തിരുവനന്തപുരം: പാമ്പ് കടിയേറ്റുള്ള മരണങ്ങള് തടയുന്നതിന് ആരോഗ്യ വകുപ്പ് പ്രത്യേക കര്മപദ്ധതി തയാറാക്കി. പാമ്പുകടിയുമായി ബന്ധപ്പെട്ട് ലഭ്യമായ ഡേറ്റയുടെ അടിസ്ഥാനത്തില് ആശുപത്രികളുടെ ഹോട്ട്സ്പോട്ട് മാപ്പിങ് നടത്തും. പാമ്പ് കടിയേറ്റ് കൂടുതല് ആളുകളെത്തുന്ന ആശുപത്രികളെ റെഡ് ഫ്ലാഗ്ഡ് ഇന്സ്റ്റിറ്റിയൂഷനായി കണക്കാക്കി കൂടുതല് സൗകര്യങ്ങളൊരുക്കും. സാമൂഹികാധിഷ്ഠിത നിരീക്ഷണത്തോടെ പാമ്പുകടികള് റിപ്പോര്ട്ട് ചെയ്യും. ചികിത്സയുമായി ബന്ധപ്പെട്ട കാലതാമസം പ്രത്യേകമായി നിരീക്ഷിക്കും.
ആശുപത്രികളെ ഹബ് ആന്റ് സ്പോക്ക് രീതിയില് ക്രമീകരിച്ച് റഫറല് സംവിധാനം കൂടുതല് കാര്യക്ഷമമാക്കും.
ആന്റിവെനം ഉള്ള ആശുപത്രികളില് പെട്ടെന്ന് എത്തിച്ചേരാന് ബുദ്ധിമുട്ടുള്ള വിദൂരങ്ങളിലുള്ള സ്ഥലങ്ങളിലെ പിഎച്ച്സി/സിഎച്ച്സികളില് ആന്റിസ്നേക്ക് വെനം ലഭ്യമാക്കും. പ്രാഥമിക ചികിത്സാ കേന്ദ്രങ്ങളും റഫറല് ആശുപത്രികളും കൂടുതല് ശക്തിപ്പെടുത്തും. ”റെഡ് ഫ്ലാഗ്” പ്രദേശങ്ങളില് കൂടുതല് ചികിത്സാ സൗകര്യങ്ങള് ഉറപ്പാക്കുകയും ചെയ്യും. ഹമ്പ് നോസ് പിറ്റ് വൈപ്പര്, മലബാര് പിറ്റ് വൈപ്പര് തുടങ്ങിയവയ്ക്കായി പ്രത്യേക ചികിത്സാ പ്രോട്ടോക്കോളുകളും നടപ്പാക്കും. ഡോക്ടര്മാര്ക്ക് പാമ്പുകളുടെ ചിത്രങ്ങള് പരിചയപ്പെടുത്തുകയും നഴ്സുമാര്ക്ക് എല്എംഎ (Laryngeal Mask Airway) പരിശീലനം നല്കാനുമാണ് പദ്ധതി തയാറാക്കിയിരിക്കുന്നത്.
കൂടാതെ തൊഴിലാളികള്ക്ക് ഗംബൂട്ടുകളും, റബര് ഗ്ലൗസുകളും പോലുള്ള സുരക്ഷാ ഉപകരണങ്ങള് ലഭ്യമാക്കണം. സര്പ്പ വോളന്റിയര്മാരുടെ സഹായത്തോടെ അദ്ധ്യാപകര്ക്ക് ബോധവത്കരണം നല്കും. സ്കൂള് സോഷ്യല് മീഡിയ ക്ലബ്ബുകള് വഴി വിദ്യാഭ്യാസ വീഡിയോകള് തയാറാക്കും. സര്ക്കാര് – സ്വകാര്യ പങ്കാളിത്തത്തോടെ പരിശീലന പരിപാടികള് സംഘടിപ്പിക്കും. സംസ്ഥാനതലത്തില് ഏകീകൃത ഐഇസി മെറ്റീരിയലുകള് വികസിപ്പിക്കുകയും പാഠ്യപദ്ധതിയില് പാമ്പുകടി പ്രതിരോധം ഉള്പ്പെടുത്താന് ശിപാര്ശ ചെയ്യാനും ആരോഗ്യവകുപ്പിന്റെ കര്മപദ്ധതിയിലുണ്ട്.
കഴിഞ്ഞവര്ഷം ചികിത്സ തേടിയത് 6382 പേര്, 18 മരണം
2025ല് 133 ആശുപത്രികളിലായി 8456 വയല് ആന്റിസ്നേക്ക് വെനമാണ് വിതരണം ചെയ്തത്. അതില് 6382 വയല് ആന്റിവെനമാണ് രോഗികള്ക്ക് നല്കിയത്. 18 മരണങ്ങളാണ് കഴിഞ്ഞവര്ഷം ഉണ്ടായത്. കഴിഞ്ഞ വര്ഷത്തില് നിന്ന് 13 സര്ക്കാര് ആശുപത്രികളില് കൂടി ആന്റിവെനം ലഭ്യമാക്കിയിട്ടുണ്ട്. നിലവില് 151 സര്ക്കാര് ആശുപത്രികളിലും 150 സ്വകാര്യ ആശുപത്രികളിലും ആന്റിവെനം ലഭ്യമാണ്. ആന്റിവെനം ലഭ്യമാകുന്ന സര്ക്കാര്, സ്വകാര്യ ആശുപത്രികളുടെ ലിസ്റ്റ് ആരോഗ്യവകുപ്പ് പ്രസിദ്ധീകരിച്ചിട്ടുണ്ട്. മാത്രമല്ല കനിവ് 108 ആംബുലന്സ് വഴി ആന്റിവെനം ഉള്ള ആശുപത്രികളില് രോഗികളെ കൃത്യമായി എത്തിക്കാനുള്ള നടപടി സ്വീകരിച്ചിട്ടുണ്ട്. അഞ്ച് ദിവസത്തിനിടെ പാമ്പുകടിയേറ്റ 75 പേരെയും പാമ്പുകടി സംശയിച്ച 62 പേരേയും സമയബന്ധിതമായി ആശുപത്രിയിലെത്തിച്ചിട്ടുണ്ട്.
