തൃശ്ശൂർ: നീങ്ങിത്തുടങ്ങിയ ട്രെയിനിൽ കയറാൻ ശ്രമിക്കുന്നതിനിടെ കാൽ വഴുതി പ്ലാറ്റ്ഫോമിനും ട്രെയിനിനും ഇടയിലേക്ക് വീണ യുവതിയെ സമയോചിതമായി പിടിച്ച് വലിച്ച് രക്ഷപ്പെടുത്തി റെയിൽവേ പൊലീസ്. തൃശ്ശൂർ റെയിൽവേ സ്റ്റേഷനിൽ നടന്ന സംഭവത്തിന്റെ ഞെട്ടിക്കുന്ന സി.സി.ടി.വി ദൃശ്യങ്ങൾ പുറത്തുവന്നു.
സെക്കന്ദരാബാദിൽ നിന്നും തിരുവനന്തപുരത്തേക്ക് പോവുകയായിരുന്ന ശബരി എക്സ്പ്രസിലാണ് അപകടമുണ്ടായത്. സ്റ്റേഷനിൽ നിന്നും ട്രെയിൻ എടുത്തതിന് തൊട്ടുപിന്നാലെ ഓടിക്കയറാൻ ശ്രമിച്ച യുവതിയുടെ ബാലൻസ് തെറ്റുകയായിരുന്നു. ഡ്യൂട്ടിയിലുണ്ടായിരുന്ന റെയിൽവേ പൊലീസ് സി.പി.ഒ വിനോദ്, ആർ.പി.എഫ് (RPF) ഉദ്യോഗസ്ഥൻ സന്തോഷ് എന്നിവർ നിമിഷനേരം കൊണ്ട് ഓടിയെത്തുകയായിരുന്നു.
