കണ്ണൂര് : അഞ്ചരക്കണ്ടി ഡെന്റല് കോളജ് വിദ്യാര്ത്ഥി നിതിന്രാജിന്റെ മരണവുമായി ബന്ധപ്പെട്ട കേസില് ഓറല് പാത്തോളജി വിഭാഗം മേധാവിയായിരുന്ന ഡോ. എം.കെ. റാം കണ്ണൂര് ക്രൈംബ്രാഞ്ച് ഓഫീസിലെത്തി കീഴടങ്ങി. അറസ്റ്റ് ചെയ്യാന് ക്രൈംബ്രാഞ്ച് നല്കിയ അപേക്ഷ കോടതിയുടെ പരിഗണനയിലിരിക്കെയാണ് കീഴടങ്ങിയത്.
കഴിഞ്ഞ ദിവസം കര്ണാടകയില് നിന്ന് റാമിനെ കസ്റ്റഡിയിലെടുത്തിരുന്നെങ്കിലും, സുപ്രീം കോടതി നിര്ദേശിച്ച മാനദണ്ഡങ്ങള് പാലിക്കാതെയാണ് അറസ്റ്റ് നടത്തിയതെന്ന് ചൂണ്ടിക്കാട്ടി തലശ്ശേരി ജില്ലാ പ്രിന്സിപ്പല് സെഷന്സ് കോടതി വിട്ടയച്ചിരുന്നു.
ഇതിന്റെ പേരില് അന്വേഷണ ഉദ്യോഗസ്ഥനായിരുന്ന ക്രൈംബ്രാഞ്ച് ഡിവൈ.എസ്.പി സുധീര് കല്ലനെതിരെ കോടതി രൂക്ഷ വിമര്ശനം നടത്തിയിരുന്നു. റീ-അറസ്റ്റ് അപേക്ഷ പരിഗണിക്കുന്നതിന് മുന്പ് നേരിട്ടെത്തി വിശദീകരണം നല്കാന് ഡിവൈ.എസ്.പിയോട് ആവശ്യപ്പെടുകയും ചെയ്തിരുന്നു.
