ദശരഥന്‍, തന്റെ മക്കളോടും അവരുടെ ഭാര്യമാരോടും കൂടി ഐശ്വ ര്യസമ്പത്സമൃദ്ധമായി അയോദ്ധ്യ ഭരിച്ചു. ഭരതനും ശത്രുഘ്‌നനും, അവരുടെ അമ്മാവനായ കേകയരാജാവ് യുധാജിത്തിന്റെ കൊട്ടാരത്തിലേക്ക് യാത്ര പുറപ്പെട്ടു. രാമന്‍ വളരെ ആഹ്‌ളാദത്തോടെ രാജകൊട്ടാരത്തില്‍ ഏറ്റവും പ്രിയപ്പെട്ട രാജകുമാരനായി കഴിഞ്ഞുവന്നു. ഒരുദിവസം പെട്ടെന്നവിടെ നാരദ ഋഷി ആകാശത്ത് നിന്ന് തന്റെ ദിവ്യരഥത്തില്‍ വന്നിറങ്ങി. രാമനും സീതയും ഉടന്‍ എഴുന്നേറ്റ്, കൈകള്‍ കൂപ്പി ആദരവോടെ അദ്ദേഹത്തെ സ്വാഗതം ചെയ്തു.
”അല്ലയോ രാമ, അങ്ങേക്ക് എല്ലാം അറിയാം എങ്കിലും എന്റെ ആഗമനോദ്ദേശം എന്തെന്ന് ചോദിച്ചുവല്ലോ. ഒരു സുപ്രധാന കാര്യം ഓര്‍മ്മപ്പെടുത്താനാണ് ഞാന്‍ ഇപ്പോള്‍ വന്നത്. അങ്ങിപ്പോള്‍ ഒരു സാധാരണ രാജകുമാരനെന്ന മട്ടില്‍ ജീവിക്കുന്നു, ഒരു ചെറിയ രാജ്യത്തിന്റെ കാര്യങ്ങള്‍ നോക്കുന്നു. എന്നാല്‍ അവിടുന്ന് ഈ വിശ്വത്തിന്റെതന്നെ നാഥനാണ് എന്ന് തിരിച്ചറിഞ്ഞാലും. രാമാ, അങ്ങേയ്‌ക്കിപ്പോള്‍ ഒരു മനുഷ്യനായി സ്വയം തോന്നുന്നുവെങ്കിലും, അവിടുത്തെ ജീവിതദൗത്യം എന്തെന്ന് മറക്കരുത്. അതിശക്തനായ രാക്ഷസരാജാവ്, രാവണന്‍, മൂന്ന് ലോകങ്ങളെയും ഭയപ്പെടുത്തിയും
പീഡിപ്പിച്ചും തന്റെ ആധിപത്യം നടപ്പാക്കുന്നു. അങ്ങേയ്‌ക്ക് മാത്രമേ അവനെ പരാജയപ്പെടുത്താന്‍ കഴിയൂ. ധര്‍മ്മപരിപാലനത്തിനായാണ് അങ്ങ് ഇവിടെ ജനിച്ചിരിക്കുന്നത്.” രാമന്‍ ശാന്തമായി മറുപടി പറഞ്ഞു, ”മഹര്‍ഷേ, ഞാന്‍ എന്റെ ധര്‍മ്മം എന്തെന്ന് മറന്നിട്ടില്ല. മഹാമുനേ, ഒട്ടും ഭയപ്പെടേണ്ട, ഞാന്‍ എന്റെ കര്‍ത്തവ്യം പൂര്‍ത്തിയാക്കുകതന്നെ ചെയ്യും.”
ദശരഥ മഹാരാജാവ് ഏറിവരുന്ന വാര്‍ദ്ധക്യത്തെപ്പറ്റി ആലോചിച്ച് രാമനെ യുവരാജാവായി അഭിഷേകം ചെയ്യുവാന്‍ തീരുമാനിച്ചു. ഭരതനും ശത്രുഘ്‌നനും അകലെയായിരുന്നുവെങ്കിലും, അടുത്തദിവസം തന്നെ ശുഭമുഹൂര്‍ത്തം ഉള്ളതിനാല്‍ രാജാവും വസിഷ്ഠനും ചേര്‍ന്ന് തിടുക്കത്തില്‍ രാമാഭിഷേകത്തിനുള്ള ഒരുക്കങ്ങള്‍ വേഗത്തില്‍ ആരംഭിച്ചു. വസിഷ്ഠന്‍ സന്തോഷത്തോടെ രാമനെ അഭിഷേകവാര്‍ത്ത അറിയിച്ച് അതിനുവേണ്ട ഉപദേശങ്ങള്‍ നല്കി.
അഭിഷേകവിഘ്‌നം
രാജകൊട്ടാരവും ജനങ്ങളും ആഹ്‌ളാദത്തില്‍ മുങ്ങി നിലക്കുമ്പോള്‍ പൊടുന്നനെ അതിനൊരു ഗതിമാറ്റം സംഭവിച്ചു. കൈകേയിയുടെ തോഴി മന്ഥര, രാമാഭിഷേകത്തില്‍ കൈകേയി പ്രകടിപ്പിക്കുന്ന സന്തോഷം കണ്ടപ്പോള്‍, രാജ്ഞിയില്‍ സംശയത്തിന്റെ വിത്തുകള്‍ വിതച്ചു. ”നീ, രാജാവിന് ഏറെ പ്രിയപ്പെട്ട റാണിയാണിപ്പോള്‍, എന്നാല്‍ രാമന്‍ രാജാവായി അഭിഷിക്തനായാല്‍ നിന്റെ സ്വന്തം കൊട്ടാരത്തില്‍ നീയൊരു ദാസിയാകും. അതുകൊണ്ട് നീ ഇപ്പോള്‍ത്തന്നെ നിനക്ക് അര്‍ഹതപ്പെട്ട രണ്ടു വരങ്ങള്‍ രാജാവിനോട് ചോദിക്കുക. ഭരതനെ രാജാവായി അഭിഷേകം ചെയ്യണമെന്നും രാമനെ പതിനാല് വര്‍ഷത്തേക്ക് വനത്തിലേക്ക് നാടുകടത്തണമെന്നും രാജാവിനോട്
ആവശ്യപ്പെടുക.”
ജന്മഭൂമി ഓണ്‍ലൈന്‍