കൊച്ചി: ക്യാപ്റ്റന്‍ രാജുവിന്റെ കുടുംബത്തില്‍ നിന്നും മറ്റൊരു നടന്‍ കൂടി. ക്യാപ്റ്റന്റെ അനന്തരവന്‍ നിരഞ്ജന്‍ എബ്രഹാം, ഹരി നാരായണന്‍ സംവിധാനം ചെയ്യുന്ന ക്ലാക്ലാ ക്ലിക്ലി നസ്രിയ തിരിഞ്ഞു നോക്കി എന്ന ചിത്രത്തില്‍ പ്രധാന കഥാപാത്രത്തെ അവതരിപ്പിച്ചു ശ്രദ്ധേയനായിരുന്നു.
പോലീസ് ഓഫീസര്‍ ജയദേവന്‍ എന്ന കഥാപാത്രത്തെയാണ് ക്ലാക്ലാ ക്ലി ക്ലി നസ്രിയ തിരിഞ്ഞു നോക്കി എന്ന ചിത്രത്തില്‍ നിരഞ്ജന്‍ അവതരിപ്പിച്ചത്. ചിത്രത്തില്‍ കൂടുതല്‍ ശ്രദ്ധേയമായ കഥാപാത്രമായിരുന്നു ജയദേവന്‍. വിവാഹം ഉറപ്പിച്ചിരുന്ന ഒരു പെണ്‍കുട്ടി. അവള്‍ കാമുകനുമായി ഒരു സിനിമാ പഠന ക്യാമ്പില്‍ എത്തുന്നു. അവിടെ നിന്ന് പെണ്‍കുട്ടിയെ കാണാതാകുന്നു. ക്യാമ്പിലുണ്ടായിരുന്ന ജയദേവന്‍ ഇതിനെക്കുറിച്ച് അന്വേഷണം ആരംഭിക്കുന്നു. ചിത്രത്തില്‍ നിറഞ്ഞു നില്‍ക്കുന്ന ഈ കഥാപാത്രത്തെ നിരഞ്ജന്‍ എബ്രഹാം ഗംഭീരമാക്കി. അഭിനയ മോഹിയായ ജയദേവനായും, കര്‍ക്കശക്കാരനായ പോലീസ് ഓഫീസറായും വ്യത്യസ്തമായ ഭാവപ്രകടനങ്ങള്‍ കാഴ്ചവെച്ച നിരഞ്ജന്‍ കൂടുതല്‍ ശ്രദ്ധേയനായി.
വിനു മോഹന്‍ നായകനായ ഈ തിരക്കിന്‍ ഇടയില്‍, കൗശിക് ബാബു നായകനായ നാദബ്രഹ്‌മം, തീക്കുച്ചിയും പനിത്തുള്ളിയും തുടങ്ങിയ ചിത്രങ്ങളില്‍ പ്രധാന കഥാപാത്രങ്ങളെ അവതരിപ്പിച്ച നിരഞ്ജന്‍ എബ്രഹാം, നിരവധി ടിവി പരമ്പരകളിലും ടെലിഫിലിമുകളിലും ശ്രദ്ധേയമായ കഥാപാത്രങ്ങളെ അവതരിപ്പിച്ചിട്ടുണ്ട്.
മലയാള സിനിമയിലെ ആദ്യകാല നടി ജമീല മാലിക്, കൈലാസ് നാഥ് എന്നിവരുടെ കീഴില്‍ ഫിലിം ഇന്‍സ്റ്റിറ്റ്യൂട്ടില്‍ അഭിനയം അഭ്യസിച്ച നിരഞ്ജന്‍ എബ്രഹാം, ഇതിനോടകം മികച്ച നടനാണെന്ന് തെളിയിച്ചു കഴിഞ്ഞു. തുടര്‍ച്ചയായ കലാ പ്രവര്‍ത്തനത്തിലൂടെ മുന്നോട്ടു പോകുന്ന ഈ നടന്‍, ക്ലാക്ലാ ക്ലിക്ലി നസ്രിയ തിരിഞ്ഞു നോക്കി എന്ന ചിത്രത്തിന് ശേഷം, കൂടുതല്‍ ചിത്രങ്ങളില്‍, മികച്ച കഥാപാത്രങ്ങളുമായി എത്തുകയാണ്‌
