തിരുവനന്തപുരം: ഗ്രാമീണ മേഖലയുടെ സമഗ്ര വളര്ച്ച ലക്ഷ്യമിട്ട് കേന്ദ്രസര്ക്കാര് നടപ്പിലാക്കുന്ന പുതിയ ‘വികസിത് ഭാരത് ഗ്യാരണ്ടി ഫോര് റോസ്ഗര് ആന്ഡ് അജീവിക മിഷന്’ (വിബി ജി റാംജി) പദ്ധതിയുടെ ഭാഗമായി കേരളത്തിന് ആദ്യ ഗഡു ഫണ്ട് അനുവദിച്ച് ഉത്തരവായത് കേരളത്തോടുള്ള കേന്ദ്ര സര്ക്കാരിന്റെ പ്രത്യേക താത്പര്യം വ്യക്തമാക്കുന്നതായി ബിജെപി ദേശീയ നിര്വ്വാഹക സമിതി അംഗം കുമ്മനം രാജശേഖരന്. രാഷ്ട്രീയ പക്ഷപാതിത്വങ്ങള്ക്കപ്പുറം, രാജ്യത്തെ കോടിക്കണക്കിന് സാധാരണക്കാരായ ഗ്രാമീണ ജനതയുടെ ഉന്നതിയും സാമ്പത്തിക ഭദ്രതയും ലക്ഷ്യമിട്ടാണ് നരേന്ദ്ര മോദി സര്ക്കാര് പ്രവര്ത്തിക്കുന്നത്. ഗ്രാമങ്ങളുടെ അടിത്തറ ശക്തമാക്കാനും അര്ഹതപ്പെട്ട ആനുകൂല്യങ്ങള് ഇടനിലക്കാരുടെ ചൂഷണമില്ലാതെ ജനങ്ങളിലേക്ക് നേരിട്ട് എത്തിക്കാനും ലക്ഷ്യമിട്ടുള്ള ഇത്തരം കേന്ദ്ര പദ്ധതികള് കേരളത്തിന്റെ സര്വ്വതോമുഖമായ വളര്ച്ചയ്ക്ക് വലിയ മുതല്ക്കൂട്ടാണെന്നും അദ്ദേഹം പ്രസ്താവനയില് പറഞ്ഞു.
ഈ സാഹചര്യത്തില്, തൊഴിലുറപ്പ് പദ്ധതി കേന്ദ്ര സര്ക്കാര് പിന്വലിച്ചുവെന്നോ അട്ടിമറിച്ചുവെന്നോ ഉള്ള പ്രതിപക്ഷ കക്ഷികളുടെ പ്രചാരണങ്ങള് പൂര്ണമായും അടിസ്ഥാനരഹിതവും പച്ചക്കള്ളവുമാണ്. മുന് സര്ക്കാരുകളുടെ കാലത്ത് പദ്ധതിയില് നടന്നിട്ടുള്ള ക്രമക്കേടുകളും അഴിമതികളും കേന്ദ്ര സര്ക്കാരിന്റെ പുതിയ നടപടികളിലൂടെ വ്യക്തമായിക്കഴിഞ്ഞിട്ടുണ്ട്. പാവപ്പെട്ട ഗ്രാമവാസികളായ തൊഴിലാളികള്ക്ക് വലിയൊരു ആശ്വാസമാണ് ഈ പദ്ധതിയിലൂടെ ലഭിക്കുന്നത്.
തൊഴിലുറപ്പ് മേഖലയിലെ അണ്സ്കില്ഡ് വേജ് വിഹിതമായി കേന്ദ്രസംസ്ഥാന വിഹിതങ്ങള് ഉള്പ്പെടെ ആകെ 856,78,88,333 രൂപ (ഏകദേശം 856 കോടി രൂപ) ആണ് ഈ ഉത്തരവ് പ്രകാരം കേരളത്തിന് ലഭ്യമായിരിക്കുന്നത്. വളരെ സുതാര്യവും സമഗ്രവുമായ നടപക്രമങ്ങളിലൂടെയാണ് ഈ പദ്ധതി ഇപ്പോള് നടപ്പിലാക്കുന്നത്. കേന്ദ്ര ഗ്രാമവികസന മന്ത്രാലയത്തിന്റെ മദര് സാങ്ഷന് പ്രകാരം മാത്രം കേരളത്തിന് ലഭിച്ച കേന്ദ്രസഹായം 515 കോടിയാണ്. ഇതിനോടൊപ്പം സംസ്ഥാന സര്ക്കാര് നല്കേണ്ട വിഹിതമായ 342 കോടി കൂടി ഇതില് ഉള്പ്പെടുന്നു.
ഫണ്ട് വിതരണത്തില് ഏതെങ്കിലും ഒരു വിഭാഗം തഴയപ്പെടാതിരിക്കാന് അതീവ ശ്രദ്ധയാണ് കേന്ദ്രസര്ക്കാര് നല്കിയിട്ടുള്ളതെന്ന് കുമ്മനം പറഞ്ഞു. ‘സബ് കാ സാത്ത്, സബ് കാ വികാസ്’ എന്ന നരേന്ദ്ര മോദി സര്ക്കാരിന്റെ പ്രഖ്യാപനത്തിന് കേരളത്തിലെ ഗ്രാമങ്ങളില് വീണ്ടും തിളക്കം വീശുന്നതാണ് ഈ പദ്ധതി. രാജ്യത്തിന്റെ വികസനത്തോടൊപ്പം കേരളത്തെയും ചേര്ത്തുപിടിക്കുന്ന കേന്ദ്രസര്ക്കാരിനും പ്രധാനമന്ത്രി നരേന്ദ്ര മോദിജിക്കും അഭിനന്ദനങ്ങള് അര്പ്പിക്കുന്നതായി കുമ്മനം രാജശേഖരന് പറഞ്ഞു.
