കൊച്ചി: വാഴപ്പിണ്ടി പോലുള്ള സമൃദ്ധമായ കാര്‍ഷിക അവശിഷ്ടങ്ങളില്‍ നിന്ന് ഉയര്‍ന്ന ശുദ്ധതയുള്ള സെല്ലുലോസ് പരിസ്ഥിതി സൗഹൃദ രീതിയില്‍ വേര്‍തിരിച്ചെടുക്കുന്നതിനുള്ള സാങ്കേതികവിദ്യ വികസിപ്പിച്ചതിന് കൊച്ചിന്‍ ശാസ്ത്ര സാങ്കേതിക സര്‍വകലാശാലക്ക് ഇന്ത്യന്‍ പേറ്റന്റ് (ഐഎന്‍ 596101) ലഭിച്ചു. കുസാറ്റിലെ ഇന്റര്‍ യൂണിവേഴ്‌സിറ്റി സെന്റര്‍ ഫോര്‍ ഐപിആര്‍ സ്റ്റഡീസിന്റെ (ഐയുസിഐപിആര്‍എസ്) ഐപിആര്‍ ഫെസിലിറ്റേഷന്‍ സെല്ലിന്റെ പിന്തുണയോടെയാണ് പേറ്റന്റ് നേടിയത്.
കുസാറ്റ് സ്‌കൂള്‍ ഓഫ് എന്‍വയോണ്‍മെന്റല്‍ സ്റ്റഡീസിലെ പ്രൊഫസറും ഡയറക്ടറുമായ ഡോ. സുജ പി. ദേവിപ്രിയയും ഗവേഷകയായ ഡോ. റിയ കെ. അലക്‌സും ചേര്‍ന്ന് നടത്തിയ ഗവേഷണത്തിന്റെ ഫലമായാണ് ഈ പേറ്റന്റ്.
ഡീപ് യൂട്ടെക്ടിക് സോള്‍വന്റുകളും ഒപ്റ്റിമൈസ് ചെയ്ത പ്രോസസിങ് രീതിയും ഉപയോഗിച്ച് പരമ്പരാഗതമായി ഉപയോഗിക്കുന്ന ശക്തമായ രാസവസ്തുക്കളുടെ ഉപയോഗം ഗണ്യമായി കുറച്ച് ഉയര്‍ന്ന ശുദ്ധതയുള്ള സെല്ലുലോസ് ഉത്പാദിപ്പിക്കാന്‍ ഈ സാങ്കേതികവിദ്യ സഹായിക്കുന്നു. സാധാരണയായി ഉപേക്ഷിക്കപ്പെടുന്ന കാര്‍ഷിക അവശിഷ്ടങ്ങള്‍ക്ക് മൂല്യവര്‍ധനവ് നല്‍കുന്നതിനൊപ്പം സെല്ലുലോസ് ഉത്പാദനത്തിന് സുസ്ഥിരമായ ഒരു മാര്‍ഗവും ഇത് മുന്നോട്ടുവയ്‌ക്കുന്നു.
ഈ രീതിയില്‍ ലഭിക്കുന്ന സെല്ലുലോസിന് പരിസ്ഥിതി സൗഹൃദ പാക്കേജിങ്, സൗന്ദര്യവര്‍ദ്ധക- വ്യക്തിഗത പരിചരണ ഉത്പന്നങ്ങള്‍, മറ്റ് ജൈവ അധിഷ്ഠിത വ്യവസായങ്ങള്‍ എന്നിവയില്‍ വ്യാപകമായ പ്രയോഗസാധ്യതയുണ്ട്.
