ഇടുക്കി : മഴ തുടരുന്ന സാഹചര്യത്തില് ഇടുക്കി ജില്ലയില് വിനോദസഞ്ചാരം നിരോധിച്ച് ജില്ലാ ഭരണകൂടം. ജില്ലയില് ചുവപ്പ്, ഓറഞ്ച് ജാഗ്രതകള് പിന്വലിക്കുന്നതുവരെ നിരോധനം തുടരും.
ഇടുക്കിയിലേക്ക് അത്യാവശ്യഘട്ടത്തില് അല്ലാതെ യാത്ര ചെയ്യരുത് എന്നും ജില്ലാ ഭരണകൂടം നിര്ദേശിച്ചു. മലയോരമേഖലയില് മണ്ണിടിച്ചില്- ഉരുള്പൊട്ടല് സാധ്യത നിലനില്ക്കുന്നതിനാല് രാത്രി യാത്രകളിലും നിയന്ത്രണം തുടരും.
കഴിഞ്ഞ ഒരു രാത്രി കൊണ്ടുളള ദുരിത പെയ്ത്തില് ഉരുള്പൊട്ടിയും മണ്ണിടിഞ്ഞും മലവെള്ളപ്പാച്ചിലിലും വ്യാപക നാശനഷ്ടമാണ് ജില്ലയില് ഉണ്ടായത്. കുടയത്തൂര് അടൂര്മലയില് സുമതി എന്ന വീട്ടമ്മയും വാഗമണ് കോലാഹലമേട് ബന്ധുവീട്ടില് എത്തിയ വയോധികന് വൈക്കം സ്വദേശി പ്രഭാകരനും മരിച്ചു. കൊട്ടാരക്കര- ദിണ്ടികല് ദേശീയപാതയില് പത്തു മണിക്കൂറില് അധികമാണ് മുണ്ടക്കയം മുതല് കുട്ടിക്കാനം വരെ ഗതാഗതം തടസപ്പെട്ടത്.
കൊട്ടാരക്കര -ദിണ്ടികല് ദേശീയപാതയില് കടുവപ്പാറയിലാണ് ആദ്യം ഉരുള്പൊട്ടിയത്. പിന്നീട് പുല്ലുപാറയില് ഉരുള്പൊട്ടി. മുണ്ടക്കയം മുതല് കുട്ടിക്കാനം വരെ 10 ഇടങ്ങളില് മണ്ണിടിഞ്ഞു. ഗതാഗതം പൂര്ണമായും തടസപ്പെട്ടു.
