വര്‍ക്കല: സ്വാമി സച്ചിദാനന്ദ, ഗുരുദേവ ദര്‍ശനങ്ങള്‍ കാലികമായ പ്രസക്തി ഉള്‍ക്കൊണ്ട് അവതരിപ്പിച്ച വ്യക്തിയാണെന്ന് വി. മുരളീധരന്‍ എംഎല്‍എ. ഗുരുദേവ ആദര്‍ശങ്ങളെ സ്ഥാപനപരമായ ശക്തിയാക്കി മാറ്റാന്‍ സച്ചിദാനന്ദ സ്വാമിക്ക് കഴിഞ്ഞു. ശിവഗിരി മഠത്തില്‍ ഗുരുസേവനത്തിന്റെ അമ്പത് വര്‍ഷം പൂര്‍ത്തിയാക്കിയ ശ്രീനാരായണ ധര്‍മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദയെ ശ്രീനാരായണ ഗുരുരത്‌നം അവാര്‍ഡ് നല്‍കി ആദരിച്ച ചടങ്ങില്‍ സംസാരിക്കുന്നു അദ്ദേഹം.
കേരളത്തിന്റെ സാമൂഹ്യ, രാഷ്‌ട്രീയ രംഗങ്ങളിലും, പിന്നാക്ക സമുദായങ്ങളുടെ ശക്തി പ്രകടിപ്പിക്കുന്നതിലും, ആ ശക്തിയുടെ പ്രാധാന്യം വിളിച്ചോതുന്നതിനും സച്ചിദാനന്ദ സ്വാമി നടത്തിയിട്ടുള്ള നേതൃത്വപരമായ പങ്ക് വളരെ വലുതാണ്. അധികാര കേന്ദ്രങ്ങളോട് സംവദിക്കാനും സര്‍ക്കാര്‍ നയങ്ങളെ സ്വാധീനിക്കാനും സമുദായത്തിന് കഴിവ് നല്‍കുന്നതിലും സ്വാമികളുടെ നേതൃത്വം നിര്‍ണായകമായിരുന്നു. സനാതന ധര്‍മ്മത്തിന്റെ ജ്ഞാനപാരമ്പര്യത്തെ ലളിതമായ രീതിയില്‍ പ്രായോഗികമാക്കാന്‍ കഴിയുന്ന നിലയില്‍ അവതരിപ്പിച്ചു. സംഘടനകൊണ്ട് ശക്തരാകുക എന്ന ഗുരുദേവ ദര്‍ശനത്തെ അക്ഷരാര്‍ത്ഥത്തില്‍ യാഥാര്‍ത്ഥ്യമാക്കിയ സംന്യാസി വര്യനാണ് സ്വാമി സച്ചിദാനന്ദയെന്നും വി. മുരളീധരന്‍ പറഞ്ഞു.
മന്ത്രി ബിന്ദു കൃഷ്ണ ചടങ്ങ് ഉദ്ഘാടനം ചെയ്തു. ശ്രീനാരായണ ഗുരുവിന്റെ ആശയങ്ങളെ സ്വന്തം ജീവിതത്തിലൂടെയും പ്രവര്‍ത്തനങ്ങളിലൂടെയും സമൂഹത്തിലേക്ക് പകര്‍ന്നുനല്‍കിയ മഹത്തായ വ്യക്തിത്വമാണ് സ്വാമി സച്ചിദാനന്ദയെന്ന് മന്ത്രി പറഞ്ഞു. മുന്‍ കെപിസിസി പ്രസിഡന്റ് വി.എം. സുധീരന്‍ വിശിഷ്ടാതിഥിയായി. ഗുരു ഗ്ലോബല്‍ ഫെഡറേഷന്റെ ‘ശ്രീനാരായണ ഗുരുരത്‌നം’ അവാര്‍ഡ് സ്വാമി സച്ചിദാനന്ദക്ക് വി. മുരളീധരന്‍ എംഎല്‍എ സമ്മാനിച്ചു. ചടങ്ങില്‍ വി. ജോയ് എംഎല്‍എ അധ്യക്ഷനായിരുന്നു.
