തിരുവനന്തപുരം: കേരളത്തില്‍ പട്ടികജാതി ക്ഷേമഫണ്ടുകള്‍ വ്യാപകമായി വകമാറ്റി ചെലവഴിക്കുകയും വെട്ടിക്കുറയ്‌ക്കുകയും പാഴാക്കുകയും ചെയ്യുന്നുവെന്ന് വി. മുരളീധരന്‍ എംഎല്‍എ. പട്ടികജാതി മോര്‍ച്ച സെക്രട്ടറിയേറ്റിലേക്ക് നടത്തിയ പ്രതിഷേധ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം. ബജറ്റില്‍ വകയിരുത്തിയ ശേഷമാണ് ഫണ്ടുകള്‍ വെട്ടിക്കുറയ്‌ക്കുന്നത്. ബജറ്റില്‍ പ്രഖ്യാപിക്കുന്ന ലംപ്‌സം ഗ്രാന്റ് തുക സാമ്പത്തിക വര്‍ഷം അവസാനിക്കുമ്പോള്‍ പാഴായി പോകുന്ന അവസ്ഥയാണ് കേരളത്തിലുള്ളത്. പട്ടികജാതി ക്ഷേമഫണ്ടുകളുടെ ദുരുപയോഗവും പാഴാക്കുന്നതും തടയാന്‍ സംസ്ഥാന സര്‍ക്കാര്‍ കര്‍ശന നിയമം കൊണ്ടുവരണമെന്നും അദ്ദേഹം ആവശ്യപ്പെട്ടു.
സര്‍ക്കാര്‍ മേഖലയില്‍ ഇപ്പോഴും അയിത്തം നിലനില്‍ക്കുകയാണ്. അംബേദ്കര്‍ ഗ്രാമപദ്ധതി (ഉന്നതി നവീകരണ പദ്ധതി) നടപ്പിലാക്കിയതില്‍ വ്യാപക അഴിമതിയും ക്രമക്കേടുമുണ്ട് പദ്ധതിയുടെ നടത്തിപ്പ് തന്നെ അവതാളത്തിലാണ്. കോളനികളുടെ പേര് ഉന്നതിയെന്ന് മാറ്റിയതുകൊണ്ട് ഔന്നത്യം ഉണ്ടാവുകയില്ല. അവിടത്തെ മനുഷ്യരുടെ ജീവിതനിലവാരം മെച്ചപ്പെടുത്താന്‍ വേണ്ടിയുള്ള കാര്യപദ്ധതികള്‍ നടപ്പിലാക്കുകയാണ് വേണ്ടത്. പുതിയ സര്‍ക്കാര്‍ തങ്ങളുടെ പട്ടികജാതി നയം പ്രഖ്യാപിക്കണമെന്നും വി. മുരളീധരന്‍ ആവശ്യപ്പെട്ടു.
ബിജെപി സംസ്ഥാന വൈസ് പ്രസിഡന്റ് അഡ്വ. പി. സുധീര്‍, എസ്‌സി മോര്‍ച്ച സംസ്ഥാന ജനറല്‍ സെക്രട്ടറി അഡ്വ. സ്വപ്‌നജിത്ത് എസ്.എസ്. എന്നിവര്‍ സംസാരിച്ചു. മോര്‍ച്ച ജില്ലാ പ്രസിഡന്റുമാരായ കരിക്കകം അനീഷ്, മോഹന്‍ റോയ്, ശിവപ്രസാദ് എന്നിവര്‍ നേതൃത്വം നല്‍കി.
