കളമശ്ശേരി: കൊച്ചി ശാസ്ത്ര സാങ്കേതിക സര്വകലാശാല സ്കൂള് ഓഫ് എന്വയോണ്മെന്റല് സ്റ്റഡീസിലെ ഡോ. റിയ കെ. അലക്സും സ്കൂള് ഡയറക്ടര് പ്രൊഫ. ഡോ. സുജ പി. ദേവിപ്രിയയും ഡിഇഎസ്ഐജിഎന് ഫോര് ബയോഇ3 ചലഞ്ചിന്റെ കാറ്റഗറി 2ല് രാജ്യത്തെ മികച്ച ആറ് വിജയികളില് ഇടം നേടി.
കേന്ദ്രസര്ക്കാരിന്റെ ബയോടെക്നോളജി വകുപ്പ്, ബിറാക്ക്, ബ്രിക് എന്നിവയുടെ സഹകരണത്തോടെ ഭാരതത്തിലെ വൃത്തിയുള്ളതും സുസ്ഥിരവുമായ ജൈവസമ്പദ്വ്യവസ്ഥയെ ശക്തിപ്പെടുത്തുന്ന നൂതന ബയോടെക്നോളജി ആശയങ്ങളെ പ്രോത്സാഹിപ്പിക്കുന്നതിനായാണ് ഈ ദേശീയ ഇന്നൊവേഷന് ചലഞ്ച് സംഘടിപ്പിച്ചത്.
‘വേസ്റ്റ് ടു ബീഡ്: കണ്വേര്ട്ടിങ് അഗ്രികള്ച്ചറല് വേസ്റ്റ് ഇന്ടു സസ്റ്റെയ്നബിള് മൈക്രോബീഡ്സ് ടു റിപ്ലേസ് മൈക്രോപ്ലാസ്റ്റിക് പൊല്യൂഷന്’ എന്ന ഇവരുടെ ആശയമാണ് തെരഞ്ഞെടുക്കപ്പെട്ടത്. കാര്ഷിക മാലിന്യങ്ങളില് നിന്ന് ജൈവവിഘടനശേഷിയുള്ള മൈക്രോബീഡുകള് വികസിപ്പിച്ച് വ്യക്തിഗത പരിചരണ- സൗന്ദര്യവര്ധക ഉത്പന്നങ്ങളില് ഉപയോഗിക്കുന്ന പ്ലാസ്റ്റിക് മൈക്രോബീഡുകള്ക്ക് പരിസ്ഥിതി സൗഹൃദ ബദല് ഒരുക്കുന്നതാണ് പദ്ധതിയുടെ ലക്ഷ്യം.
