ന്യൂദല്ഹി: ഭാരതത്തിന്റെ റയില്വേ ചരിത്രത്തില് പുതിയ അധ്യായത്തിലേക്കാണ് ഇന്നലെ സൂറത്തില് നിന്ന് തുടിക്കുന്ന ഹൃദയവും പേറി വന്ദേഭാരത് അഹമ്മദാബാദിലേക്ക് കുതിച്ചത്. അവയവദാനത്തിന് ട്രെയിനില് ഹൃദയമെത്തിച്ചതോടെ ആരോഗ്യ പരിരക്ഷാ രംഗത്ത് പുതിയ നാഴികക്കല്ല് സൃഷ്ടിക്കുകയായിരുന്നു റയില്വേ.
20901 മുംബൈ സെന്ട്രല്-ഗാന്ധിനഗര് വന്ദേ ഭാരത് എക്സ്പ്രസിലാണ് സൂറത്തില് നിന്ന് അഹമ്മദാബാദിലേക്ക് ഹൃദയം എത്തിച്ചത്. യു.എന്. മേഹ്ത ഇന്സ്റ്റിറ്റ്യൂട്ട് ഓഫ് കാര്ഡിയോളജി ആന്റ് റിസര്ച്ച് സെന്ററിലായിരുന്നു സ്വീകര്ത്താവ്. റെയില്വേ സംരക്ഷണ സേനയും ഗുജറാത്ത് പോലീസും ചേര്ന്ന് ഗ്രീന് ആശുപത്രിയിലേക്ക് ഗതാഗത സംവിധാനത്തിനായി കോറിഡോര് സജ്ജമാക്കി. അവയവമാറ്റ ശസ്ത്രക്രിയകള്ക്ക് സമയം ഏറെ നിര്ണായകമായതിനാല് ഭാരത റെയില്വേയും റെയില്വേ സംരക്ഷണ സേനയും ഗുജറാത്ത് പോലീസും മെഡിക്കല് സംഘങ്ങളും തമ്മില് കൃത്യമായ ആസൂത്രണവും ഏകോപനവും നടത്തി. ദാതാവിന്റെ ഹൃദയം നിശ്ചിത സമയത്തിനകം സ്വീകര്ത്താവിന്റെ ആശുപത്രിയില് എത്തുന്നത് ഉറപ്പാക്കാന് ഗതാഗതത്തിന്റെ ഓരോ ഘട്ടവും റയില്വേ സൂക്ഷ്മമായി ഏകോപിപ്പിക്കുകയും ചെയ്തു. ഭാരത റെയില്വേക്ക് വളരെയധികം അഭിമാനത്തിന്റെയും സംതൃപ്തിയുടെയും നിമിഷമാണെന്ന് അഹമ്മദാബാദ് ഡിവിഷണല് റെയില്വേ മാനേജര് വേദ് പ്രകാശ് പറഞ്ഞു. ഒരു മനുഷ്യ ജീവന് രക്ഷിക്കുന്നതിന് ഭാഗമാകുക എന്നത് കടമ കൂടിയാണെന്നും അദ്ദേഹം പറഞ്ഞു.
ദൗത്യം വിജയകരമാക്കാന് പ്രവര്ത്തിച്ച റെയില്വേ സംരക്ഷണ സേന, ഗുജറാത്ത് പോലീസ്, ഡോക്ടര്മാര്, അവയവമാറ്റ ശസ്ത്രക്രിയ ഏകോപിപ്പിച്ചവര്, റെയില്വേ ഉദ്യോഗസ്ഥര് എന്നിവരടക്കം എല്ലാവര്ക്കും റെയില്വേ നന്ദി അറിയിച്ചു. കേരളത്തില് ഇതിന് സമാനമായി ഏപ്രിലില് തിരുവനന്തപുരത്തുനിന്ന് വന്ദേഭാരത് എക്സ്പ്രസില് വൃക്ക കോഴിക്കോട് എത്തിച്ചിരുന്നു. അവിടെ നിന്ന് കോഴിക്കോട് ഗവ. മെഡിക്കല് കോളജ് ആശുപത്രിയില് എത്തിച്ച വൃക്ക രോഗിക്ക് മാറ്റിവെക്കുകയും ചെയ്തിരുന്നു. ഭാരതത്തില് ആദ്യമായാണ് ഹൃദയം വന്ദേഭാരതിലൂടെ എത്തിക്കുന്നത്.
