ന്യൂദല്ഹി: നെല്കൃഷി അടിസ്ഥാന സൗകര്യ വികസനപദ്ധതികളുടെ ധനവിനിയോഗ പരിധിയില് കേരളത്തിന് പ്രത്യേക ഇളവ് നല്കാമെന്ന് കേന്ദ്ര കൃഷിമന്ത്രി ശിവരാജ് സിങ് ചൗഹാന് വ്യക്തമാക്കിയെന്ന് കൃഷി മന്ത്രി ടി. സിദ്ദിഖ്. പ്രഗതി പദ്ധതിയില് കേരളത്തെയും ഉള്പ്പെടുത്തും. വിവിധ പദ്ധതികള്ക്ക് പ്രത്യേക സാമ്പത്തിക സഹായം ഉള്പ്പെടെയുള്ളവയില് അനുകൂല നിലപാട് സ്വീകരിച്ചുവെന്നും കേന്ദ്രമന്ത്രിയുമായുള്ള കൂടിക്കാഴ്ചക്ക് ശേഷം മന്ത്രി മാധ്യമങ്ങളോട് പറഞ്ഞു.
രാഷ്ട്രീയ കൃഷി വികാസ് യോജന പദ്ധതി പ്രകാരം കേന്ദ്രാവിഷ്കൃത പദ്ധതികളില് നെല്ല്, അരി എന്നിവയുടെ അടിസ്ഥാന സൗകര്യവികസനത്തിന് 10 ശതമാനം ധനവിനിയോഗ പരിധിയാണ് നിശ്ചയിച്ചിരുന്നത്. ഇത് സംസ്ഥാനത്തിന് പ്രതികൂലമാണെന്ന് കൃഷിവകുപ്പ് സംഘം കേന്ദ്രമന്ത്രിയെ അറിയിച്ചു. തുടര്ന്നാണ് കേരളത്തിന് അനുകൂല നിലപാട് കേന്ദ്രമന്ത്രാലയം സ്വീകരിച്ചത്.
ഇതോടെ സംസ്ഥാനത്തിന് കൂടുതല് തുക നെല്ല് കൃഷിക്കായി കണ്ടെത്താനാകും. നാളികേര ഉത്പാദനക്ഷമത പുനരുജ്ജീവിപ്പിക്കുന്നതിനുള്ള പ്രത്യേക പദ്ധതിക്കും മറ്റ് സാമ്പത്തിക സഹായത്തിനും കേന്ദ്രസര്ക്കാര് തത്വത്തില് അംഗീകാരം നല്കി. കുറ്റ്യാടി കോക്കനട്ട് ഇന്ഡസ്ട്രിയല് പാര്ക്ക് അടുത്തഘട്ടത്തില് പരിഗണിക്കുമെന്നും കേന്ദ്രം അറിയിച്ചുവെന്നും മന്ത്രി സിദ്ദിഖ് പറഞ്ഞു.
സാങ്കേതികവിദ്യയും വിപണിയും സംരംഭകത്വവും അടിസ്ഥാനമാക്കിയുള്ള പ്രഗതി പദ്ധതിയില് കേരളത്തെ ഉള്പ്പെടുത്തും. പെര് ഡ്രോപ്പ് മോര് ക്രോപ്പ് പദ്ധതിയുടെ ഭാഗമായി മൈക്രോ ഇറിഗേഷന് വ്യാപനം കുറഞ്ഞ സംസ്ഥാനങ്ങളുടെ പട്ടികയിലേക്ക് കേരളത്തെ മാറ്റും. കേന്ദ്രസര്ക്കാരിന്റെ കര്ഷക രജിസ്ട്രി, ക്രോപ്പ് രജിസ്ട്രി എന്നിവയിലേക്ക് സംസ്ഥാന സര്ക്കാരിന്റെ കതിര് പോര്ട്ടലിന് ആക്സസ് അനുവദിക്കും.
റബര് ഷീറ്റുകളുടെ ഗുണനിലവാരം ഉറപ്പാക്കുന്നതിനുള്ള റബര് റോളറിനെ സബ് മിഷന് ഓണ് അഗ്രികള്ച്ചര് മെക്കനൈസേഷന് (എസ്എംഎഎം) പദ്ധതിയില് ഉള്പ്പെടുത്തും. ഇതോടെ സബ്സിഡിക്ക് അര്ഹമായ കാര്ഷിക യന്ത്രമായി റബര് റോളര് അംഗീകരിക്കപ്പെടും.
ഗുണഭോക്താക്കളുടെ വിവരങ്ങള് അപ്ലോഡ് ചെയ്യുന്നതിലുണ്ടായ കാലതാമസം കാരണം തടസപ്പെട്ടുകിടന്ന പിഎം കിസാന് പദ്ധതിയിലെ 2021-22 മുതലുള്ള 12.14 കോടി ഉള്പ്പടെ കുടിശ്ശികകള് അനുവദിക്കും. പിലിക്കോട് പ്രാദേശിക കാര്ഷിക ഗവേഷണ കേന്ദ്രം, ബാലരാമപുരം നാളികേര ഗവേഷണ കേന്ദ്രം എന്നിവയെ സെന്റര് ഓഫ് എക്സലന്സായി മാറ്റുന്നതിനുള്ള തുടര് ചര്ച്ചകള് നടത്തും. രാഷ്ട്രീയ കൃഷി വികാസ് യോജനപദ്ധതിയുടെ ഭാഗമായി അംഗീകാരം ലഭിച്ച 11 പദ്ധതികളുടെ കാലാവധി ദീര്ഘിപ്പിക്കുന്നതിന് നടപടി സ്വീകരിക്കാമെന്നും കേന്ദ്രം ഉറപ്പ് നല്കിയെന്നും മന്ത്രി പറഞ്ഞു.
കൂടിക്കാഴ്ചയില് കൃഷി സെക്രട്ടറി മിന്ഹാജ് ആലം, സ്പെഷല് സെക്രട്ടറി വി. സുഭാഷ്, ഡയറക്ടര് ശ്രീറാം വെങ്കിട്ടരാമന്, കേന്ദ്ര കാര്ഷിക വകുപ്പ് സെക്രട്ടറി അതീഷ് ചന്ദ്ര, ഇന്ത്യന് കാര്ഷിക ഗവേഷണ കൗണ്സില് ഡയറക്ടര് ജനറല് ഡോ. എം. എല്. ജാട്ട്, കേന്ദ്ര കാര്ഷികവകുപ്പ് അഡീ. സെക്രട്ടറി പി. കെ. മെഹ്റഡ, ഹോര്ട്ടികള്ച്ചര് കമ്മിഷണര് പ്രഭാത് കുമാര് തുടങ്ങിയവര് പങ്കെടുത്തു.
