മൂവാറ്റുപുഴ: മുന്‍ ഗതാഗത മന്ത്രി കെ.ബി. ഗണേഷ് കുമാറിനെതിരായ അഴിമതി ആരോപണത്തില്‍ എന്തൊക്കെ നടപടികള്‍ സ്വീകരിച്ചുവെന്ന് വ്യക്തമാക്കാന്‍ വിജിലന്‍സ് ഡയറക്ടര്‍ക്ക് മൂവാറ്റുപുഴ വിജിലന്‍സ് കോടതിയുടെ നിര്‍ദേശം. റിപ്പോര്‍ട്ട് അടുത്ത മാസം 20നകം സമര്‍പ്പിക്കാന്‍ കോടതി നിര്‍ദേശിച്ചു.
ഗണേഷ് കുമാര്‍ മന്ത്രിയായിരിക്കെ തന്റെ ഔദ്യോഗിക പദവി ദുരുപയോഗം ചെയ്ത് ഭാര്യ ബിന്ദു മേനോന്റെ ഉടമസ്ഥതയിലുള്ള സ്വകാര്യ സ്ഥാപനത്തിന് വഴിവിട്ട് സഹായം നല്‍കിയെന്ന പരാതിയിലാണ് കോടതി ഇടപെടല്‍. കൊച്ചി കടവന്ത്ര സ്വദേശി ചെഷയര്‍ ടാര്‍സനാണ് വിജിലന്‍സ് കോടതിയെ സമീപിച്ചത്. കേരഫെഡിന്റെ വെളിച്ചെണ്ണ ദുബായിലേക്ക് കയറ്റുമതി ചെയ്യുന്നതിനും, മില്‍മ ഉത്പന്നങ്ങള്‍ ഓസ്ട്രേലിയ, ന്യൂസിലാന്‍ഡ് എന്നിവിടങ്ങളില്‍ വിപണനം നടത്തുന്നതിനുമുള്ള കരാറുകള്‍ മാനദണ്ഡങ്ങള്‍ പാലിക്കാതെ നല്‍കിയെന്നാണ് ഹര്‍ജിയിലെ പ്രധാന ആരോപണം. മത്സര ടെന്‍ഡര്‍ ക്ഷണിക്കാതെയാണ് കരാറുകള്‍ മുന്‍ മന്ത്രിയുടെ ഭാര്യയുടെ സ്ഥാപനത്തിന് കൈമാറിയത്. 10 ലക്ഷം രൂപയ്‌ക്ക് മുകളിലുള്ള കരാറുകള്‍ക്ക് തുറന്ന ടെന്‍ഡര്‍ നടപടികള്‍ വേണമെന്ന ‘കേരള ഫിനാന്‍ഷ്യല്‍ കോഡി’ന്റെ നഗ്നമായ ലംഘനമാണ് ഇവിടെ നടന്നിട്ടുള്ളതെന്ന് ഹര്‍ജിയില്‍ ചൂണ്ടിക്കാട്ടുന്നു.
വിവരവകാശ നിയമപ്രകാരം ലഭിച്ച രേഖകള്‍ അനുസരിച്ച് 2025 ജനുവരി മുതല്‍ മാര്‍ച്ച് വരെ ഏകദേശം 6 ടണ്‍ വെളിച്ചെണ്ണയും, 2025 നവംബറില്‍ 20 ടണ്‍ വെളിച്ചെണ്ണയും ഇത്തരത്തില്‍ ദുബായിലേക്ക് കയറ്റുമതി ചെയ്തിട്ടുണ്ട്.
നേരത്തെ ഇതേ വിഷയത്തില്‍ പരാതിക്കാരന്‍ വിജിലന്‍സ് ഡയറക്ടര്‍ക്ക് നേരിട്ട് പരാതി നല്‍കിയിരുന്നെങ്കിലും തുടര്‍നടപടികള്‍ ഉണ്ടാകാത്തതിനെ തുടര്‍ന്നാണ് വിജിലന്‍സ് കോടതിയെ സമീപിച്ചത്. വാദിഭാഗത്തിനായി അഡ്വ. എന്‍. രമേശ് ഹാജരായി. മില്‍മയുടെയും കേരഫെഡിന്റെയും വിദേശ വിപണന അവകാശങ്ങള്‍ യാതൊരുവിധ നടപടിക്രമങ്ങളും പാലിക്കാതെ ബിന്ദു മേനോന്റെ ഉടമസ്ഥതയിലുള്ള ‘മിഡ്നൈറ്റ് സണ്‍ ഗ്ലോബല്‍’ എന്ന സ്വകാര്യ സ്ഥാപനത്തിന് നല്‍കി എന്ന പരാതിയിലാണ് ഉത്തരവ്. ഹര്‍ജി 20ന് കോടതി വീണ്ടും പരിഗണിക്കും.
