തിരുവനന്തപുരം: അധഃസ്ഥിതരോടുള്ള അയിത്തം ഇവിടെ ഇപ്പോഴും നിലനില്‍ക്കുന്നതായും അതിന് ഉദാഹരണമാണ് സെക്രട്ടറിയേറ്റ് ദര്‍ബാര്‍ ഹാളില്‍ പട്ടികജാതി, പട്ടികവര്‍ഗക്കാരായ രാഷ്ട്രപതിമാരുടെ ചിത്രങ്ങള്‍ വയ്‌ക്കാത്തതിന് പിന്നിലുള്ളതെന്നും വി. മുരളീധരന്‍ എംഎല്‍എ.
സംസ്ഥാന സര്‍ക്കാരിന്റെ പട്ടികജാതി ജനദ്രോഹ നയങ്ങള്‍ക്കെതിരെ ബിജെപി പട്ടികജാതി മോര്‍ച്ചയുടെ നേതൃത്വത്തില്‍ നടന്ന സെക്രട്ടറിയേറ്റ് മാര്‍ച്ചില്‍ സംസാരിക്കുകയായിരുന്നു അദ്ദേഹം.
പ്രണബ് കുമാര്‍ മുഖര്‍ജി രാഷ്‌ട്രപതി സ്ഥാനം ഒഴിഞ്ഞ് പട്ടികജാതിക്കാരനായ രാംനാഥ് കോവിന്ദ് വന്നപ്പോള്‍ അന്നത്തെ ഇടതുപക്ഷ സര്‍ക്കാര്‍ അദ്ദേഹത്തിന്റെ ചിത്രം വച്ചില്ല. അദ്ദേഹത്തിന്റെ ചിത്രം വയ്‌ക്കില്ലെന്നാണ് അന്നത്തെ സര്‍ക്കാരിന്റെ നിലപാട്.
വലിയ പുരോഗമനം പറയുന്ന ഇടതുപക്ഷക്കാരുടെ സര്‍ക്കാരാണ് പട്ടികജാതിക്കാരനായ ഒരു രാഷ്‌ട്രപതിയുടെ ഫോട്ടോ വയ്‌ക്കണ്ടായെന്ന് തീരുമാനച്ചത്. രാഷ്‌ട്രപതിയുടെ ഫോട്ടോ ഇരുന്ന സ്ഥലം ഇന്നും ഒഴിഞ്ഞുകിടക്കുകയാണ്. പട്ടികജാതിക്കാരനായ രാഷ്‌ട്രപതി സ്ഥാനം ഒഴിഞ്ഞ് പട്ടികവര്‍ഗത്തില്‍ നിന്നുള്ള രാഷ്‌ട്രപതിയായ ദ്രൗപദി മുര്‍മു വന്നിട്ടും അവരുടെ ഫോട്ടോ വയ്‌ക്കാനും ഇടത് സര്‍ക്കാര്‍ തയാറായില്ല.
പട്ടികജാതി, പട്ടികവര്‍ഗക്കാരായ രാഷ്ട്രപതിമാരുടെ ചിത്രത്തിന് അയിത്തം കല്‍പ്പിക്കുകയായിരുന്നു ഇടത് സര്‍ക്കാര്‍. പ്രഥമ പൗരന്റെ ഫോട്ടോ വയ്‌ക്കുന്ന സ്ഥലം ഇന്നും ഒഴിഞ്ഞു കിടക്കുകയാണ്. ആ നയത്തില്‍ പുതിയ സര്‍ക്കാര്‍ വന്നിട്ടും മാറ്റം വന്നിട്ടില്ലെന്നും അദ്ദേഹം പറഞ്ഞു.
