ന്യൂദല്‍ഹി: റഷ്യയില്‍ നിന്നും ഇന്ധനം ഇറക്കുമതി ചെയ്യുന്ന ഇന്ത്യയ്ക്ക് 100 ശതമാനം തീരുവ ഏര്‍പ്പെടുത്താന്‍ അമേരിക്ക ആലോചിക്കുന്നതായി ഞെട്ടിപ്പിക്കുന്ന റിപ്പോര്‍ട്ട്. അതേ സമയം റഷ്യയില്‍ നിന്നും ഇന്ധനം ഇറക്കുമതി ചെയ്യുന്ന യൂറോപ്യന്‍ രാജ്യങ്ങളെ തീരുവയില്‍ നിന്നും അമേരിക്ക ഒഴിവാക്കുമെന്നും റിപ്പോര്‍ട്ട് പറയുന്നു.
ഇതിനെതിരെ ഇന്ത്യ അതിരൂക്ഷമായി പ്രതികരിച്ചു. അമേരിക്ക ഇക്കാര്യത്തില്‍ നടത്തുന്നത് ഇരട്ടത്താപ്പാണെന്ന് ഇന്ത്യയുടെ വിദേശകാര്യമന്ത്രാലയത്തിന്റെ പ്രതികരണം. യൂറോപ്യന്‍ രാജ്യങ്ങള്‍ ഇപ്പോഴും റഷ്യയില്‍ നിന്നും ഗ്യാസ് വാങ്ങുന്നുണ്ട്. ആ രാജ്യങ്ങള്‍ക്കെല്ലാം പൂജ്യം തീരുവ ആക്കിയിരിക്കുന്നു. അതേ സമയം റഷ്യയില്‍ നിന്നും എണ്ണ വാങ്ങുന്ന ഇന്ത്യയ്ക്കെതിരെ 100 ശതമാനം തീരുവയാണ് ഏര്‍പ്പെടുത്താന്‍ അമേരിക്ക ഒരുങ്ങുന്നത്.
ഇന്ത്യ റഷ്യയില്‍ നിന്നും എണ്ണവാങ്ങുന്നത് ജനങ്ങളുടെ ഊര്‍ജ്ജസുരക്ഷ കണക്കിലെടുത്താണെന്നാണ് ഇന്ത്യന്‍ വിദേശകാര്യമന്ത്രാലയത്തിന്റെ വാദം. അമേരിക്കയും ഇന്ത്യയും തമ്മിലുള്ള സ്വതന്ത്രവ്യാപാരക്കരാര്‍ അന്തിമഘട്ടത്തിലേക്ക് അടുക്കുന്നതിനിടെയാണ് അമേരിക്കയുടെ ഭാഗത്ത് നിന്നും വലിയ തിരിച്ചടി ഉണ്ടാകാന്‍ പോകുന്നത്. ഇത് ഇന്ത്യ-യുഎസ് സ്വതന്ത്രവ്യാപാരക്കരാറിനെ ബാധിക്കുമെന്നും ഇന്ത്യയ്ക്ക് ആശങ്കയുണ്ട്.
അതേ സമയം റഷ്യയെ സാമ്പത്തികമായി ഞെരുക്കുകയാണ് അമേരിക്കയുടെ ലക്ഷ്യമെന്ന് വിദഗ്ധര്‍ ചൂണ്ടിക്കാട്ടുന്നു. റഷ്യയെ സമ്മര്‍ദ്ദത്തിലാക്കി ഇറാനില്‍ റഷ്യയുടെ ഇടപെടല്‍ കുറയ്‌ക്കുകയാണ് അമേരിക്കയുടെ തന്ത്രമെന്ന് കരുതുന്നു.
