ന്യൂദല്ഹി : പരീക്ഷാ ക്രമക്കേടുകള് ഇല്ലാതാക്കാനും പ്രശ്ന പരിഹാരത്തിനുമായി ഹൈപവര് ടാസ്ക് ഫോഴ്സുണ്ടാക്കുമെന്ന് പ്രധാനമന്ത്രി നരേന്ദ്രമോദി.ഇന്ഫോസിസ് സഹ സ്ഥാപകനായ നന്ദന് നിലേകനിയുടെ നേതൃത്വത്തില് ആണ് ഹൈപവര് ടാസ്ക് ഫോഴ്സ്. പരീക്ഷാ പരിഷ്കരണമാകും പ്രധാന ലക്ഷ്യം. ഇവരുടെ റിപ്പോര്ട്ടിന്റെ അടിസ്ഥാനത്തില് കേന്ദ്രസര്ക്കാര് തുടര് നടപടികള് സ്വീകരിക്കുമെന്നും പ്രധാനമന്ത്രി കൂട്ടിച്ചേര്ത്തു.സാമൂഹ്യമാധ്യമത്തിലൂടെയാണ് പ്രതികരണവുമായി പ്രധാനമന്ത്രി രംഗത്തു വന്നത്.
രാജ്യത്തെ പരീക്ഷാ നടത്തിപ്പില് സത്യസന്ധതയും സുതാര്യതയും ഉറപ്പാക്കുമെന്ന് പ്രധാനമന്ത്രി പറഞ്ഞു.എന്ടിഎ പരീക്ഷകള് ഉടച്ചു വാര്ക്കാന് ആറംഗ ടാസ്ക് ഫോഴ്സില് ഐഎസ്ആര്ഒ മുന് ചെയര്മാന് എസ് സോമനാഥും ഉള്പ്പെടുന്നുണ്ട്.രാജ്യത്തെ പരീക്ഷാ സംവിധാനം കൂടുതല് വിശ്വസനീയവും സുതാര്യവും സാങ്കേതിക വിദ്യയിലധിഷ്ഠിതവുമാക്കുന്നതിനായാണ് നീക്കം. വിദ്യാര്ത്ഥികളെ അഭിസംബോധന ചെയ്തുകൊണ്ട് നല്കിയ വീഡിയോ സന്ദേശത്തിലാണ് പ്രധാനമന്ത്രി ഈ പ്രധാന തീരുമാനം അറിയിച്ചത്. ക്രമക്കേടുകളില് പങ്കാളികളായവരെ ജയിലിലടച്ചിട്ടുണ്ടെന്നും വേഗത്തിലുള്ള വിചാരണയ്ക്കായി അതിവേഗ കോടതികള് സ്ഥാപിച്ചിട്ടുണ്ടെന്നും അദ്ദേഹം വ്യക്തമാക്കി. ഇതിനുപുറമെ, പരീക്ഷാ തട്ടിപ്പുകള് തടയുന്നതിന് കര്ശന വ്യവസ്ഥകളടങ്ങിയ പുതിയ നിയമനിര്മ്മാണങ്ങളിലേക്ക് പാര്ലമെന്റ് കടക്കുകയാണെന്നും പ്രധാനമന്ത്രി വെളിപ്പെടുത്തി.
ചോദ്യപേപ്പര് ചോര്ച്ചയും സംഘടിത പരീക്ഷാ തട്ടിപ്പുകളും തടയുന്നതിനായി ‘പബ്ലിക് എക്സാമിനേഷന്സ് (പ്രിവന്ഷന് ഓഫ് അണ്ഫെയര് മീന്സ്) ആക്റ്റില്’ ഭേദഗതികള് വരുത്താനും സര്ക്കാര് നിര്ദ്ദേശിച്ചിട്ടുണ്ട്. നിര്ദ്ദിഷ്ട സമയത്തിനുള്ളില് അന്വേഷണം പൂര്ത്തിയാക്കല്, വേഗത്തിലുള്ള വിചാരണ, കടുത്ത ശിക്ഷാനടപടികള് എന്നിവ ഇതിലൂടെ ഉറപ്പാക്കും. രാജ്യത്തുടനീളമുള്ള പൊതുപരീക്ഷകളുടെ സുതാര്യതയും വിശ്വാസ്യതയും വര്ദ്ധിപ്പിക്കുന്നതിന് സാങ്കേതികവിദ്യയുടെ ഉപയോഗവും ഘടനാപരമായ പരിഷ്കാരങ്ങളും നിര്ദ്ദേശിക്കുക എന്നതായിരിക്കും നന്ദന് നിലേക്കനി സമിതിയുടെ പ്രധാന ചുമതല.
