തിരുവനന്തപുരം: ശബരിമലയിലെ നെയ്യ് മറിച്ചു വിറ്റ സംഭവത്തില്‍ അന്വേഷണ ഉത്തരവിറങ്ങി. ദേവസ്വം സെക്രട്ടറിക്കാണ് അന്വേഷണ ചുമതല. ശബരിമലയിലേക്ക് മില്‍മ ഗുണമേന്മ കുറഞ്ഞ നെയ് വിതരണം ചെയ്‌തെന്നാണ് ക്ഷീര വകുപ്പിന്റെ കണ്ടെത്തല്‍. ഇക്കാര്യത്തില്‍ ദേവസ്വം വകുപ്പിന് വീഴ്ചയുണ്ടോയെന്ന് പരിശോധിക്കാനും അടിയന്തര നിയമ നടപടി വേണമോ എന്ന് അറിയിക്കാനുമാണ് മന്ത്രി കെ മുരളീധരന്റെ നിര്‍ദ്ദേശം. ഗുണമേന്മ കുറഞ്ഞ നെയ് ശബരിമലയില്‍ വിതരണം ചെയ്തിട്ടുണ്ടോ എന്ന് അന്വേഷിക്കണമെന്നും നിര്‍ദേശമുണ്ട്.
ശബരിമലയില്‍ എത്തിച്ച നെയ്യിന്റെ കണക്കുകള്‍ പരിശോധിക്കണം, എത്തിച്ച നെയ്യിന്റെ ഗുണമേന്മ ദേവസ്വം ഉറപ്പാക്കിയിരുന്നോ എന്ന് കണ്ടെത്തണം, ദേവസ്വം ബോര്‍ഡ് ഉദ്യോഗസ്ഥര്‍ക്ക് വീഴ്ച ഉണ്ടോയെന്നു പരിശോധിക്കണം, വരും കാലങ്ങളില്‍ നെയ്യ് വാങ്ങുന്നതില്‍ സുതാര്യത ഉറപ്പിക്കാന്‍ സംവിധാനം വേണം. ഈ കാര്യങ്ങള്‍ പരിശോധിച്ച് റിപ്പോര്‍ട്ട് സമര്‍പ്പിക്കാനാണ് ദേവസ്വം സെക്രട്ടറിക്ക് നിര്‍ദേശം.
മില്‍മയില്‍ കഴിഞ്ഞ സര്‍ക്കാരിന്റെ ഭരണകാലത്ത് ഉണ്ടായത് ഗുരുതരമായ അഴിമതി എന്നാണ് കണ്ടെത്തല്‍. ശബരിമലയിലേക്ക് നെയ്യ് കൊടുത്തതിലും ആന്ധ്രയില്‍ നിന്ന് പാല്‍ ഇറക്കുമതി ചെയ്തതിലും അഴിമതി നടന്നെന്നാണ് വിവരം. ശബരിമലയിലേക്ക് എത്തിച്ച നെയ്യ് തിരിമറി നടത്തി ഗുണനിലവാരം ഇല്ലാത്ത നെയ്യ് നല്‍കിയതില്‍ ദേവസ്വം ബോര്‍ഡ് ഉദ്യോഗസ്ഥര്‍ക്ക് പങ്കുണ്ടെന്നാണ് അറിവ്.
