ന്യൂദല്‍ഹി: സുപ്രീംകോടതിയിലെ ജഡ്ജിമാരുടെ എണ്ണം 38 ആയി വര്‍ധിപ്പിക്കുന്നതിനുള്ള ബില്‍ ലോക്സഭ പാസാക്കി. ശബ്ദവോട്ടോടെയാണ് ബില്‍ പാസാക്കിയത്. സുപ്രീംകോടതിയിലെ ജഡ്ജിമാരുടെ എണ്ണം 34ല്‍ നിന്ന് 38 ആയി ഉയര്‍ത്തിയ ഓര്‍ഡിനന്‍സിന് പകരമാണ് ഭേദഗതി ബില്‍. പ്രതിപക്ഷ ബഹളത്തിനിടെ ചര്‍ച്ചയില്ലാതെയാണ് ബില്‍ സഭ പാസാക്കിയത്.
കേന്ദ്ര നിയമമന്ത്രി അര്‍ജുന്‍ റാം മേഘ്വാളാണ് സുപ്രീംകോടതി ജഡ്ജിമാരുടെ എണ്ണം വര്‍ദ്ധിപ്പിക്കാനുള്ള ഭേദഗതി ബില്‍ അവതരിപ്പിച്ചത്. നീതിന്യായ മേഖലയിലെ പരിഷ്‌കരണ പ്രക്രിയയിലെ ഒരു പ്രധാന ചുവടുവെപ്പാണ് ബില്‍ എന്ന് മേഘ്വാള്‍ പറഞ്ഞു.
സുപ്രീംകോടതിയില്‍ കെട്ടിക്കിടക്കുന്ന കേസുകളുടെ എണ്ണം വര്‍ദ്ധിച്ചുവരുന്ന സാഹചര്യത്തില്‍ നീതിന്യായ വ്യവസ്ഥയെ കൂടുതല്‍ കാര്യക്ഷമവും ഫലപ്രദവുമാക്കുന്നതിനാണ് ബില്‍ കൊണ്ടുവരുന്നത്. ഈ നടപടി നീതിന്യായ ശേഷിയെ കൂടുതല്‍ ശക്തിപ്പെടുത്തും. കേസുകളുടെ ഫലപ്രദമായ തീര്‍പ്പാക്കല്‍ വേഗത്തിലാക്കുകയും പൗരന്മാര്‍ക്ക് സമയബന്ധിതമായ നീതി ഉറപ്പാക്കുന്നതില്‍ പ്രധാന നാഴികക്കല്ലായി മാറുമെന്നും അദ്ദേഹം പറഞ്ഞു.
ഇന്ത്യന്‍ സ്റ്റാറ്റിസ്റ്റിക്കല്‍ ഇന്‍സ്റ്റിറ്റ്യൂട്ട് ബില്‍ 2026, കേന്ദ്ര സ്റ്റാറ്റിസ്റ്റിക്സ്, പ്രോഗ്രാം ഇംപ്ലിമെന്റേഷന്‍ മന്ത്രാലയം സഹമന്ത്രി റാവു ഇന്ദര്‍ജിത് സിങ്ങും ബാങ്കേഴ്സ് ബുക്ക് എവിഡന്‍സ് ബില്‍ 2026 ധനമന്ത്രി നിര്‍മല സീതാരാമനും അവതരിപ്പിച്ചു.
സൂക്ഷ്മ, ചെറുകിട, ഇടത്തരം സംരംഭക വികസന ഭേദഗതി ബില്‍ രാജ്യസഭ പാസാക്കി. പ്രതിപക്ഷത്തിന്റെ പ്രതിഷേധത്തിനും ബഹളത്തിനും ഇടയിലാണ് ബില്‍ സഭ പാസാക്കിയത്. എംഎസ്എംഇ വകുപ്പ് മന്ത്രി ജിതന്‍ റാം മാഞ്ചിയാണ് ബില്‍ അവതരിപ്പിച്ചത്. കേന്ദ്ര ആഭ്യന്തരമന്ത്രി അമിത്ഷാ സഭയില്‍ ഇല്ലെന്ന് പറഞ്ഞാണ് പ്രതിപക്ഷം ഇന്നലെ ബഹളം വെച്ചത്. രാവിലെ സഭ ചേര്‍ന്നപ്പോള്‍ തന്നെ ഇരുസഭകളിലും പ്രതിപക്ഷം പതിവുപോലെ ബഹളം തുടങ്ങി. 12 മണിക്ക് ചേര്‍ന്നപ്പോഴും ബഹളമായി. തുടര്‍ന്ന് രണ്ട് മണിക്ക് വീണ്ടും ചേര്‍ന്നപ്പോള്‍ ബില്ലുകള്‍ പാസാക്കി ഇന്നേക്ക് പിരിഞ്ഞു.
