വാരാഹി നവരാത്രി വിശേഷം

ഇതൊരു നവരാത്രിക്കാലമാണ്. വാരാഹി നവരാത്രി അഥവാ ഗുപ്ത നവരാത്രി. ആഷാഢമാസ ശുക്ലപക്ഷത്തിലെ പ്രഥമ മുതല്‍ നവമി വരെയുള്ള ഒന്‍പതു ദിവസങ്ങളിലാണ് ഈ നവരാത്രി ആഘോഷിക്കുന്നത്. ഇന്നലെ ആരംഭിച്ച വാരാഹി നവരാത്രി ജൂലൈ 23 വരെ നീളും. വാരാഹി നവരാത്രിയിലെ അഞ്ചാംദിവസമായ പഞ്ചമിയാണ് അതിവിശേഷം. ഈ ദിവസം ദേവിയെ പ്രാര്‍ത്ഥിച്ചാല്‍ ഐശ്വര്യവും ആത്മീയ സംരക്ഷണവും ഏകുമെന്നാണ് വിശ്വാസം. മുരുകന്‍ ദേവ സേനാപതി എന്നത് പോലെ, ദേവിമാരുടെ സേനാനായികയാണ് ശ്രീ വാരാഹി ദേവി എന്നാണ് സങ്കല്പം. മഹാവിഷ്ണുവിന്റെ വരാഹാവതാരത്തിന്റെ സ്ത്രീശക്തിയാണ് വാരാഹി ദേവി. ലളിതാ സഹസ്രനാമത്തില്‍ ആരാധിക്കുന്ന ശ്രീ ലളിതാ പരമേശ്വരിയുടെ മുഖ്യ സേനാ നായികയാണ് വാരാഹി ദേവി.

വിളിച്ചാല്‍ വിളികേള്‍ക്കുന്ന ശക്തിയുടെ രൂപമാണത്രെ വാരാഹി ദേവി. വിശുക്രന്‍ എന്ന അസുരനെ വാരാഹി നിഗ്രഹിച്ചതായി ലളിതാസഹസ്രനാമത്തില്‍ വര്‍ണിക്കുന്നുണ്ട്. സപ്
തമാതൃക്കളില്‍ പ്രധാനിയാണ് വാരാഹി. വാക്കുകള്‍ കൊണ്ട് വിവരിക്കാനോ വര്‍ണിക്കാനോ സാധിക്കാത്ത വിധത്തില്‍ ഏറ്റവും ശക്തിയുള്ള ദേവിയുമാണ്.

4,8,16 കൈകളില്‍ വ്യത്യസ്ത ആയുധങ്ങളെക്കൊണ്ട് ദേവിയെ വര്‍ണ്ണിക്കാറുണ്ട്. ഉന്മത്ത ഭൈരവി, സ്വപ്നേശി, തൃസ്‌കൃതി, കൃപതാദേവി തുടങ്ങി അനേകം പരിവാരങ്ങളോട് കൂടിയിട്ടാണ് ദേവി വിരാജിക്കുന്നത്.

തമിഴ്നാട്ടിലും ഉത്തരഭാരതത്തിലും വാരാഹി ദേവിയെ പ്രത്യേക പ്രാധാന്യത്തോടെ ആരാധിക്കുന്നുന്നു. ചോള രാജാക്കന്മാര്‍ പ്രത്യേക പ്രാധാന്യത്തോടെ വാരാഹി പൂജകള്‍ നടത്തിയിരുന്നു. ഗണപതി പൂജക്ക് മുമ്പ് തന്നെ ശ്രീവാരാഹി പൂജ നടത്തുന്ന പതിവ് ആ കാലത്തുണ്ടായിരുന്നു.

സപ്തമാതൃക്കളില്‍ അഞ്ചാംസ്ഥാനം വാരാഹി ദേവിക്കാണ്. അതുകൊണ്ട് എല്ലാ ക്ഷേത്രങ്ങളിലും വാരാഹി ദേവിയുടെ സാന്നിധ്യം ഉള്ളതായി കണക്കാക്കപ്പെടുന്നു. കാഞ്ചി കാമാക്ഷി അമ്മന്‍ ക്ഷേത്രത്തിലെ മൂലസ്ഥാനത്ത് വടക്കു വശത്തായി ശ്രീ വാരാഹി ഉണ്ടെന്നാണ് കണക്കാക്കുന്നത്. കാഞ്ചീപുരത്ത് നിന്ന് ഏകദേശം 15 കിലോമീറ്റര്‍ ദൂരത്തില്‍ പള്ളൂര്‍ അശോലൈ അമ്മന്‍ എന്ന വാരാഹി ക്ഷേത്രം ഉണ്ട്. തിരുവാനൈക്കാവല്‍, ഉത്തര കോശ മങ്ക, അരിയല്ലൂര്‍ ഇലു പൈകുടി, ജയ് ദുര്‍ഗ പീഠം, ചോഴങ്ങനല്ലൂര്‍ തുടങ്ങിയവയെല്ലാം വാരാഹി ദേവിയുമായി ബന്ധമുള്ള ക്ഷേത്രസന്നിധി കളായി കണക്കാക്കപ്പെടുന്നു.

മഹാശക്തി ശാലിയായ വാരാഹി ദേവിയെ പ്രത്യേകമായി ആരാധിക്കാനുള്ള സമയമാണ് ആഷാഢ മാസത്തില്‍ കറുത്ത വാവിനു ശേഷമുള്ള പ്രഥമ മുതല്‍ നവമി വരെയുള്ള ദിവസങ്ങള്‍. ഇതാണ് വാരാഹി നവരാത്രി അഥവാ തേയു നവരാത്രി എന്നു വിശേഷിപ്പിക്കപ്പെടുന്നത്. തേയു എന്നാല്‍ അഗ്നി എന്നാണ് അര്‍ത്ഥം. ഏറെ സവിശേഷതകളുള്ള നവരാത്രി ആണ് ഇത്.

സാധാരണയായി വരാഹി ദേവിയെ രാത്രികാലങ്ങളിലാണ് ആരാധിക്കുന്നത്. ഈ കാലയളവില്‍ പ്രത്യേകമായ പ്രാര്‍ത്ഥന പൂജ തുടങ്ങിയവയെല്ലാം നടത്തുന്നു. സാധകന്‍മാരെ സംബന്ധിച്ചെടുത്തോളം ദേവി പ്രീതിക്ക് അത്യധികം ശ്രേഷ്ഠമായ സമയമാണ് ഗുപ്ത നവരാത്രി അഥവാ വാരാഹി നവരാത്രി.