ന്യൂദല്ഹി: ലോകകപ്പ് ഹോക്കി 2026നുള്ള ഭാരത ടീമിനെ ഹര്മന്പ്രീത് സിങ് നയിക്കും. പരിചയ സമ്പന്നനായ മധ്യനിര താരം മന്പ്രീത് സിങ്ങിനെ കൂടി ഉള്പ്പെടുത്തിക്കൊണ്ട് കോച്ച് ഗ്രേഗ് ഫുള്ട്ടണ് ലോകകപ്പിനുള്ള ടീമിനെ പ്രഖ്യാപിച്ചു. ആഗസ്ത് 15 മുതല് 30 വരെ ബെല്ജിയത്തിലും നെതര്ലന്ഡ്സിലുമായാണ് ഇത്തവണത്തെ ലോകപോരാട്ടം.
പ്രതിരോധ താരം ഹര്മന്പ്രീത് സിങ് നയിക്കുന്ന 20 അംഗ ഭാരത ടീമില് യുവാക്കള്ക്കും പ്രാധിനിധ്യം നല്കിയിട്ടുണ്ട്. പരിചയ സമ്പത്തും യുവത്വവും സന്തുലനം ചെയ്തുകൊണ്ടാണ് ഫുള്ട്ടണ് ടീമിനെ ഒരുക്കിയിരിക്കുന്നത്. ടേണ് അനുസരിച്ചുള്ള റെപ്യൂട്ടേഷന് പ്രകാരമല്ല ടീമിനെ തെരഞ്ഞെടുത്തത് ഓരോ താരങ്ങളുടെയും പ്രകടനം വിലയിരുത്തിയാണെന്ന് കോച്ച് ഫുള്ട്ടണ് പറഞ്ഞു. പ്രസിങ് ഗെയിം, കൗണ്ടര് അറ്റാക്കുകള് തുടങ്ങിയ ടാക്റ്റിക്സിനെ കുറിച്ചുള്ളതിനെക്കാള് കൂടുതല് ഓരോ താരങ്ങളും ഈ ഗ്രൂപ്പില് ഒരു ടീമായി എങ്ങനെ തയ്യാറെടുക്കുന്നുവെന്നതിനാണ് കോച്ച് കൂടുതല് പ്രാധാന്യം കല്പ്പിച്ചിരിക്കുന്നത്. പരിശീലന സമയത്തും ചിന്തകളിലും വരെ താരങ്ങളുടെ കെമിസ്ട്രി കൃത്യമാക്കുവാനാണ് പരിശീലന കാലയളവില് ശ്രദ്ധിക്കുന്നത്. ഭാരതം ഹോക്കി ലോകകപ്പില് ഒരേയൊരു തവണയാണ് മുത്തമിട്ടിട്ടുള്ളത്. ആ നേട്ടം കൈവരിച്ചിട്ട് 50 വര്ഷം പിന്നിട്ടു. 1975ലായിരുന്നു ഭാരതത്തിന്റെ കിരീടനേട്ടം.
പൂള് ഡിയില് ഇംഗ്ലണ്ട്, പാകിസ്ഥാന്, വെയ്ല്സ് ടീമുകള്ക്കൊപ്പമാണ് ഭാരതം ഹോക്കി ലോകകപ്പ് ഗ്രൂപ്പ് ഘട്ടത്തില് ഉള്പ്പെട്ടിരിക്കുന്നത്. ലോകകപ്പിന്റെ ആദ്യദിനത്തില് വെയ്ല്സിനെതിരെയാണ് ഭാരതത്തിന്റെ ആദ്യ മത്സരം. 17ന് രണ്ടാം മത്സരത്തില് ഇംഗ്ലണ്ടിനെയും 19ന് ചിരവൈരികളായ പാകിസ്ഥാനെയും നേരിടും. ഗ്രൂപ്പ് ഘട്ടത്തില് ഭാരതത്തിന്റെ മൂന്ന് മത്സരങ്ങളും നടക്കുന്നത് നെതര്ലന്ഡ്സിലെ അംസ്റ്റല്വീനിലാണ്.
