വീഴ്ചകൾ അനുഭവപരിചയക്കുറവ് മൂലം; തെറ്റ് തിരുത്തി മുന്നോട്ട് പോകും, അമ്മയിലെ അംഗങ്ങൾക്ക് കത്തയച്ച് ശ്വേത മേനോൻ

കൊച്ചി: താര സംഘടനയായ അമ്മയിലെ അംഗങ്ങൾക്ക് വീണ്ടും കത്തയച്ച് ശ്വേത മേനോൻ. ജനറൽ ബോഡിയിൽ ഉണ്ടായ സംഭവങ്ങൾ അംഗങ്ങളെ വേദനിപ്പിച്ചതായി മനസിലാക്കുന്നതായും ശ്വേത കത്തിൽ പറയുന്നു. എല്ലാവരുടേയും സഹകരണം ഉണ്ടാകണമെന്നും ശ്വേത മേനോൻ കത്തിലൂടെ ആവശ്യപ്പെടുന്നു. അംഗങ്ങളുടെ കൈനീട്ടം, സഞ്ജീവനി പദ്ധതി, മെഡിക്കൽ ഇൻഷുറൻസ് ആനുകൂല്യങ്ങൾ ഉൾപ്പെടെയുള്ള എല്ലാ സേവനങ്ങളും മുടക്കമില്ലാതെ തുടരുമെന്നും കത്തിൽ ശ്വേത പറയുന്നുണ്ട്.

മുൻപ് ഭരണസമിതിയുടെ ഭാഗത്തുനിന്നുണ്ടായ വീഴ്ചകൾ അനുഭവപരിചയക്കുറവ് മൂലം സംഭവിച്ചതാണെന്ന് ശ്വേത കത്തിൽ സമ്മതിക്കുന്നു. ഈ പിഴവുകൾ തിരുത്താനുള്ള കൃത്യമായ നടപടികൾ ഇതിനകം തന്നെ ആരംഭിച്ചതായും അവർ വ്യക്തമാക്കി. ‘അമ്മ’ പ്രസിഡന്റ്, ജനറൽ സെക്രട്ടറി, എക്സിക്യൂട്ടിവ് അംഗങ്ങൾ എന്നിവർ ചേർന്നാണ് ഈ കത്ത് ‘അമ്മ’യിലെ അംഗങ്ങൾക്കായി അയച്ചിരിക്കുന്നത്. എന്നാൽ, കത്തിൽ താൻ പദവിയിൽ തുടരുമോ അതോ രാജി വയ്‌ക്കുമോ എന്ന കാര്യത്തിൽ ശ്വേത കൃത്യമായ വിശദീകരണം നൽകിയിട്ടില്ല.

കത്തിന്റെ പൂർണരൂപം:

‘‘പ്രിയപ്പെട്ട അമ്മ അംഗങ്ങളേ,

സ്നേഹപൂർവം നമസ്കാരം.

2026 ജൂൺ 21-ന് നടന്ന വാർഷിക ജനറൽ ബോഡി യോഗത്തിൽ ഉണ്ടായ ചർച്ചകളും തുടർന്നുണ്ടായ അഭിപ്രായവ്യത്യാസങ്ങളും എല്ലാ അംഗങ്ങളും നേരിട്ട് കാണുകയും മനസ്സിലാക്കുകയും ചെയ്തതാണ്. ആ സംഭവങ്ങൾ പല അംഗങ്ങൾക്കും വിഷമവും നിരാശയും ആശങ്കയും ഉണ്ടാക്കിയിട്ടുണ്ടാകാമെന്ന് ഞങ്ങൾ പൂർണമായി മനസ്സിലാക്കുന്നു.

ഞങ്ങളുടെ കമ്മിറ്റിയിൽ നിന്ന് അനുഭവപരിചയക്കുറവ് മൂലമുണ്ടായ പിഴവുകൾ ആത്മാർഥമായ ആത്മപരിശോധനയിലൂടെ തിരിച്ചറിഞ്ഞ്, അവ തിരുത്തുന്നതിനുള്ള നടപടികൾ ഇതിനകം ആരംഭിച്ചുകഴിഞ്ഞു. കൂടുതൽ പക്വതയോടെയും ഉത്തരവാദിത്തത്തോടെയും മുന്നോട്ടുപോകാൻ ഞങ്ങൾ പ്രതിജ്ഞാബദ്ധരാണ്.

ഇപ്പോൾ ചുമതല വഹിക്കുന്ന എക്സിക്യൂട്ടീവ് കമ്മിറ്റി അംഗങ്ങൾ അവരുടെ ഉത്തരവാദിത്തങ്ങൾ തുടർന്നും നിർവഹിച്ചുവരുന്നു. അതിനാൽ 2026 ജൂൺ 21 മുതൽ ഇന്നുവരെ ‘അമ്മ’യുടെ ദൈനംദിന പ്രവർത്തനങ്ങൾക്കും അംഗസേവനങ്ങൾക്കും യാതൊരു തടസ്സവും നേരിട്ടിട്ടില്ല.

അംഗങ്ങളുടെ കൈനീട്ടം, സഞ്ജീവനി പദ്ധതി, മെഡിക്കൽ ഇൻഷുറൻസ് ആനുകൂല്യങ്ങൾ ഉൾപ്പെടെയുള്ള എല്ലാ സേവനങ്ങളും മുടക്കമില്ലാതെ തുടരുകയാണ്. ഇനിയും അതേ ആത്മാർഥതയോടെയും ഉത്തരവാദിത്തത്തോടെയും ഈ സേവനങ്ങൾ തുടരുമെന്ന് ഞങ്ങൾ ഉറപ്പുനൽകുന്നു.

അമ്മയിലെ ഓരോ അംഗത്തിന്റെയും ക്ഷേമവും സുരക്ഷയും സംഘടനയുടെ ഐക്യവും കാത്തുസൂക്ഷിക്കുന്നതാണ് ഞങ്ങളുടെ ഏറ്റവും വലിയ മുൻഗണന. ഇതുവരെ നിങ്ങൾ ഓരോരുത്തരും നൽകിയ സ്നേഹത്തിനും വിശ്വാസത്തിനും സഹകരണത്തിനും ഹൃദയപൂർവം നന്ദി അറിയിക്കുന്നു. തുടർന്നും നിങ്ങളുടെ വിലപ്പെട്ട പിന്തുണയും സഹകരണവും ഉണ്ടാകുമെന്ന് ആത്മാർത്ഥമായി പ്രതീക്ഷിക്കുന്നു.

സ്നേഹപൂർവം,

അമ്മ പ്രസിഡന്റ്, ജനറൽ സെക്രട്ടറി എക്സിക്യൂട്ടീവ് കമ്മിറ്റി അംഗങ്ങൾ’’