ഗാന്ധിനഗര്(കോട്ടയം): കോട്ടയം മെഡിക്കല് കോളേജ് ആശുപത്രിയില് ഇടതു വലതു മുന്നണികള് മത്സരിച്ച് അനധികൃത നിയമനം നടത്തിയതുമൂലം പാവപ്പെട്ട രോഗികള്ക്കു ലഭിക്കേണ്ട സൗജന്യ ചികിത്സയും ബന്ധപ്പെട്ട സഹായങ്ങളും അട്ടിമറിക്കപ്പെട്ടു.
അനധികൃതമായി നിയമനം നേടിയവര്ക്ക് ശമ്പളം നല്കാന് രോഗികള്ക്കു ലഭിക്കേണ്ട സൗജന്യ ചികിത്സാ പദ്ധതിയിലെ മുഴുവന് തുകയും പൂര്ണ്ണമായും വകമാറ്റി. ആശുപത്രി വികസന സൊസൈറ്റി(എച്ച്ഡിഎസ്) വഴി വിവിധ പരിശോധനകള്ക്കും വാഹന പാര്ക്കിങിനും മറ്റുമായി പിരിക്കുന്ന ലക്ഷക്കണക്കിനു രൂപയും വകമാറ്റിയിട്ടുണ്ട്. ഇതോടെ കോട്ടയം, ഇടുക്കി, പത്തനംതിട്ട, ആലപ്പുഴ, എറണാകുളം ജില്ലകളില് നിന്നുള്ള പാവപ്പെട്ട രോഗികളുടെ സൗജന്യ ചികിത്സയും അട്ടിമറിക്കപ്പെട്ടു. രണ്ടാം പിണറായി സര്ക്കാരിന്റെ കാലത്ത് താത്കാലിക കരാര് ജീവനക്കാരെന്ന പേരില് 720 അനധികൃത നിയമനങ്ങളാണ് നടത്തിയത്.
നിയമിക്കപ്പെട്ടവരെല്ലാം ഡിവൈഎഫ്ഐ ക്കാരോ ഇടതുപക്ഷ അനുഭാവികളോ ആയിരുന്നു. സര്ക്കാരിന്റെയോ ആരോഗ്യ വകുപ്പിന്റെയോ മുന്കൂര് അനുമതി തേടാതെയാണ് നിയമനങ്ങള് നടത്തിയത്. വി.ഡി. സതീശന് മന്ത്രിസഭ നിലവില് വന്ന ശേഷം ഇതുവരെ 54 പെയ്ഡ് നഴ്സുമാരെ ആശുപത്രിയുടെ മുന് അധികൃതര് നിയമിച്ചതായും ആരോപണമുണ്ട്.
അടിയന്തര സാഹചര്യങ്ങളില് പോലും താല്കാലിക നിയമനങ്ങള് നടത്തണമെങ്കില് ബന്ധപ്പെട്ട വകുപ്പിന്റെ അനുമതി നിര്ബന്ധമാണ്. ഇതു വകവെക്കാതെ സ്വന്തക്കാരെ കുത്തിനിറയ്ക്കുക എന്ന ഉദ്ദേശ്യത്തിലായിരുന്നു ഈ നിയമനങ്ങള്. ഇവര്ക്കു ശമ്പളം കൊടുക്കുന്നതിനായി രോഗികള്ക്കു ലഭിക്കേണ്ട സൗജന്യ ചികിത്സാ പദ്ധതിയിലെ മുഴുവന് തുകയും പൂര്ണ്ണമായും വകമാറ്റുകയായിരുന്നു.
എംപ്ലോയ്മെന്റ് എക്സ്ചേഞ്ചുകളെ നോക്കുകുത്തിയാക്കി
സര്ക്കാര് മേഖലയില് ഒഴിവുകള് വന്നാല് അക്കാര്യം എംപ്ലോയ്മെന്റ് എക്സ്ചേഞ്ചുകളില് റിപ്പോര്ട്ട് ചെയ്ത് ഉദ്യോഗാര്ത്ഥികളെ കണ്ടെത്തി നിയമിക്കണമെന്നതാണ് നടപടിക്രമം. എന്നാല് കോട്ടയം സര്ക്കാര് മെഡിക്കല് കോളേജ് ആശുപത്രിയില് ഇത്രയേറെ ഒഴിവുകള് ഉണ്ടായിട്ടും ഇവയൊന്നും റിപ്പോര്ട്ടു ചെയ്യുകയോ എംപ്ലോയ്മെന്റ് എക്സ്ചേഞ്ച് വഴി ഒരു നിയമനം പോലും നടത്തുകയോ ചെയ്തിട്ടില്ല. സാധാരണക്കാര്ക്കും പാവപ്പെട്ടവവര്ക്കും സൗജന്യവും കൃത്യവുമായി ചികിത്സ ലഭിക്കേണ്ട കോട്ടയം മെഡിക്കല് കോളേജ് ആശുപത്രിയെ രാഷ്ട്രീയക്കാരുടെ കറവപ്പശുവാക്കി മാറ്റിയിരിക്കുകയാണ്. ഇതിനിടയിലും ആത്മാര്ത്ഥതയും കഴിവുമുള്ള ഒരു സംഘം ഡോക്ടര്മാരുടെ സേവനമാണ് ഇവിടെയെത്തുന്ന രോഗികള്ക്ക് ആശ്വാസം പകരുന്നത്.
ജന്മഭൂമി ഓണ്ലൈന്