് കേരളം നന്ദിയോടെ ഓര്ക്കുന്നു.
വള്ളത്തോളിന്റെ ഭാരതമെന്ന പേര് കേട്ടാല് അഭിമാനപൂരിതമാകണം അന്തരംഗം, കേരളമെന്ന് കേട്ടാലോ തിളയ്ക്കണം ചോര നമുക്ക് ഞരമ്പുകളില്.. എന്ന വരികള് സദാനന്ദന് മാസ്റ്റര് ഉദ്ധരിച്ചു. കേരളമെന്ന പേര് കേള്ക്കുമ്പോള് ചോര തിളക്കേണ്ടത് ഭാരതമെന്ന പേര് കേള്ക്കുമ്പോള് ഉണ്ടാകുന്ന അഭിമാനത്തിന്റെ, ബലത്തിന്റെ അടിസ്ഥാനത്തില് ആയിരിക്കണം.
ഭാരതം എന്ന പേരിനോട് ഒട്ടുമേ പ്രതിബദ്ധതയില്ലാതെ പെരുമാറികൊണ്ട് കേരളമെന്ന് കേള്ക്കുമ്പോള് ചോരതിളച്ചത് കൊണ്ട് പ്രയോജനമില്ല. ആദിശങ്കരന് ആത്മബോധം ഉണര്ന്നുയര്ന്നൊരു കേരളം… എന്നു തുടങ്ങുന്ന ഗീതവും അദ്ദേഹം ഉദ്ധരിച്ചു.
