ന്യൂദല്ഹി: യുവാക്കള് വെര്ച്വല് ഇടപെടലുകള്ക്കപ്പുറം ഗ്രാമങ്ങളിലെത്തി രാജ്യത്തിന്റെ യാഥാര്ത്ഥ്യങ്ങള് മനസിലാക്കണമെന്ന് പ്രധാനമന്ത്രി നരേന്ദ്ര മോദി.
യുവാക്കള് അതിര്ത്തി ഗ്രാമങ്ങളെക്കുറിച്ച് കൂടുതല് ആഴത്തില് മനസിലാക്കുന്തോറും രാഷ്ട്രം കൂടുതല് ശക്തമാകും. 2026 ലെ വികസിത് വൈബ്രന്റ് വില്ലേജ് പരിപാടിയില് പങ്കെടുക്കുന്നവരുമായി സംവദിക്കുകയായിരുന്നു അദ്ദേഹം. യുവതലമുറയില് രാജ്യത്തിന് അചഞ്ചലമായ ആത്മവിശ്വാസമുണ്ട്. 21-ാം നൂറ്റാണ്ടിനെ രൂപപ്പെടുത്തുന്നതിന്റെ യഥാര്ത്ഥ ഭാഗധേയം യുവാക്കളുടേതാണ്. വെല്ലുവിളികളും പരിഹാരങ്ങളുമായി യുവശക്തി നേരിട്ട് ബന്ധപ്പെടുമ്പോള് രാജ്യത്തിന്റെ ഭാവി കൂടുതല് ശോഭനമാകുമെന്നും ഭാരതത്തിന്റെ യുവ സുഹൃത്തുക്കള് രാജ്യമെമ്പാടും അസാധാരണമായി പ്രശംസനീയമായ പ്രവര്ത്തനങ്ങള് ചെയ്യുന്നുണ്ടെന്നും അദ്ദേഹം പറഞ്ഞു.
പ്രാദേശിക സംസ്കാരവും ഉല്പ്പന്നങ്ങളും പ്രോത്സാഹിപ്പിക്കണമെന്നും ഭാവിയിലെ കുടുംബ യാത്രകള് ആസൂത്രണം ചെയ്യണമെന്നും വികസിത് വൈബ്രന്റ് വില്ലേജ് പരിപാടിയില് ഭാഗമായവരോട് അദ്ദേഹം നിര്ദേശിച്ചു. ഓരോ യുവ സുഹൃത്തും അതിര്ത്തി ഗ്രാമങ്ങളിലെ യാത്രകളുടെ അനുഭവങ്ങള് കുറഞ്ഞത് നൂറ് യുവാക്കളുമായി പങ്കിടണമെന്നും പ്രധാനമന്ത്രി അഭ്യര്ത്ഥിച്ചു.
