പാലക്കാട്: നഗരത്തെ അന്താരാഷ്ട്ര ‘സംഗീത നഗരമായി’ ഉയര്ത്താനുള്ള ബൃഹദ് പദ്ധതിയുമായി പാലക്കാട് നഗരസഭ. ജില്ലയുടെ സവിശേഷമായ കര്ണാടക സംഗീത പാരമ്പര്യം, കല്പാത്തി ഉള്പ്പെടെയുള്ള പരമ്പരാഗത അഗ്രഹാരങ്ങളിലെ ക്ഷേത്രകേന്ദ്രീകൃത തെരുവുകളുടെ സവിശേഷതകള്, വാല്മുട്ടി പോലുള്ള പാട്ടുഗ്രാമങ്ങളിലെ നാടന് പാട്ടറിവുകള്, നാടോടി-ഗോത്ര-ക്ഷേത്ര കലകള് എന്നിവയെല്ലാം കോര്ത്തിണക്കിയാണ് നഗരസഭ സിറ്റി ഓഫ് മ്യൂസിക്ക് പദ്ധതിക്ക് രൂപം നല്കിയിട്ടുള്ളത്. 2030 ഓടെ പാലക്കാടിനെ ദേശീയ-അന്തര്ദേശീയ തലത്തില് ശ്രദ്ധയാകര്ഷിക്കുന്ന പ്രമുഖ സംഗീത ഹബ്ബാക്കി മാറ്റുകയാണ് ലക്ഷ്യം.
കലയും സാംസ്കാരിക പൈതൃകവും പ്രാദേശിക വികസനത്തിന്റെ പ്രധാന ചാലകശക്തിയാക്കി മാറ്റുന്ന ‘സര്ഗാത്മക സമ്പദ്വ്യവസ്ഥ’ എന്ന ആധുനിക ആശയത്തിലൂന്നിയാണ് പദ്ധതി വിഭാവനം ചെയ്തിരിക്കുന്നത്. നഗരത്തിലെ പൊതുയിടങ്ങളെയും പൈതൃക തെരുവുകളെയും സംഗീത സാന്ദ്രമാക്കാനും, പ്രാദേശിക കലാകാരന്മാര്ക്ക് ആഗോളതലത്തില് പുതിയ അവസരങ്ങളും സാംസ്കാരിക തൊഴില് സാധ്യതകളും സൃഷ്ടിക്കാനും ഇതിലൂടെ ലക്ഷ്യമിടുന്നു.
കൂടാതെ, കഥകളി, തുള്ളല്, ചാക്യാര്കൂത്ത്, സോപാനസംഗീതം തുടങ്ങിയ തനത് കലകള്ക്കും, ജി.ഐ. ടാഗ് നേടിയ പാലക്കാട് മദ്ദളം, മൃദംഗം തുടങ്ങി വാദ്യോപകരണ നിര്മ്മാണ മേഖലയ്ക്കും പുതിയ വിപണിയും പദ്ധതി ഉറപ്പാക്കും.
നഗരസഭ ചെയര്മാന് പി. സ്മിതേഷ്, വൈസ് ചെയര്പേഴ്സണ് ടി. ബേബി എന്നിവരുടെ നേതൃത്വത്തില് പദ്ധതിയുടെ പ്രാരംഭഘട്ടമെന്ന നിലയില് ആലോചന യോഗം ചേര്ന്നു.
കേവലം വിനോദത്തിനപ്പുറം സംഗീതത്തെ മാനസികാരോഗ്യം, വിദ്യാഭ്യാസം, ആധുനിക സാങ്കേതികവിദ്യ, നഗര നവീകരണം എന്നിവയുമായി ബന്ധിപ്പിച്ച് ജനങ്ങളുടെ ജീവിതനിലവാരം ഉയര്ത്തുകയെന്നതാണ് നഗരസഭയുടെ ലക്ഷ്യം.
കില സ്കൂള് ഓഫ് അര്ബന് ഗവേണന്സ് പദ്ധതിയുടെ ഔദ്യോഗിക ‘ടെക്നിക്കല് സെക്രട്ടേറിയേറ്റ്’ ആയി പ്രവര്ത്തിച്ച് ആവശ്യമായ നയരൂപീകരണ-സാങ്കേതിക പിന്തുണ നല്കും. പദ്ധതിയുടെ നടത്തിപ്പിനായി നഗരസഭ ചെയര്മാന്റെ അധ്യക്ഷതയില് ഒരു പ്രത്യേക സ്റ്റിയറിങ് കമ്മിറ്റി രൂപീകരിക്കാനും നഗരത്തില് ‘സിറ്റി ഓഫ് മ്യൂസിക്’ ഓഫീസ് തുടങ്ങാനും തീരുമാനിച്ചു.
നിലവിലുള്ള മറ്റ് ആഗോള സംഗീത നഗരങ്ങളുമായി ധാരണാപത്രത്തില് ഒപ്പുവയ്ക്കും. മാത്രമല്ല’പാലക്കാട് മ്യൂസിക് ഫെസ്റ്റിവല്’ സംഘടിപ്പിക്കാനും തീരുമാനിച്ചു.
മേഖലയിലെ വിദഗ്ധര്, നഗരസഭ സ്റ്റാന്ഡിങ് കമ്മിറ്റി ചെയര്മാന്മാര് എന്നിവരെ ഉള്പ്പെടുത്തിക്കൊണ്ട് വിപുലമായ സ്റ്റിയറിങ് കമ്മിറ്റിയും രൂപീകരിക്കും.
നഗരസഭയില് നടന്ന യോഗത്തില് നാഷണല് ഇന്സ്റ്റിറ്റ്യൂട്ട് ഓഫ് ടെക്നോളജി പ്രതിനിധികളായ കെ. സതീഷ് നമ്പൂതിരിപ്പാട്, ഡോ. ചിത്ര, ഡോ. പി. ബിമല്, ഡോ. സനില്കുമാര്, ഡോ. പി.കെ. അമൃത, വി.പി. ഷാലിമോള്, കില പ്രതിനിധിയായി പ്രൊഫ. അജിത് കാളിയത്ത്, ഐഐടി പാലക്കാടിനെ പ്രതിനിധീകരിച്ച് ഡോ.എം.എ. അഞ്ജു, ഡോ. അരുണ് രാഹുല്, ഡോ.പ്രജ്വല് ബാനര്ജി, പ്രഭുല്ലദാസ്, പിഎംഎ ഭാരവാഹി സുമേഷ്.കെ മേനോന്, ഡിടിപിസി മാനേജര് വി.ആനന്ദകൃഷ്ണന്, ഫൈന് ആര്ട്സ് സൊസൈറ്റി സെക്രട്ടറി പി.എന്. സുബ്രഹ്മണ്യന്, ആര്.എസ്. ശ്രീനാഥ് വിശ്വനാഥ്, നഗരസഭ ഡെപ്യൂട്ടി ടൗണ് പ്ലാനര് ശരത്കുമാര്, മുനിസിപ്പല് സെക്രട്ടറി ജെസിത, സൂപ്രണ്ട് സീതാലക്ഷ്മി, സീനിയര് ക്ലര്ക്കുമാരായ കെ.ബിനു,സുരേഷ് എന്നിവരും പങ്കെടുത്തു.
