കൊച്ചി: വടക്കാഞ്ചേരി ലൈഫ് മിഷന്‍ അഴിമതി കേസില്‍ സ്വപ്ന സുരേഷ് അടക്കം ആറ് പ്രതികള്‍ക്കെതിരെ കുറ്റപത്രം സമര്‍പ്പിച്ച് സിബിഐ. യുണിടാക് ബില്‍ഡേഴ്‌സ് ഉടമ സന്തോഷ് ഈപ്പനാണ് ഒന്നാം പ്രതി. ഈപ്പന്റെ ഉടമസ്ഥതയിലുള്ള സെയ്ന്‍ വെഞ്ചേഴ്‌സ് കമ്പനി രണ്ടാം പ്രതിയും ലൈഫ് മിഷന്‍ മൂന്നാം പ്രതിയുമാണ്. സ്വപ്ന സുരേഷ്, സരിത്, സന്ദീപ് നായര്‍ എന്നിവരാണ് മറ്റ് പ്രതികള്‍. മുന്‍ മുഖ്യമന്ത്രി പിണറായി വിജയന്‌റെ പ്രിന്‍സിപ്പല്‍ സെക്രട്ടറിയായിരുന്ന എം ശിവശങ്കര്‍ ആദ്യ കുറ്റപത്രത്തില്‍ പ്രതിപ്പട്ടികയിലില്ല. ശിവശങ്കരനും ലൈഫ് മിഷന്‍ സി ഇ ഒ ആയിരുന്ന യു വി ജോസിനും എതിരായ അന്വേഷണം പൂര്‍ത്തിയായിട്ടില്ലെന്ന് സിബിഐ അറിയിച്ചു.
പ്രളയബാധിതര്‍ക്ക് ഫ്‌ളാറ്റ് നിര്‍മ്മിക്കുന്നതിനായി യുഎഇയിലെ റെഡ് ക്രസന്റുമായി ഒപ്പുവെച്ച ധാരണാപത്രപ്രകാരം ലഭിച്ച 21 കോടി രൂപയില്‍ നാല് കോടി രൂപ പ്രതികള്‍ കമ്മീഷനായി തട്ടിയെടുത്തുവെന്ന് കുറ്റപത്രത്തില്‍ പറയുന്നു. 10 കോടി രൂപയുടെ നിര്‍മ്മാണ പ്രവൃത്തികള്‍ മാത്രമാണ് സൈറ്റില്‍ നടന്നത്. ആകെ 11 കോടിയോളം രൂപയുടെ തിരിമറി നടന്നു. വിദേശ സഹായ നിയന്ത്രണ നിയമം ലംഘിച്ചാണ് വിദേശ ഫണ്ട് കൈപ്പറ്റിയതും വിനിയോഗിച്ചതുമെന്നും സിബി ഐ ചൂണ്ടിക്കാട്ടുന്നു.
