കോട്ടയം: കൂരോപ്പടയില് കളനാശിനി കഴിച്ച നാലംഗ കുടുംബത്തിലെ ആണ്കുട്ടിയും മരിച്ചു. ഗൃഹനാഥന് ളാക്കാട്ടൂര് മറ്റപ്പള്ളി ചിറപ്പുറത്ത് തോമസ് എബ്രഹാം (ജോബി) ഭാര്യ ജോസ്ന , മകള് മരിയ തെരേസ എന്നിവര് കഴിഞ്ഞ ദിവസങ്ങളില് മരിച്ചിരുന്നു. ഗുരുതരാവസ്ഥയില് വെന്റിലേറ്ററിലായിരുന്ന ഇളയ മകന് അലന് (12) ആണ് ഇന്നു മരിച്ചത്.
ഈ മാസം 13നായിരുന്നു നാലംഗ കുടുംബം കളനാശിനി കഴിച്ച് കൂട്ടആത്മഹത്യാശ്രമം നടത്തിയത്. ഫോണില് വിളിച്ചിട്ട് കിട്ടാതെ വന്നതോടെ ജോസ്നയുടെ സഹോദരന് വീട്ടില് എത്തിയപ്പോഴാണ് നാലുപേരെയും അവശനിലയില് കണ്ടത്. സമീപത്ത് കളനാശിനിയുടെ കുപ്പിയും കണ്ടെത്തി.
തുടര്ന്ന് നാട്ടുകാരുടെ സഹായത്തോടെ ഇവരെ ആശുപത്രിയില് പ്രവേശിപ്പിക്കുകയായിരുന്നു.
സാമ്പത്തിക പ്രതിസന്ധിയാണ് കുടുംബത്തെ കൂട്ട ആത്മഹത്യയിലേക്കു നയിച്ചതെന്നാണ് പൊലീസിന്റെ കണ്ടെത്തല്. കൂരോപ്പട സര്വീസ് സഹകരണ ബാങ്കിലെ താല്ക്കാലിക ജീവനക്കാരിയായിരുന്നു ജോസ്ന.
