കോട്ടയം:മികച്ച നടിക്കുള്ള ദേശീയ പുരസ്കാര ജേതാവ് യാമി ഗൗതം പൃഥ്വിരാജിന്റെ നായികയായി മലയാളത്തിലും അഭിനയിച്ചിട്ടുണ്ട്. അവര് അഭിനയിച്ച
ഒരേയൊരു മലയാളചിത്രമാണ് 2012ല് പുറത്തിറങ്ങിയ ‘ഹീറോ’. പൃഥ്വിരാജായിരുന്നു ഈ ചിത്രത്തിലെ നായകന്. ദീപന് സംവിധാനം ചെയ്ത ഈ ആക്ഷന്-ത്രില്ലര് ചിത്രത്തില് ‘ഗൗരി മേനോന്’ എന്ന സിനിമ നടിയുടെ കഥാപാത്രത്തെയാണ് അവര് അവതരിപ്പിച്ചത്.
മാര്ക്ക് ബെന്നിംഗ്ടണിന്റെ ‘ലിവിംഗ് ദി ഡ്രീം’ എന്ന പുസ്തകം ഇഷ്ടപ്പെടുന്ന, ദില്വാലെ ദുല്ഹനിയ ലേ ജായേംഗേ, ടൈറ്റാനിക് എന്നീ സിനിമകള് ആവര്ത്തിച്ചു കാണാന് ആഗ്രഹിക്കുന്ന, ഹൃതിക് റോഷനെയും ജസീക്ക ആല്ബയെയും ആരാധിക്കുന്ന യാമി ഗൗതം 1988 ല് നവംബര് 28 ന് ഹിമാചല് പ്രദേശിലെ ബിലാസ്പൂരിലാണ് ജനിച്ചത്. വളര്ന്നത് ചണ്ഡീഗഡിലും. പഞ്ചാബ് യൂണിവേഴ്സിറ്റിയില് നിയമത്തില് ബിരുദം നേടിയിട്ടുണ്ട്. അച്ഛന് മുകേഷ് ഗൗതം പഞ്ചാബി ചലച്ചിത്ര സംവിധായകനും പി.ടി.സി പഞ്ചാബി ചാനലിന്റെ വൈസ് പ്രസിഡന്റുമായിരുന്നു. അമ്മ അഞ്ജലി വീട്ടമ്മയാണ്. രണ്ട് സഹോദരങ്ങളുണ്ട്. ചലച്ചിത്ര സംവിധായകനായ ആദിത്യ ധര് ആണ് ഭര്ത്താവ്.
ഇരുപതുവയസ്സുള്ളപ്പോള്, ഒരു നടിയാകാനുള്ള സ്വപ്നങ്ങളുമായി അവര് മുംബൈയിലേക്ക് താമസം മാറി. കുറച്ചു വര്ഷങ്ങള് മോഡലായി ജോലി ചെയ്തു. ‘ഗ്ലോ ആന്ഡ് ലവ്ലി’യുടെ (ഫെയര് ആന്ഡ് ലവ്ലി) പരസ്യത്തില് അഭിനയിച്ചതോടെയാണ് അവര്ക്ക് അവസരങ്ങള് തുറന്നു കിട്ടിയത്. കോര്നെറ്റോ, സാംസങ് മൊബൈല്, ഷെവര്ലെ, റെവ്ലോണ് തുടങ്ങിയ ബ്രാന്ഡുകളുടെ പരസ്യങ്ങളിലും തുടര്ന്ന് പ്രത്യക്ഷപ്പെട്ടു.
