ആലപ്പുഴ: ക്ഷേത്ര കമ്മിറ്റികള് പിടിച്ചടക്കാനുള്ള പാര്ട്ടി തീരുമാനം വേണ്ടത്ര വിജയിച്ചില്ലെന്ന് സിപിഎം കേന്ദ്രകമ്മിറ്റി. കഴിഞ്ഞ നിയമസഭാ തെരഞ്ഞെടുപ്പിന്റെ അവലോകന റിപ്പോര്ട്ടിലാണ് പരാമര്ശം.
‘ആര്എസ്എസിന്റെയും ബിജെപിയുടെയും വ്യാപനത്തെ ചെറുക്കുന്നതിനായി, കഴിഞ്ഞ സംസ്ഥാന സമ്മേളനം ക്ഷേത്ര കമ്മിറ്റികള് വഴി ഇടപെടാനും അവ പ്രചരിപ്പിക്കുന്ന വര്ഗീയ വിദ്വേഷത്തെ ചെറുക്കാനും തീരുമാനിച്ചിരുന്നു…’ ക്ഷേത്രങ്ങളെ കേന്ദ്രീകരിച്ചുള്ള ആര്എസ്എസിന്റെ പ്രവര്ത്തന ശൈലി വ്യാപകമായിരിക്കുന്നു. അത് ഉപയോഗപ്പെടുത്തി, സ്ത്രീകളെ സംഘടിപ്പിക്കാനും അവരെ സംഘപരിവാറിന്റെ രാഷ്ട്രീയ പിന്തുണക്കാരാക്കി മാറ്റാനുമുള്ള ഇടപെടലുകള് സജീവമാണ്. സ്ത്രീകള്ക്കിടയില് സംഘപരിവാറിന്റെ പ്രവര്ത്തനങ്ങളെ ചെറുക്കുന്നതിന് പ്രത്യേക ഇടപെടല് ആവശ്യമാണ്.
യുവതികളെ തിരിച്ചറിഞ്ഞ് മേഖലയിലേക്ക് വിന്യസിക്കുകയും സ്ത്രീകളുടെ പ്രത്യേക റാലികള് സംഘടിപ്പിക്കുകയും ചെയ്യുന്ന ഒരു സാഹചര്യവും കാണാന് കഴിയും. എന്നിരുന്നാലും, അപകടം തിരിച്ചറിഞ്ഞിട്ടും, സംസ്ഥാന സമ്മേളനത്തിന്റെ നിര്ദേശങ്ങള് നമുക്ക് വേണ്ടത്ര നടപ്പിലാക്കാന് കഴിഞ്ഞില്ല. വിവിധ ആരാധനാലയങ്ങള് വിദ്വേഷം പ്രചരിപ്പിക്കാനും സമൂഹത്തെ വിഭജിക്കാനും തങ്ങളുടെ കോട്ടകളാക്കി മാറ്റുന്ന വര്ഗീയ ഘടകങ്ങള് അവ ഏറ്റെടുക്കുന്നത് തടയാനുള്ള മാര്ഗങ്ങള് കണ്ടെത്തേണ്ടത് അത്യാവശ്യമാണ്. പാര്ട്ടി ഇതില് അടിയന്തരശ്രദ്ധ ചെലുത്തേണ്ടതുണ്ട്… റിപ്പോര്ട്ടില് സൂചിപ്പിക്കുന്നു.
ക്ഷേത്ര കമ്മിറ്റികളില് കടന്നുകയറി പാര്ട്ടി നയങ്ങള് നടപ്പാക്കാന് കഴിഞ്ഞ സംസ്ഥാന സമ്മേളനം മുതല് ആസൂത്രിത നീക്കം നടന്നു എന്ന് വ്യക്തമാക്കുന്നതാണ് പാര്ട്ടി കേന്ദ്ര കമ്മിറ്റി റിപ്പോര്ട്ട്. കമ്മറ്റികളില് കടന്നുകയറിയ ഇടങ്ങളില് ക്ഷേത്രാരാധനക്രമങ്ങളെ ഇല്ലായ്മ ചെയ്യാന് ശ്രമിച്ചതില് വന് പ്രതിഷേധം ഉയര്ന്നതും, അഴിമതി ആരോപണങ്ങള് ഉയര്ന്നതുമാണ് സിപിഎം നീക്കം വേണ്ടത്ര വിജയിക്കാതെ പോയത്.
ഇപ്പോഴത്തെ സാഹചര്യത്തില് വീണ്ടും ഇത്തരം ശ്രമങ്ങള് സജീവമാക്കുകയാണ് സിപിഎം. ഇതിന്റെ ഭാഗമാണ് ചില പ്രദേശങ്ങള് കേന്ദ്രീകരിച്ച് ടെമ്പിള് കോഓര്ഡിനേഷന് കമ്മിറ്റികള് രൂപീകരിച്ച് ക്ഷേത്രങ്ങളെ കമ്മ്യൂണിസ്റ്റ്വത്കരിക്കാനുള്ള നീക്കമെന്നാണ് വിമര്ശനം.
ശബരിമല സ്വര്ണക്കൊള്ളയില് പ്രതിക്കൂട്ടിലായ സിപിഎം നേതൃത്വം ക്ഷേത്രങ്ങള് പിടിച്ചടക്കാന് പുതിയ അടവുനയവുമായി രംഗത്തെത്താനാണ് സാദ്ധ്യത. സംഘപരിവാറിനെ എതിര്ക്കുക എന്ന മറ തീര്ത്ത് ക്ഷേത്രങ്ങളെ അരാജക കേന്ദ്രങ്ങളാക്കുകയും വിശ്വാസങ്ങളെ തകര്ക്കുകയുമാണ് സിപിഎം ലക്ഷ്യമെന്നാണ് ആക്ഷേപം.
