ആംസ്റ്റല്വീന് (നെതര്ലാന്ഡ്സ്): എഫ്.ഐ.എച്ച് പുരുഷ ഹോക്കി ലോകകപ്പിലെ ഉദ്ഘാടന പോരാട്ടത്തില് എതിരാളികളെ നിലംപരിശാക്കി ഭാരതത്തിന് ആധികാരിക തുടക്കം. ആംസ്റ്റല്വീനിലെ വാഗ്നര് സ്റ്റേഡിയത്തില് നടന്ന പൂള് ഡിയിലെ ആവേശകരമായ മത്സരത്തില് ഒന്നിനെതിരെ മൂന്ന് ഗോളുകള്ക്കാണ് (3-1) ഭാരതം വെയ്ല്സിനെ പരാജയപ്പെടുത്തിയത്. പെനാല്റ്റി കോര്ണറുകളെ കൃത്യമായി ലക്ഷ്യത്തിലെത്തിച്ച ക്യാപ്റ്റന് ഹര്മന്പ്രീത് സിങ്ങിന്റെ ഇരട്ട ഗോളുകളും, യുവതാരം സഞ്ജയിന്റെ മിന്നും പ്രകടനവുമാണ് ടീമിന് അര്ഹിച്ച വിജയം സമ്മാനിച്ചത്.
മത്സരത്തിന്റെ ആദ്യ വിസില് ഉയര്ന്ന നിമിഷം മുതല് വലിയ വേഗതയോടെയാണ് ഭാരത താരങ്ങള് കളംനിറഞ്ഞത്. തുടര്ച്ചയായ മുന്നേറ്റങ്ങളിലൂടെ വെയ്ല്സ് പ്രതിരോധനിരയെ സമ്മര്ദത്തിലാക്കാന് സാധിച്ചു. ഇതിന്റെ ഫലമായി എട്ടാം മിനിറ്റില് ഭാരതത്തിന് മത്സരത്തിലെ ആദ്യ പെനാല്റ്റി കോര്ണര് ലഭിച്ചു. പിഴവുകളേതുമില്ലാതെ സഞ്ജയ് പന്ത് വലയിലെത്തിച്ചതോടെ ഭാരതം മത്സരത്തില് 1-0 ന് മുന്നിലെത്തി. ആദ്യ ഗോളിന്റെ ആവേശം കെട്ടടങ്ങും മുന്പേ ഭാരതം ലീഡ് വര്ധിപ്പിച്ചു. പതിനൊന്നാം മിനിറ്റില് ലഭിച്ച പെനാല്റ്റി കോര്ണര് ലക്ഷ്യത്തിലെത്തിച്ച് നായകന് ഹര്മന്പ്രീത് സിങ് ഭാരതത്തിന്റെ ആധിപത്യം അരക്കിട്ടുറപ്പിച്ചു. ആദ്യ ക്വാര്ട്ടര് അവസാനിക്കുമ്പോള് തന്നെ എതിരില്ലാത്ത രണ്ട് ഗോളുകള്ക്ക് ഭാരതം വ്യക്തമായ ലീഡ് നേടിയിരുന്നു.
രണ്ടാം ക്വാര്ട്ടറില് തിരിച്ചടിക്കാന് വെയ്ല്സ് പരമാവധി ശ്രമിച്ചെങ്കിലും ഭാരതത്തിന്റെ പ്രതിരോധ നിരയും മധ്യനിരയും ശക്തമായ പ്രതിരോധം തീര്ത്തു. മൂന്നാം ക്വാര്ട്ടറില് ഭാരതം വീണ്ടും മത്സരത്തിന്റെ നിയന്ത്രണം ഏറ്റെടുത്തു. 43-ാം മിനിറ്റില് ഭാരതത്തിന് അനുകൂലമായി ലഭിച്ച പെനാല്റ്റി കോര്ണര് ഉഗ്രനൊരു ഡ്രാഗ് ഫ്ളിക്കിലൂടെ ഹര്മന്പ്രീത് വീണ്ടും വലയിലെത്തിച്ചു. നാലാം ക്വാര്ട്ടറില് ഭാരതം പ്രതിരോധത്തിന് മുന്ഗണന നല്കിയപ്പോള് വെയ്ല്സ് ആക്രമണം കടുപ്പിച്ചു. തുടര്ന്ന് 56-ാം മിനിറ്റില് സാം വെല്ഷിലൂടെ വെയ്ല്സ് തങ്ങളുടെ ആശ്വാസ ഗോള് കണ്ടെത്തി. എങ്കിലും മത്സരത്തിലേക്ക് ശക്തമായ തിരിച്ചുവരവ് നടത്താന് അവര്ക്കായില്ല. ഹര്മന്പ്രീത് സിങ് തന്നെയാണ് കളിയിലെ താരം. ലോകകപ്പിലെ ആദ്യ മത്സരത്തില് തകര്പ്പന് വിജയം നേടിയതോടെ ഭാരതം പൂള് ഡിയില് ഒന്നാമതെത്തി. ഇന്ന് നടക്കുന്ന രണ്ടാം മത്സരത്തില് ശക്തരായ ഇംഗ്ലണ്ടാണ് ഭാരതത്തിന്റെ എതിരാളികള്. ക്വാര്ട്ടര് ഫൈനല് സാധ്യതകള് സജീവമാക്കാന് ഈ മത്സരത്തിലെ ജയം ഭാരതത്തിന് അനിവാര്യമാണ്.
