അസിം മുനീർ തിരിച്ചെത്തിയതിന് ശേഷം ബംഗ്ലാദേശ് സൈനിക മേധാവി തുർക്കിയിലേക്ക് പറന്നു ; ആയുധ വാങ്ങൽ ചർച്ച ചെയ്യാൻ എർദോഗനുമായി കൂടിക്കാഴ്ച നടത്തും

ധാക്ക: ബംഗ്ലാദേശ് ആർമി ചീഫ് ജനറൽ വഖാർ ഉസ് സമാന്‍ തുർക്കിയിലേക്ക് യാത്ര തിരിച്ചു. തുർക്കിയിലേക്കുള്ള ആദ്യ ഔദ്യോഗിക സന്ദർശനത്തിനായി അദ്ദേഹം ശനിയാഴ്ച രാവിലെ ധാക്കയിൽ നിന്ന് പുറപ്പെട്ടു. ബംഗ്ലാദേശിന്റെ സൈനിക സംഭരണവും തുർക്കിയുമായുള്ള പ്രതിരോധ സഹകരണവും വർദ്ധിപ്പിക്കുക എന്നതാണ് ഈ സന്ദർശനത്തിന്റെ ലക്ഷ്യമെന്ന് കരുതപ്പെടുന്നു.

കരസേനാ മേധാവിയായി ചുമതലയേറ്റതിന്റെ അവസാന വർഷത്തിൽ ചില പ്രധാന പ്രതിരോധ കരാറുകളിൽ ഒപ്പുവെക്കാനാണ് സമാന്‍ ആഗ്രഹിക്കുന്നത്. പാകിസ്ഥാൻ ആർമി ചീഫ് അസിം മുനീർ തുർക്കി സന്ദർശിച്ച്  ഒരു ആഴ്ചയ്‌ക്കുള്ളിലാണ് സമാന്റെ സന്ദർശനം. കഴിഞ്ഞ ആഴ്ച രണ്ട് ദിവസത്തേക്കായിരുന്നു മുനീർ തുർക്കി സന്ദർശിച്ചത്.

നോർത്ത് ഈസ്റ്റ് ന്യൂസ് റിപ്പോർട്ട് ചെയ്യുന്നതനുസരിച്ച് ഞായറാഴ്ച രാവിലെ ടർക്കിഷ് എയർലൈൻസിന്റെ TK-713 വിമാനത്തിലാണ് ജനറൽ സമാനും ഭാര്യയും ആറ് അംഗ ഔദ്യോഗിക പ്രതിനിധി സംഘവും തുർക്കിയിലേക്ക് പറന്നത്. ജൂലൈ 20 മുതൽ 24 വരെയാണ് സന്ദർശനം. 2024 ജൂണിൽ കരസേനാ മേധാവിയായി സ്ഥാനമേറ്റതിനുശേഷം ജനറൽ സമാന്റെ തുർക്കിയിലേക്കുള്ള ആദ്യ ഔദ്യോഗിക സന്ദർശനമാണ്.

പ്രതിരോധ സഹകരണത്തിനായിരിക്കും ഊന്നൽ

സമാന് വിരമിക്കാൻ ഇനി 11 മാസം മാത്രമേ ബാക്കിയുള്ളൂ. അതിനാൽ ഇത് അദ്ദേഹത്തിന്റെ ഏറ്റവും പ്രധാനപ്പെട്ട വിദേശ പരിപാടികളിൽ ഒന്നായിരിക്കുമെന്ന് പ്രതീക്ഷിക്കുന്നു. അദ്ദേഹത്തിന്റെ യാത്രാ രേഖകളിൽ വിശദമായ ഒരു അജണ്ട വ്യക്തമാക്കിയിട്ടില്ല, പക്ഷേ ഈ സന്ദർശന വേളയിൽ പ്രധാന പ്രതിരോധ കരാറുകളിൽ ഒപ്പുവെക്കാൻ കഴിയുമെന്ന് വിശ്വസിക്കപ്പെടുന്നു. ബംഗ്ലാദേശും തുർക്കിയും തമ്മിലുള്ള സൈനിക സഹകരണം സമീപ വർഷങ്ങളിൽ അതിവേഗം വളർന്നിട്ടുണ്ട്.

തുർക്കിയുടെ സൈനിക ഉപകരണങ്ങളിൽ ബംഗ്ലാദേശ് സൈന്യം അടുത്തിടെ ഏറെ ആത്മവിശ്വാസം പ്രകടിപ്പിച്ചിട്ടുണ്ട്. പീരങ്കി തോക്കുകൾ, പീരങ്കി വെടിയുണ്ടകൾ, ഷെല്ലുകൾ, ചെറിയ ആയുധങ്ങൾ, ബെയ്‌രക്തർ ഡ്രോണുകൾ (യുഎവി) എന്നിവ വാങ്ങുന്നത് സംബന്ധിച്ച് ബംഗ്ലാദേശും തുർക്കിയും തമ്മിൽ ചർച്ചകൾ നടന്നിട്ടുണ്ട്. ഇത് ധാക്ക-അങ്കാറ പ്രതിരോധ ബന്ധങ്ങൾ കൂടുതൽ ശക്തിപ്പെടുത്തി.

ബംഗ്ലാദേശ് സൈനിക ശക്തി വർദ്ധിപ്പിക്കുന്നു

പുതിയ കവചിത പ്ലാറ്റ്‌ഫോമുകൾ, പീരങ്കി നവീകരണങ്ങൾ, ഡ്രോണുകൾ, യുദ്ധക്കളത്തിലെ മൊബിലിറ്റി സംവിധാനങ്ങൾ എന്നിവ ഉൾപ്പെടെ നിരവധി ആധുനികവൽക്കരണ സംരംഭങ്ങൾ ബംഗ്ലാദേശ് സൈന്യം ഏറ്റെടുത്തിട്ടുണ്ട്. നിലവിലുള്ള പ്രതിരോധ പദ്ധതികൾ അവലോകനം ചെയ്യുന്നതിനും, നിലവിലെ സംഭരണങ്ങളുടെ പുരോഗതി വിലയിരുത്തുന്നതിനും, സൈനിക സഹകരണത്തിനുള്ള പുതിയ വഴികൾ പര്യവേക്ഷണം ചെയ്യുന്നതിനും ഈ സന്ദർശനം ഇരുപക്ഷത്തിനും അവസരമൊരുക്കുമെന്ന് പ്രതിരോധ വിദഗ്ധർ പറയുന്നു.