ചെന്നൈ: കോഴി ഉത്പാദകര് പിന്തുടരുന്ന തീറ്റക്രമത്തില് പ്രതിഷേധിച്ച് നാളെ മുതല് തമിഴ്നാട്ടിലെയും പുതുച്ചേരിയിലെയും ഇറച്ചിക്കോഴി വില്പ്പന നിര്ത്തിവയ്ക്കാന് തമിഴ്നാട് പൗള്ട്രി ട്രേഡേഴ്സ് ഫെഡറേഷന് തീരുമാനിച്ചു. കേരളത്തിലെ വ്യാപാരി സംഘടനകളും സമരത്തിന് ഐക്യദാര്ഢ്യം പ്രഖ്യാപിച്ചു.
അനിശ്ചിതകാലസമരം കേരളത്തിലടക്കമുള്ള ഇറച്ചിപ്രിയരെയും ചില്ലറ വ്യാപാരികളെയും സാരമായി ബാധിക്കും. ഹോട്ടലുകള്ക്കാണ് വലിയ തിരിച്ചടിയാവുക. ഫാമുകളില് നിന്ന് കോഴികളെ കയറ്റിവിടുന്നതിന് പതിനഞ്ച് മണിക്കൂര് മുമ്പ് തീറ്റ നല്കുന്നത് നിര്ത്തിവയ്ക്കണമെന്നാണ് വ്യാപാരികളുടെ പ്രധാന ആവശ്യം.
തൂക്കംകൂട്ടാനായി കോഴികളെ കയറ്റിവിടുന്ന സമയത്തുപോലും ഭക്ഷണം നല്കുണ്ടെന്ന് വ്യാപാരികള് ആരോപിക്കുന്നു. തൂക്കംകൂട്ടാനാണ് ഈ സൂത്രപ്പണി ചെയ്യുന്നതെങ്കിലും ദഹിക്കാത്ത തീറ്റ കലര്ന്ന് മാംസം മലിനമാകുമെന്ന് വ്യാപാരികള് ആരോപിക്കുന്നു. മാത്രമല്ല, ദഹിക്കാത്ത തീറ്റയ്ക്ക് ഉപഭോക്താക്കള് പണം നല്കേണ്ടിവരും.
