കൊച്ചി: മത്സ്യഭ്രൂണ കോശങ്ങളില്‍ നിന്ന് ദീര്‍ഘകാലം ലബോറട്ടറിയില്‍ വളര്‍ത്താനാകുന്ന സ്റ്റെം സെല്‍ സമാന കോശനിര വിജയകരമായി വികസിപ്പിച്ച് കൊച്ചി ശാസ്ത്ര സാങ്കേതിക സര്‍വകലാശാലയിലെ നാഷണല്‍ സെന്റര്‍ ഫോര്‍ അക്വാട്ടിക് അനിമല്‍ ഹെല്‍ത്ത് (എന്‍സിഎഎഎച്ച്) ശ്രദ്ധേയമായ നേട്ടം കൈവരിച്ചു.
കുസാറ്റ് എന്‍സിഎഎഎച്ച് അസി. പ്രൊഫസര്‍ ഡോ. ജയേഷ് പുതുമനയുടെ നേതൃത്വത്തില്‍ ഗവേഷക വിദ്യാര്‍ത്ഥിനിയായ അശ്വതി നടത്തിയ പഠനത്തിലാണ് ഈ നേട്ടം കൈവരിച്ചത്. ഗവേഷണഫലങ്ങള്‍ പ്രശസ്ത ശാസ്ത്രജേര്‍ണലായ ‘ഫിഷ് ഫിസിയോളജി ആന്‍ഡ് ബയോകെമിസ്ട്രിയില്‍’ പ്രസിദ്ധീകരണത്തിനായി അംഗീകരിക്കപ്പെട്ടിട്ടുണ്ട്. എടിഇഎസ് 1 എന്ന പേരില്‍ വികസിപ്പിച്ച കോശനിരയുടെ ഏറ്റവും വലിയ പ്രത്യേകത, മറ്റ് സഹായക കോശങ്ങളുടെ പിന്തുണയില്ലാതെ തന്നെ ദീര്‍ഘകാലം വളര്‍ത്താനാകുന്നതും സ്റ്റെം സെല്ലുകളുടെ പ്രധാന സ്വഭാവ സവിശേഷതകള്‍ നിലനിര്‍ത്തുന്നതുമാണ്. ഭാരതത്തില്‍ മത്സ്യങ്ങളില്‍ നിന്നുള്ള സ്റ്റെം സെല്‍ സമാന കോശനിര വികസിപ്പിക്കുന്ന ഗവേഷണങ്ങള്‍ വളരെ വിരളമായതിനാല്‍ ഈ നേട്ടം കൂടുതല്‍ പ്രാധാന്യമര്‍ഹിക്കുന്നു.
ഈ കോശനിര ഭാവിയില്‍ മത്സ്യരോഗങ്ങളെക്കുറിച്ചുള്ള പഠനങ്ങള്‍, രോഗപ്രതിരോധ സംവിധാനങ്ങളുടെ വിശകലനം, ജനിതക ഗവേഷണം, ജീന്‍ എഡിറ്റിങ്, പുതിയ ഔഷധങ്ങളുടെയും വാക്‌സിനുകളുടെയും പരിശോധന എന്നിവയ്‌ക്ക് വിലപ്പെട്ട ഗവേഷണ മാതൃകയായി ഉപയോഗിക്കാനാകുമെന്ന് ഡോ. ജയേഷ് പുതുമന അറിയിച്ചു. ലബോറട്ടറിയില്‍ വികസിപ്പിക്കുന്ന മത്സ്യമാംസ സാങ്കേതികവിദ്യയുമായി ബന്ധപ്പെട്ട ഗവേഷണങ്ങള്‍ക്കും ഇത് സഹായകമാകും.
ലിപോഫെക്ഷന്‍ സാങ്കേതികവിദ്യ ഉപയോഗിച്ചുള്ള വൈറസ്- രഹിത ട്രാന്‍സ്ജീന്‍ കൈമാറ്റത്തില്‍ ഈ കോശനിര ഉയര്‍ന്ന കാര്യക്ഷമത പ്രകടിപ്പിച്ചതായും പഠനം വ്യക്തമാക്കുന്നു. ഈ ഗവേഷണത്തിന് കേന്ദ്ര സര്‍ക്കാരിന്റെ ജൈവ സാങ്കേതികവിദ്യ വകുപ്പ് സാമ്പത്തിക സഹായം നല്‍കിയിരുന്നു. രാജ്യത്ത് മത്സ്യ ജൈവസാങ്കേതികവിദ്യാ മേഖലയിലെ അടിസ്ഥാന ഗവേഷണങ്ങള്‍ക്ക് പഠനം പുതിയ സാധ്യതകള്‍ തുറന്നിടുമെന്നാണ് ഗവേഷകസംഘത്തിന്റെ വിലയിരുത്തല്‍.
