കൊച്ചി: ജെപിഎസ്‌സി, ബിപിഎസ്‌സി, കെപിഎസ്‌സി, പഞ്ചാബ് റിക്രൂട്ട്മെന്റ് പരീക്ഷകളിലെ ചോദ്യപേപ്പര്‍ ചോര്‍ച്ചക്കെതിരായ വിദ്യാര്‍ത്ഥി പ്രക്ഷോഭങ്ങള്‍ക്ക് എബിവിപി പൂര്‍ണ പിന്തുണ നല്‍കുമെന്ന് ദേശീയ ജനറല്‍ സെക്രട്ടറി ഡോ. വീരേന്ദ്ര സിങ് സോളങ്കി വാര്‍ത്താസമ്മേളനത്തില്‍ പറഞ്ഞു. പൊതുസമൂഹത്തിന്റെയും സംഘടനകളുടെയും പങ്കാളിത്തവും അദ്ദേഹം ആവശ്യപ്പെട്ടു. പരീക്ഷകളില്‍ സുതാര്യത ഉറപ്പാക്കാനുള്ള പോരാട്ടത്തില്‍ സാമൂഹിക-വിദ്യാര്‍ത്ഥി സംഘടനകളും വിദ്യാഭ്യാസ വിചക്ഷണരും ജനങ്ങളും പങ്കാളികളാകണമെന്നും എബിവിപി അഭ്യര്‍ത്ഥിച്ചു.
ഝാര്‍ഖണ്ഡ്, ബിഹാര്‍, കര്‍ണാടക പിഎസ്‌സി, പഞ്ചാബ് തുടങ്ങിയ വിവിധ സംസ്ഥാനങ്ങളിലെ മത്സരപരീക്ഷകളില്‍ ചോദ്യപേപ്പര്‍ തുടര്‍ച്ചയായി ചോരുന്നതില്‍ ആശങ്കയുണ്ട്. ഝാര്‍ഖണ്ഡില്‍ ചോദ്യപേപ്പര്‍ ചോര്‍ന്ന ഉടന്‍ ഗവര്‍ണര്‍ക്ക് നിവേദനം നല്‍കാനും, ജില്ലാ കേന്ദ്രങ്ങളില്‍ ഒപ്പുശേഖരണവും പ്രതിഷേധങ്ങളും നടത്താനും എബിവിപി മുന്‍കൈ എടുത്തു. പരീക്ഷാ തട്ടിപ്പുകള്‍ പൂര്‍ണമായി ഒഴിവാക്കാന്‍ ശക്തമായ മാറ്റങ്ങള്‍ ആവശ്യമാണ്. നീറ്റ് പരീക്ഷാ ക്രമക്കേടുകളെ തുടര്‍ന്ന് കേന്ദ്ര സര്‍ക്കാര്‍ രൂപീകരിച്ച ഉന്നതാധികാര സമിതിക്ക് മുന്നില്‍, കുറ്റമറ്റതും സുതാര്യവുമായ പരീക്ഷാസംവിധാനം
ഉറപ്പാക്കാനുള്ള സമഗ്ര നിര്‍ദേശങ്ങള്‍ എബിവിപി സമര്‍പ്പിക്കുമെന്നും സോളങ്കി പറഞ്ഞു.
വന്ദേമാതരത്തിന് നിയമപരിരക്ഷ നല്‍കിയ പാര്‍ലമെന്റ് തീരുമാനം ചരിത്രപരമാണ്. വന്ദേമാതരം കേവലം ഒരു ഗാനമല്ല, നമ്മുടെ സ്വാതന്ത്ര്യസമരത്തിന്റെയും ആത്മാഭിമാനത്തിന്റെയും പ്രതീകമാണ്. വിവിധ പ്രചാരണ പരിപാടികളിലൂടെ കാമ്പസുകളിലും സമൂഹത്തിലും ദേശഭക്തിയും ദേശീയ ഐക്യവും ഭരണഘടനാപരമായ കടമകളും എബിവിപി വളര്‍ത്തിയെടുക്കുമെന്നും അദ്ദേഹം അറിയിച്ചു.
യോഗം കേരളത്തില്‍ നടന്നതിനാല്‍ ഇവിടുത്തെ പ്രവര്‍ത്തനങ്ങള്‍ക്ക് സംഘടന പ്രത്യേക പ്രാധാന്യം നല്‍കും. വരും മാസങ്ങളില്‍, കേരളത്തിലെ വിദ്യാലയങ്ങളിലും കോളജുകളിലും ‘കാമ്പസ് ടു കാമ്പസ് വന്ദേമാതരം’, ‘സ്‌ക്രീന്‍ ടൈം ടു ആക്റ്റിവിറ്റി ടൈം’ പ്രചാരണങ്ങള്‍ കൂടുതല്‍ ശക്തമാക്കും.
ഇത് വിദ്യാര്‍ത്ഥികളെ ദേശഭക്തിയിലേക്കും കായിക-സൃഷ്ടിപരമായ കാമ്പസ് പ്രവര്‍ത്തനങ്ങളിലേക്കും നയിക്കും. കേന്ദ്ര പ്രവര്‍ത്തക സമിതി യോഗത്തിലെ തീരുമാനങ്ങള്‍ പൊതുജന പങ്കാളിത്തത്തോടെ ഓരോ എബിവിപി പ്രവര്‍ത്തകനും നടപ്പിലാക്കുമെന്നും, വിദ്യാര്‍ത്ഥി ശക്തിയെ രാഷ്‌ട്രശക്തിയാക്കി മാറ്റുമെന്ന് ഉറപ്പുണ്ടെന്നും അദ്ദേഹം അഭിപ്രായപ്പെട്ടു.
ദേശീയ സെക്രട്ടറി ശ്രാവണ്‍ ബി. രാജ്, സംസ്ഥാന സെക്രട്ടറി യദു കൃഷ്ണന്‍, ജോയിന്റ് സെക്രട്ടറി ആര്‍. അശ്വതി, ദേശീയ മീഡിയ കോ-കണ്‍വീനര്‍ അഭിനവ് മിശ്ര എന്നിവരും വാര്‍ത്താസമ്മേളനത്തില്‍ പങ്കെടുത്തു.
