അര്‍ജന്റീന- സ്‌പെയിന്‍: തന്ത്രങ്ങളുടെ ആശാന്മാര്‍

അര്‍ജന്റീനയുടെ സ്‌കലോണിക്കാലം

കിരീടങ്ങളുടെ തോഴന്‍: മൂന്ന് പതിറ്റാണ്ടുകളായി കിരീടമില്ലാതെ വലഞ്ഞ അര്‍ജന്റീനയെ 2021 കോപ്പ അമേരിക്ക, 2022 ഫൈനലിസീമ, 2022 ഖത്തര്‍ ലോകകപ്പ്, 2024 കോപ്പ അമേരിക്ക എന്നിവയിലേക്ക് നയിച്ച് സ്‌കലോനി വിജയങ്ങളുടെ പര്യായമായി മാറി.

നിലവിലെ ചാമ്പ്യന്മാരായ അര്‍ജന്റീനയെ വിജയകരമായി നയിച്ചുകൊണ്ട് വീണ്ടുമൊരു ഫൈനല്‍ പോരാട്ടത്തിന്റെ വക്കിലെത്തിക്കാന്‍ സ്‌കലോണിക്ക് കഴിഞ്ഞിരിക്കുന്നു.

തന്ത്രങ്ങളുടെ രാജാവ്

സ്വിറ്റ്‌സര്‍ലന്‍ഡിനെതിരായ ലോകകപ്പ് ക്വാര്‍ട്ടര്‍ ഫൈനലില്‍ അടക്കം പ്രതിസന്ധി ഘട്ടങ്ങളില്‍ അക്രമണ ഫുട്‌ബോളിലേക്ക് ടീമിനെ വഴിതിരിച്ചുവിട്ട് കളി തിരിച്ചുപിടിക്കുന്ന അദ്ദേഹത്തിന്റെ ശൈലി ഇതിനകം ഫുട്‌ബോള്‍ ലോകത്ത് വലിയ ചര്‍ച്ചയായിട്ടുണ്ട്. ഈ ലോകകപ്പിലും മികച്ച നേതൃത്വമാണ് അദ്ദേഹത്തിന്റേത്. പ്രസിങ് ഗെയിം അര്‍ജന്റീനയ്‌ക്ക് പലപ്പോഴും മേല്‍ക്കൈ സമ്മാനിച്ചു. കളിയുടെ അവസാന മിനിറ്റിലെ ഉണര്‍വും അര്‍ജന്റീനയുടെ പ്രത്യേകതയാണ്.

സ്‌പെയ്‌നിന്റെ ഫാദര്‍ഫിഗര്‍

യുവേഫ യൂറോ 2024 ചാമ്പ്യന്മാരായ സ്‌പെയിന്‍, ഡി ലാ ഫുവന്റെയുടെ കീഴില്‍ തുടര്‍ച്ചയായി 37 മത്സരങ്ങളില്‍ തോല്‍വി അറിയാതെ മുന്നേറി ഇറ്റലിയുടെ ലോക റെക്കോര്‍ഡിനൊപ്പമെത്തിയിരിക്കുകയാണ്.

2010ന് ശേഷം സ്‌പെയിന്‍ ലോകകപ്പ് ഫൈനലിലെത്തുന്നത് ഇതാദ്യമായാണ്. സ്‌പെയിനിന്റെ പരമ്പരാഗതമായ പാസിങ് ശൈലിയോടൊപ്പം വിങ്ങര്‍മാരുടെ വേഗതയും പ്രതിരോധത്തിലെ കരുത്തും സമന്വയിപ്പിച്ച പുതിയൊരു ശൈലിയാണ് അദ്ദേഹം ടീമിനായി രൂപപ്പെടുത്തിയത്.

സ്‌പെയിനിന്റെ യൂത്ത് ടീം ഘടനയില്‍ പത്ത് വര്‍ഷത്തോളം പ്രവര്‍ത്തിച്ച പരിചയം ഡി ലാ ഫുവന്റെയ്‌ക്കുണ്ട്. നിലവിലെ സീനിയര്‍ ടീമിലെ പ്രമുഖ താരങ്ങളായ റോഡ്രി, ഉനായ് സിമോണ്‍, ഡാനി ഓല്‍മോ, പെദ്രി, മിഖേല്‍ ഒയാര്‍സബാല്‍ തുടങ്ങിയവരെയെല്ലാം അവരുടെ കൗമാരപ്രായത്തില്‍ പരിശീലിപ്പിച്ചത് അദ്ദേഹമായിരുന്നു. സ്‌പെയിന്‍ ടീമിലെ ഓരോ കളിക്കാരനും അര്‍ഹമായ പരിഗണന നല്‍കുന്ന അദ്ദേഹം, മൈതാനത്തിന് പുറത്തും മികച്ച മനുഷ്യബന്ധങ്ങള്‍ കാത്തുസൂക്ഷിക്കുന്നു.