മയാമി: ഒടുവില് ആ ഗോളിന് വിശേഷപദവിയും. ഇക്കഴിഞ്ഞ ലോകകപ്പിലെ ഏറ്റവും മികച്ച ഗോള് അതുതന്നെ. അന്ന് എല്ലാവരും അദ്ഭുതം കൊണ്ട അതേ ഗോള്. ചാമ്പ്യന്മാരെന്ന പെരുമയുമായി വന്ന അര്ജന്റീനയ്ക്കെതിരേ ലോകകപ്പില് ആദ്യമായി കളിക്കാനെത്തിയ കേപ് വെര്ദെ താരം സിഡ്നി ലോപ്പസ് കബ്രാള് മയാമിയില് നേടിയ മിന്നും ഗോളാണ് ലോകകപ്പിലെ ഏറ്റവും മികച്ച ഗോളായി തെരഞ്ഞെടുക്കപ്പെട്ടത്.
നോക്കൗട്ടില്, റൗണ്ട് ഓഫ് 32ലെ പോരാട്ടത്തിലായിരുന്നു ഗോള് പിറന്നത്. വോട്ടെടുപ്പിലൂടെ ആരാധകരാണ് ഈ ഗോളിനെ മികച്ചതാക്കിയത്. മത്സരത്തിന്റെ അധികസമയത്ത് അര്ജന്റൈന് താരം അലെക്സിസ് മക് അലിസ്റ്ററെ മനോഹരമായി വെട്ടിച്ച് ഇടതുവിങ്ങിലൂടെ മുന്നേറിയ കബ്രാള്, ബോക്സിനകത്തുനിന്ന് ഒരു കര്വിങ് ഷോട്ടിലൂടെ അര്ജന്റൈന് ഗോള്കീപ്പര് എമിലിയാനോ മാര്ട്ടിനസിനെ കാഴ്ചക്കാരനാക്കി പന്ത് വലിയിലാക്കുകയായിരുന്നു. ഈ ഗോളോടെ മത്സരം 2-2 സമനിലയിലായി, എന്നാല്, ഒടുവില് 3-2ന് അര്ജന്റീന ജയിക്കുകയായിരുന്നു. ഉസ്ബെക്കിസ്ഥൈാന്റെ എല്ദോര് ഷോമുറോഡോവ്, ഹെയ്തിയുടെ വില്സണ് ഇസിഡോര് എന്നിവരുടെ ഗോളുകളെ പിന്തള്ളിയാണ് 23-കാരനായ കബ്രാള് പുരസ്കാരം സ്വന്തമാക്കിയത്. ഇതോടെ മാക്സി റോഡ്രിഗസ്, ഡീഗോ ഫോര്ലാന്, ജെയിംസ് റോഡ്രിഗസ്, ബെഞ്ചമിന് പവാര്ഡ്, റിച്ചാര്ലിസണ് എന്നീ താരങ്ങളുടെ നിരയിലേക്ക് കബ്രാളുമെത്തി.
